ಮೈಸೂರು: ಕೊರೊನಾ ಲಸಿಕೆ ಮೊದಲು ಪಡೆದದ್ದು ಆಂಬುಲೆನ್ಸ್ ಚಾಲಕ

ಮೈಸೂರು: ಎಲ್ಲರೂ ಕಾತುರದಿಂದ ಕಾದಿದ್ದ ಕೋವಿಡ್‌ ಲಸಿಕೆ ಅಭಿಯಾನಕ್ಕೆ ದೇಶದಲ್ಲಿ ಚಾಲನೆ ಸಿಕ್ಕಿದೆ. ಈ ಹಿನ್ನೆಲೆಯಲ್ಲಿ ಮೊದಲ ದಿನ 9 ಕೇಂದ್ರಗಳಲ್ಲಿ ಲಸಿಕೆ ನೀಡಿಕೆ ಆರಂಭಗೊಂಡಿದೆ.

ಮೊದಲ ದಿನ ಮೈಸೂರಿನ ರಂಗಸಮುದ್ರ ಕೇಂದ್ರದಲ್ಲಿ 60 ಜನರಿಗೆ ಹಾಗೂ ಇತರೆ 8 ಕೇಂದ್ರಗಳಲ್ಲಿ 100 ಜನರಿಗೆ ಲಸಿಕೆ ನೀಡಲಾಯಿತು. ಲಸಿಕೆ ನೀಡುವ ಪ್ರತಿ ಕೇಂದ್ರಕ್ಕೂ ಆರೋಗ್ಯ ಇಲಾಖೆಯು ಅಗತ್ಯವಿರುವಷ್ಟು ಡೋಸ್‌ಗಳನ್ನುಈಗಾಗಲೇ ಪೂರೈಕೆ ಮಾಡಲಾಗಿತ್ತು.

ಮೆಡಿಕಲ್ ಕಾಲೇಜಿನ ಟ್ರಾಮಾ ಕೇರ್ ಸೆಂಟರ್‌ನಲ್ಲಿ ಕೊರೊನಾ ಲಸಿಕೆ ವಿತರಣೆ ಹಿನ್ನಲೆಯಲ್ಲಿ ಟ್ರಾಮಾ ಕೇರ್ ಸೆಂಟರ್ ಮುಂಭಾಗ ಹಬ್ಬದ ವಾತಾವರಣ ನಿರ್ಮಾಣವಾಗಿತ್ತು. ಪ್ರವೇಶದ್ವಾರದಲ್ಲಿ ರಂಗೋಲಿ ಬಿಡಿಸಿ, ಬಲೂನ್ ಗಳನ್ನು ಕಟ್ಟಿ, ಸಿಬ್ಬಂದಿ ಸಿಂಗರಿಸಲಾಗಿತ್ತು.

ಪ್ರಧಾನಿ ಔಷಧಿ ನೀಡುವ ಮುಂಚಿತವಾಗಿ ಮೋದಿಯವರ ಭಾಷಣ ವೀಕ್ಷಣೆಗೂ ಅವಕಾಶ ಕಲ್ಪಿಸಲಾಗಿತ್ತು. ಎಲ್ ಇ ಡಿ ಪರದೆಯ ವ್ಯವಸ್ಥೆ ಮಾಡಿದ್ದರು. ಕೋಲ್ಡ್ ಸ್ಟೋರೇಜ್ ನಲ್ಲಿ ಲಸಿಕೆಯನ್ನು ಸಿಬ್ಬಂದಿ ತೆಗೆದುಕೊಂಡು ಬಂದು 11 ಗಂಟೆಗೆ ಸರಿಯಾಗಿ ಜಿಲ್ಲಾಧಿಕಾರಿ ರೋಹಿಣಿ ಸಿಂಧೂರಿ ಹಾಗೂ ಆರೋಗ್ಯ ಇಲಾಖೆ ಅಧಿಕಾರಿಗಳು ಮತ್ತು ಸಿಬ್ಬಂದಿ ಲಸಿಕೆ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು.

ಮೊದಲ ಲಸಿಕೆಯನ್ನು ಕೆ.ಆರ್.ಆಸ್ಪತ್ರೆಯ ಆ್ಯಂಬುಲೆನ್ಸ್ ಚಾಲಕ ಸಂದೇಶ್ ಎಂಬವರು ಪಡೆದರು. ಲಸಿಕೆ ಪಡೆದು ಅರ್ಧ ಗಂಟೆಗಳ ಕಾಲ ನಿಗಾ ಘಟಕದಲ್ಲಿರಿಸಿದ್ದರು. ಬಳಿಕ ಆರಾಮಾಗಿಯೇ ಅವರು ಹೊರಬಂದಿದ್ದು ಕಂಡುಬಂದಿತು.