ಮಹಿಳಾ ಧ್ವನಿಯಲ್ಲಿ ಬ್ಲಾಕ್‌ಮೇಲ್‌: ಯುವಕನ ಬಂಧನ

ಹುಣಸೂರು: ಮೊಬೈಲ್‌ ಕರೆ ಮಾಡಿ ಮಹಿಳಾ ಧ್ವನಿಯಲ್ಲಿ ಮಾತನಾಡಿ ಸರಕಾರಿ ಅಧಿಕಾರಿಗಳನ್ನು ಬ್ಲಾಕ್‌ಮೇಲ್‌ ಮಾಡುತ್ತಿದ್ದ ಯುವಕನನ್ನು ನಗರ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ತಾಲೂಕಿನ ಕರ್ಣಕುಪ್ಪೆಯ ನಿವಾಸಿ ಚಿಕ್ಕಮಾದರ ಪುತ್ರ ಗಿರೀಶ್‌(22) ಬಂಧಿತ ಆರೋಪಿ.

ಈತ ಜೂ.15 ರಂದು ಹುಣಸೂರು ಉಪ ವಿಭಾಗಾಧಿಕಾರಿ ವೀಣಾ ಅವರಿಗೆ ಕರೆ ಮಾಡಿ, ತಾನು ಡಾ.ಸುಧಾ ಅಡಿಷನಲ್‌ ಡಿಸಿ ಬೆಂಗಳೂರು ಎಂದು ಪರಿಚಯಿಸಿಕೊಂಡು ಶಾರದಮ್ಮ ಎಂಬುವವರಿಗೆ ಮನೆಯನ್ನು ಮಂಜೂರು ಮಾಡಬೇಕೆಂದು ಸೂಚಿಸಿದ್ದಾನೆ. ಅನುಮಾನಗೊಂಡ ಎಸಿಯವರು ನಗರ ಠಾಣೆ ಪೊಲೀಸರಿಗೆ ಮಾಹಿತಿ ನೀಡಿದ ಮೇರೆಗೆ ಮೊಬೈಲ್‌ ನಂಬರ್‌ ಮೂಲಕ ಗಿರೀಶನನ್ನು ಪತ್ತೆ ಮಾಡಿ ಬಂಧಿಸಿ ವಿಚಾರಣೆಗೊಳಪಡಿಸಿದ್ದು, ತಾನೇ ಕರೆ ಮಾಡಿರುವುದಾಗಿ ಒಪ್ಪಿಕೊಂಡಿದ್ದಾನೆ. ಆತನನ್ನು ನ್ಯಾಯಾಂಗ ಬಂಧನಕ್ಕೊಪ್ಪಿಸಲಾಗಿದೆ ಎಂದು ಎಸ್‌ಐ ಮಹೇಶ್‌ ತಿಳಿಸಿದ್ದಾರೆ.

ಮಹಿಳಾ ಧ್ವನಿಯಲ್ಲಿ ಕರಗತ: ಈತ ಮಹಿಳಾ ಅಧಿಕಾರಿ ರೀತಿಯಲ್ಲೇ ಮಾತನಾಡುವುದನ್ನು ಕರಗತ ಮಾಡಿಕೊಂಡಿದ್ದ. ಹಿರಿಯ ಐಎಎಸ್‌ ಅಧಿಕಾರಿಗಳಿಗೂ ಕರೆ ಮಾಡಿ ಮಹಿಳಾ ಧ್ವನಿಯಲ್ಲಿ ಮಾತನಾಡುವುದು, ಅಲ್ಲದೆ ಎಸಿ, ತಹಸೀಲ್ದಾರ್‌ ಮತ್ತಿತರ ಅಧಿಕಾರಿಗಳನ್ನು ಬ್ಲಾಕ್‌ಮೇಲ್‌ ಮಾಡುತ್ತಿದ್ದ. ಅಲ್ಲದೆ, ಬಹುತೇಕ ರಾಜಕಾರಣಿಗಳು, ಸಿನಿಮಾ ನಟರ ಧ್ವನಿಯನ್ನು ಅನುಕರಣೆ ಮಾಡಿ, ಹಲವರನ್ನು ಯಾಮಾರಿಸಿದ್ದಾನೆಂದು ತಿಳಿದು ಬಂದಿದೆ. ಆದರೆ, ಯಾರೂ ಈ ಬಗ್ಗೆ ದೂರು ನೀಡಿಲ್ಲ. ಇತ್ತೀಚೆಗೆ ತಹಸೀಲ್ದಾರ್‌ಗೂ ಕರೆ ಮಾಡಿ ಧಮ್ಕಿ ಹಾಕಿದ್ದಾನೆ ಎಂದು ತಿಳಿದುಬಂದಿದೆ.