Bharath Jodo Yatra - ಭಾರತ್ ಜೋಡೋ ಯಾತ್ರೆ ವಿರುದ್ಧ ಕಪ್ಪು ಬಾವುಟ ಪ್ರದರ್ಶನಕ್ಕೆ ಬಿಜೆಪಿ ಸಿದ್ಧತೆ: ಡಿಕೆಶಿ ಆರೋಪ

ಮೈಸೂರು: ಭಾರತ್ ಜೋಡೋ ಯಾತ್ರೆಗೆ ವಿರೋಧ ವ್ಯಕ್ತಪಡಿಸಿ ಸೋಮವಾರ ಕಪ್ಪು ಬಾವುಟ ಪ್ರದರ್ಶನಕ್ಕೆ ಬಿಜೆಪಿ ಸಿದ್ಧತೆ ನಡೆಸುತ್ತಿದೆ. ಈ ಬಗ್ಗೆ ಭಾನುವಾರ ನಂಜನಗೂಡಿನ ಬದನವಾಳುನಲ್ಲಿ ಪತ್ರಿಕಾಗೋಷ್ಠಿ ನಡೆಸಿದ ಕೆಪಿಸಿ ಅಧ್ಯಕ್ಷ ಡಿಕೆ ಶಿವಕುಮಾರ್, ನಾಳೆ ಕಪ್ಪು ಬಾವುಟ ಪ್ರದರ್ಶನಕ್ಕೆ ತಯಾರಿ ಮಾಡಿದ್ದಾರೆ ಎಂದರು.

ಈ ಬಗ್ಗೆ ನಾನು ನಗರ ಪೊಲೀಸ್ ಕಮಿಷನರ್ ಗೆ ಮಾತನಾಡುತ್ತೇನೆ. ಆದರೆ ಕಪ್ಪು ಬಾವುಟ, ಮೊಟ್ಟೆ, ಕಲ್ಲು ಎಸೆಯುವುದು ಧಿಕ್ಕಾರ ಕೂಗುವುದು ಮಾಡಿ. ದೇಶಕ್ಕೆ ಪ್ರಾಣ ಕೊಟ್ಟ ಪಕ್ಷದ ನಾಯಕರು ನಾವು. ನೀವು ಮಾಡಿ ಅದಕ್ಕೆ ಫಲ ಮುಂದಕ್ಕೆ ತಿಳಿಸುತ್ತೇನೆ ಎಂದು ಎಚ್ಚರಿಕೆ ನೀಡಿದರು.


ಇದೇ ಸಂದರ್ಭದಲ್ಲಿ ಬಿಜೆಪಿ ಆರೋಪಕ್ಕೆ ತಿರುಗೇಟು ನೀಡಿದ ಅವರು, ಹತಾಶರಾದವರಿಗೆ ನಾಲಗೆಯಲ್ಲಿ ಮೂಳೆ ಇಲ್ಲ. ರವಿಕುಮಾರ್ ಅಲ್ಲ, ಸಿಎಂ ಅವರಿಗೆ ಮಾತನಾಡಲು ಹೇಳಿ ಉತ್ತರ ಕೊಡುತ್ತೇನೆ ಎಂದರು‌.
ರಾಹುಲ್ ಗಾಂಧಿಗೆ ಪ್ರಶ್ನೆ ಬಿಡುಗಡೆ ಮಾಡಲಿ ಉತ್ತರ ಕೊಡುತ್ತೇವೆ. ನಾವು ದಿನಾ ಪ್ರಶ್ನೆ ಕೇಳುತ್ತಿದ್ದೇವೆ ಅವರಿಗೆ, ಮೊದಲು ಅದಕ್ಕೆ ಉತ್ತರ ಕೊಡಲಿ ಎಂದರು.

ಚಾಮರಾಜನಗರ ದುರಂತದ ಸಂತ್ರಸ್ತರ ಜೊತೆಗೆ ಸಂವಾದದ ಸಂದರ್ಭದಲ್ಲಿ ನಾನು ಕಣ್ಣೀರು ಹಾಕಿದ್ದಕ್ಕೆ ವ್ಯಂಗ್ಯ ಮಾಡಲಿ, ಅವರಿಗೆ ಹೃದಯ ಮಾನವೀಯತೆ ಇದ್ದರೆ ತಾನೇ? ಅವರಿಗೆ ನಾಚಿಕೆ ಆಗಬೇಕು. ಚಾಮರಾಜನಗರ ಆಕ್ಸಿಜನ್ ದುರಂತ ಆದಾಗ ಜಿಲ್ಲಾ ಉಸ್ತುವಾರಿ, ಆರೋಗ್ಯ ಸಚಿವರು ಸೌಜನ್ಯಕ್ಕಾಗಿ ಸಂತ್ರಸ್ತರನ್ನು ಭೇಟಿ ಮಾಡಿಲ್ಲ ಎಂದು ಆರೋಪಿಸಿದರು.

ಬಿಜೆಪಿಗರಿಗೆ ಕಣ್ಣು, ಕಿವಿ, ಹೃದಯ ಇಲ್ಲ
ಸಿದ್ದರಾಮಯ್ಯ ಹಾಗೂ ನಾನು ಭೇಟಿ ಮಾಡಿ ಮಾತುಕತೆ ನಡೆಸಿದ್ವಿ, ಅವರ ಸಾವಿನ ಬಗ್ಗೆ ನಮ್ಮಲ್ಲಿ ದಾಖಲೆ ಇದೆ. ಪ್ರತಿ ಮನೆಯಲ್ಲಿ ಕುಳಿತು ಮಾತನಾಡಿದ್ದೇನೆ. ಆ ನೋವು ನನಗೆ ಗೊತ್ತಿದೆ. ಆ ಹೆತ್ತ ತಾಯಿ, ಆ ಮಕ್ಕಳ ಕನಸು ಏನು ಎಂದು ಗೊತ್ತಿದೆ. ಬಿಜೆಪಿಗರಿಗೆ ಕಣ್ಣು ಕಿವಿ ಹೃದಯ ಇಲ್ಲ.