ಗ್ರೀನ್‌ ಬರ್ಡ್ಸ್ ಹೂಡಿಕೆ ಹಣ ವಾಪಸ್‌ಗಾಗಿ ಅರ್ಜಿ ಸಲ್ಲಿಕೆ

ಮೈಸೂರು: ಗ್ರೀನ್‌ ಬಡ್ಸ್‌ ಸಂಸ್ಥೆಯಲ್ಲಿ ಹೂಡಿಕೆ ಮಾಡಿ ಸಂಕಷ್ಟಕ್ಕೆ ಸಿಲುಕಿದ್ದ ನೂರಾರು ಗ್ರಾಹಕರು ಮೈಸೂರಿನ ಜಿಲ್ಲಾಧಿಕಾರಿ ಕಾರ್ಯಾಲಯದಲ್ಲಿರುವ ಉಪವಿಭಾಗಾಧಿಕಾರಿ ಕಚೇರಿಯಲ್ಲಿ ಹೂಡಿಕೆ ಮಾಡಿರುವ ಹಣ ಹಿಂದಿರುಗಿಸುವಂತೆ ಕೋರಿ ಅರ್ಜಿಯೊಂದಿಗೆ ಹಣ ಸಂದಾಯ ಮಾಡಿರುವ ಬಾಂಡ್‌ ನೀಡಲು ಮುಗಿಬಿದ್ದರು.

ಠೇವಣಿದಾರರು ನವೆಂಬರ್‌ 27 ರಿಂದ ಡಿ. 27 ರವರೆಗೆ ಗ್ರೀನ್‌ ಬಡ್ಸ್‌ ಸಂಸ್ಥೆಗೆ ಹಣ ಕಟ್ಟಿರುವ ಬಾಂಡ್‌ ಪ್ರತಿಯೊಂದಿಗೆ ಅರ್ಜಿ ಸಲ್ಲಿಸಲು ಅವಕಾಶ ನೀಡಿದ್ದ ಹಿನ್ನೆಲೆಯಲ್ಲಿ ಉಪವಿಭಾಗಾಧಿಕಾರಿ ಕಚೇರಿಗೆ ಸಾವಿರಕ್ಕೂ ಹೆಚ್ಚು ಠೇವಣಿದಾರರು ಆಗಮಿಸಿ ಸಾವಿರಾರು ಬಾಂಡ್‌ ಪ್ರತಿಯೊಂದಿಗೆ ಅರ್ಜಿ ಸಲ್ಲಿಸಿದರು.

ಅರ್ಜಿ ಸಲ್ಲಿಕೆಗೆ ಡಿ.27 ಕೊನೆ ದಿನವಾಗಿರುವುದರಿಂದ ಮೈಸೂರು, ಬೆಂಗಳೂರು, ಹಾಸನ, ಕೊಡಗು, ಬೀದರ್‌, ಬಳ್ಳಾರಿ, ಶಿವಮೊಗ್ಗ, ಬಿಜಾಪುರ, ಕಲ್ಬುರ್ಗಿ, ಧಾರವಾಡ ಸೇರಿದಂತೆ ಇನ್ನಿತರ ಕಡೆಗಳಿಂದ ಏಜೆಂಟರು(ಈ ಹಿಂದೆ ಗ್ರಾಹಕರಿಂದ ಠೇವಣಿ ಕಟ್ಟಿಸಿದ್ದವರು) ಹಲವಾರು ಅರ್ಜಿಗಳನ್ನು ಹಿಡಿದುಕೊಂಡು ಬಂದಿದ್ದರು. ಅರ್ಜಿ ಸ್ವೀಕರಿಸಲು ಸುಮಾರು 10ಕ್ಕೂ ಹೆಚ್ಚು ಕೌಂಟರ್‌ ತೆರೆಯಲಾಗಿತ್ತು. ಮಹಿಳೆಯರು, ಯುವತಿಯರು, ವೃದ್ಧರು ದೂರದ ಊರುಗಳಿಂದ ಅರ್ಜಿ ಸಲ್ಲಿಸುವುದಕ್ಕಾಗಿಯೇ ಕಳೆದ ಎರಡು ದಿನಗಳಿಂದಲೇ ಮೈಸೂರಿಗೆ ಬಂದು ಬುಧವಾರ ಅರ್ಜಿ ಸಲ್ಲಿಸಿ ನಿಟ್ಟುಸಿರು ಬಿಟ್ಟರು.

ನಾನಾ ಆಮಿಷವೊಡ್ಡಿ ರಾಜ್ಯದ ನಾನಾ ಜಿಲ್ಲೆಗಳಲ್ಲಿಯೂ ಸಾವಿರಾರು ಠೇವಣಿದಾರರಿಂದ ಕೋಟ್ಯಂತರ ರೂ. ಹಣ ಪಡೆದು ವಂಚಿಸಲೆತ್ನಿಸಿ ಕಚೇರಿಗೆ ಬೀಗ ಹಾಕಿದ್ದ ಗ್ರೀನ್‌ ಬಡ್ಸ್‌ ಸಂಸ್ಥೆಯ ವಿರುದ್ದ ಕಳೆದ ಮೂರು ವರ್ಷದಿಂದ ಠೇವಣಿದಾರರು ಹೋರಾಟ ನಡೆಸಿದ್ದರು. ಇದರ ಫಲವಾಗಿ ನ್ಯಾಯಾಲಯದ ಸೂಚನೆಯ ಮೇರೆಗೆ ಈ ಹಿಂದಿನ ಉಪವಿಭಾಗಾಧಿಕಾರಿಗಳಾಗಿದ್ದ ಹಾಲಿ ಚಾಮರಾಜನಗರ ಅಪರ ಜಿಲ್ಲಾಧಿಕಾರಿಯಾಗಿರುವ ಸಿ.ಎಲ್‌.ಆನಂದ್‌ ಅವರು ಗ್ರೀನ್‌ ಬಡ್ಸ್‌ ಸಂಸ್ಥೆ ಬೇನಾಮಿ ಹೆಸರಿನಲ್ಲಿ ಮಾಡಿರುವ ಆಸ್ತಿಯನ್ನು ಪತ್ತೆ ಹಚ್ಚಿದ್ದರು.