ಬೀರೇಶ್ ಕಬಿನಿ ಮೈಸೂರು
ರಾಷ್ಟ್ರಮಟ್ಟದ ಸ್ವಚ್ಛ ಸರ್ವೇಕ್ಷಣ್ 2018-19ನೇ ಸಾಲಿನ ಅಭಿಯಾನದಲ್ಲಿ ಈ ಬಾರಿ ಮತ್ತೆ ಮೊದಲ ಸ್ಥಾನ ಪಡೆಯಲು ಪಣ ತೊಟ್ಟಿರುವ ಮೈಸೂರು ಮಹಾನಗರ ಪಾಲಿಕೆ, ಹಗಲು- ರಾತ್ರಿ ಎನ್ನದೇ ಸ್ವಚ್ಛತಾ ಕಾರ್ಯವನ್ನು ಸದ್ದಿಲ್ಲದೇ ಚುರುಕುಗೊಳಿಸಿದೆ.
ಜ.4ರಿಂದ ಎರಡು ತಿಂಗಳು ಸ್ವಚ್ಛ ಸರ್ವೇಕ್ಷಣ್ ನಡೆಯಲಿದೆ. ಈ ಸಮೀಕ್ಷೆಯಲ್ಲಿ ಶತಾಯಗತಾಯ ಮೊದಲ ಸ್ಥಾನ ಪಡೆಯಬೇಕೆಂದು ತೀರ್ಮಾನಿಸಿರುವ ಪಾಲಿಕೆ ಹಗಲು ಹಾಗೂ ರಾತ್ರಿ ವೇಳೆ ವಾಣಿಜ್ಯ ಸಂಕಿರಣಗಳಿರುವ ರಸ್ತೆಗಳಲ್ಲಿ ಸ್ವಚ್ಛತಾ ಕಾರ್ಯ ಆರಂಭಿಸಿದೆ.
ರಾಷ್ಟ್ರಾದ್ಯಂತ ಎಲ್ಲಾ ನಗರಗಳನ್ನು ಸ್ವಚ್ಛತೆ ಹಿನ್ನೆಲೆಯಲ್ಲಿ ಕೈಗೊಂಡಿರುವ ಕ್ರಮಗಳು, ಕಸ ವಿಲೇವಾರಿ, ನಾಗರಿಕರು ಅದಕ್ಕೆ ನೀಡುತ್ತಿರುವ ಸ್ಪಂದನೆ, ಶೌಚಾಲಯ ವ್ಯವಸ್ಥೆ, ಪಾಲಿಕೆಗಳಿಂದ ಸ್ವಚ್ಛತೆಗಾಗಿ ನೀಡುತ್ತಿರುವ ಸೇವೆಗಳು ಸೇರಿದಂತೆ ಒಟ್ಟಾಗಿ ನಗರಗಳಲ್ಲಿ ಯಾವ ರೀತಿ ಸ್ವಚ್ಛತೆ ಕಾಪಾಡಲಾಗುತ್ತಿದೆ ಎಂಬುದನ್ನು ಮಾಪನ ಮಾಡಲು 2014ರಿಂದ ರಾಷ್ಟ್ರಮಟ್ಟದಲ್ಲಿ ಸ್ವಚ್ಛ ಸರ್ವೇಕ್ಷಣೆ ಸಮೀಕ್ಷೆ ನಡೆಸಲಾಗುತ್ತಿದೆ.
ಸಮೀಕ್ಷೆಯಲ್ಲಿ ಜಿಲ್ಲೆಯ ಸ್ಥಾನ: ಮೈಸೂರು ಮಹಾನಗರ ಪಾಲಿಕೆ 2014-15, 15-16ರಲ್ಲಿ ನಡೆದ ಸಮೀಕ್ಷೆಯಲ್ಲಿ ದೇಶದಲ್ಲಿಯೇ ಅತ್ಯಂತ ಸ್ವಚ್ಛ ನಗರ ಪಟ್ಟ ಪಡೆದು ದೇಶವೇ ತನ್ನತ್ತ ತಿರುಗಿ ನೋಡುವಂತೆ ಮಾಡಿತು. 16-17ನೇ ಸಾಲಿನಲ್ಲಿ 5ನೇ ಸ್ಥಾನಕ್ಕೆ ಕುಸಿಯಿತು. ಅಲ್ಲದೇ 2017-18ರಲ್ಲಿ 8ನೇ ಸ್ಥಾನಕ್ಕೆ ಕುಸಿದಿದೆ. 3 ಲಕ್ಷದಿಂದ 10 ಲಕ್ಷ ಒಳಪಟ್ಟ ಜನಸಂಖ್ಯೆಯ ನಗರಗಳ ಪೈಕಿ ಮೊದಲ ಸ್ಥಾನ ಪಡೆದಿದೆ. ಹಾಗಾಗಿ ಮೈಸೂರು ಮಹಾನಗರ ಪಾಲಿಕೆ 2018-19ನೇ ಸಾಲಿನಲ್ಲಿ ನಡೆಯುವ ಸಮೀಕ್ಷೆಯಲ್ಲಿ ಮೊದಲ ಸ್ಥಾನ ಪಡೆಯಲೇಬೇಕೆಂದು ಪಣ ತೊಟ್ಟಿದ್ದು ಅದಕ್ಕಾಗಿ ಸಿದ್ಧತೆಗಳನ್ನು ಆರಂಭಿಸಿದೆ.
ಏನೇನು ಸಿದ್ಧತೆ?
ಈಗಾಗಲೇ ಸ್ವಚ್ಛತಾ ಸರ್ವೇಕ್ಷಣೆ-2019ಕ್ಕೆ ಸ್ಪರ್ಧಿಸಲು ಮೈಸೂರು ಮಹಾನಗರ ಪಾಲಿಕೆ ವತಿಯಿಂದ ಅರ್ಜಿ ಸಲ್ಲಿಸಲಾಗಿದೆ. ಅಲ್ಲದೇ ಸ್ವಚ್ಛ ಸರ್ವೇಕ್ಷಣೆ ಅಭಿಯಾನಕ್ಕೆ ಮಾಹಿತಿಗಳನ್ನು ಅಪ್ಲೋಡ್ ಮಾಡುವುದು ಹಾಗೂ ಸಮೀಕ್ಷೆಗೆ ಸಂಬಂಧಿಸಿದ ಇನ್ನಿತರ ವಿಷಯಗಳ ನಿರ್ವಹಣೆಗೆ ಪಾಲಿಕೆ ವಿಶೇಷ ತಂಡ ನಿಯೋಜನೆ ಮಾಡಲಾಗಿದೆ. ಅಂತೆಯೇ ಮೂರು ತಿಂಗಳಿಂದ ಸಮೀಕ್ಷೆಗೆ ಬೇಕಾದ ನಗರದ ಮಾಹಿತಿಗಳನ್ನು ಸ್ವಚ್ಛ ಸರ್ವೇಕ್ಷಣ್ ವೆಬ್ಸೈಟ್ಗೆ ಅಪ್ಲೋಡ್ ಮಾಡಲಾಗುತ್ತಿದೆ. ವಾಣಿಜ್ಯ ಸಂಕಿರಣಗಳ ಬಳಿ ಎಲ್ಲಿಯೂ ಹೆಚ್ಚಾಗಿ ಕಸ ಕಾಣಿಸದಂತೆ ಮುನ್ನೆಚ್ಚರಿಕೆಯಾಗಿ ರಾತ್ರಿ ವೇಳೆ ಸ್ವಚ್ಛತಾ ಕಾರ್ಯ ಆರಂಭಿಸಲಾಗಿದೆ. ನಿತ್ಯವೂ ಕೆಲವು ಕಡೆಗಳಲ್ಲಿ ರಾತ್ರಿ ಸ್ವಚ್ಛತೆ ನಡೆಯುತ್ತಿದೆ. ಸಮೀಕ್ಷೆ ಹಿನ್ನೆಲೆಯಲ್ಲಿ ಮತ್ತಷ್ಟು ಕಟ್ಟುನಿಟ್ಟಾಗಿ ಸ್ವಚ್ಛತೆ ನಡೆಸಲಾಗುತ್ತಿದೆ ಎಂದು ಪಾಲಿಕೆ ಆರೋಗ್ಯಾಧಿಕಾರಿ ನಾಗರಾಜ್ 'ವಿಜಯ ಕರ್ನಾಟಕ'ಕ್ಕೆ ತಿಳಿಸಿದರು.
ಮೌಲ್ಯೀಕರಣದಲ್ಲಿ ಬದಲಾವಣೆ
2018ರಲ್ಲಿ ಸ್ವಚ್ಛ ಸರ್ವೇಕ್ಷಣೆಗೆ 4,000 ಅಂಕಗಳನ್ನು ನಿಗದಿಗೊಳಿಸಲಾಗಿತ್ತು. 2019ರ ಸಮೀಕ್ಷೆಗೆ 5,000 ಅಂಕ ನಿಗದಿಯಾಗಿದೆ. 1000 ಅಂಕಗಳು ಹೆಚ್ಚುವರಿಯಾಗಿವೆ. 2018ರ ಸಮೀಕ್ಷೆಯಲ್ಲಿ ಸೇವಾ ಪ್ರಕ್ರಿಯೆಗೆ ಶೇ.35 ಅಂಕ, ನೇರ ಪರಿಶೀಲನೆಗೆ ಶೇ.30 ಅಂಕ, ನಾಗರಿಕರ ಅಭಿಪ್ರಾಯ ಸಂಗ್ರಹಕ್ಕೆ ಶೇ.35 ಅಂಕ ನಿಗದಿಯಾಗಿತ್ತು. ಈ ಸಾಲಿನಲ್ಲಿ ಸೇವಾ ಪ್ರಕ್ರಿಯೆಗೆ ಶೇ.25 ಅಂಕ, ನೇರ ಪರಿಶೀಲನೆಗೆ ಶೇ.25 ಅಂಕ, ನಾಗರಿಕರ ಅಭಿಪ್ರಾಯ ಸಂಗ್ರಹಕ್ಕೆ ಶೇ.25 ಅಂಕ ನಿಗದಿಯಾಗಿದೆ. ಇದಲ್ಲದೆ ಈ ಬಾರಿ ಹೆಚ್ಚುವರಿಯಾಗಿ ಧೃಡೀಕರಣವೆಂಬ ಹೊಸದೊಂದು ಮೌಲ್ಯಮಾಪನ ಮಾಡಲಾಗುತ್ತಿದ್ದು, ಈ ವಿಭಾಗಕ್ಕೆ ಶೇ.25 ಅಂಕ ನಿಗದಿಯಾಗಿದೆ(ಸ್ಟಾರ್ ರೇಟಿಂಗ್ಗೆ ಶೇ.20, ಒಡಿಎಫ್ಗೆ ಶೇ.5 ಅಂಕ)
ರಾರಯಂಕಿಂಗ್ ನೀಡಿಕೆ ಹೇಗೆ?
1 ಲಕ್ಷಕ್ಕಿಂತ ಕಡಿಮೆ ಹಾಗೂ 1 ಲಕ್ಷಕ್ಕಿಂತ ಹೆಚ್ಚು ಜನಸಂಖ್ಯೆಯ ನಗರಗಳು ಎಂಬ ಎರಡು ವಿಭಾಗದಲ್ಲಿ ರಾಷ್ಟ್ರಮಟ್ಟದ ಸ್ವಚ್ಛ ಸರ್ವೇಕ್ಷಣೆ ಸಮೀಕ್ಷೆ ನಡೆಯಲಿದೆ. ಎರಡೂ ವಿಭಾಗಗಳಲ್ಲಿಯೂ ಸ್ವಚ್ಛ ನಗರ 1ನೇ ರಾರಯಂಕ್, 2ನೇ ರಾರಯಂಕ್, 3ನೇ ರಾರಯಂಕ್ ನೀಡಲಾಗುತ್ತದೆ. ಇದಲ್ಲದೆ ಜಿಲ್ಲಾ ವ್ಯಾಪ್ತಿಯಲ್ಲಿ ವಲಯವಾರು 3 ರಾರಯಂಕ್ ನೀಡಲಾಗುತ್ತದೆ.
9 ವಲಯಗಳಲ್ಲಿ ಸ್ವಚ್ಛತೆ
ಪ್ರತಿ ನಿತ್ಯ ದೇವರಾಜ ಮಾರುಕಟ್ಟೆ ಹಾಗೂ ಸುತ್ತಲ ರಸ್ತೆಗಳಲ್ಲಿ ರಾತ್ರಿ ವೇಳೆ 25ರಿಂದ 30 ಮಂದಿ ಸ್ವಚ್ಛತಾ ಕಾರ್ಯ ನಡೆಸುತ್ತಿದ್ದರು. ಇದೀಗ ಸ್ವಚ್ಛ ಸರ್ವೇಕ್ಷಣೆ ನಡೆಯುವ ಹಿನ್ನೆಯಲ್ಲಿ ಈ ಕಾರ್ಯವನ್ನು ಎಲ್ಲಾ 9 ವಲಯಗಳ ವಾಣಿಜ್ಯ ಕೇಂದ್ರವಿರುವ ರಸ್ತೆಗಳಿಗೆ ವಿಸ್ತರಣೆ ಮಾಡಲಾಗಿದೆ. ಪ್ರತಿ ವಲಯದಲ್ಲಿಯೂ 8ರಿಂದ 10 ಮಂದಿಯಂತೆ ನಗರದಲ್ಲಿ ಒಟ್ಟು 70 ರಿಂದ 80 ಮಂದಿ ಪೌರ ಕಾರ್ಮಿಕರು ರಾತ್ರಿವೇಳೆ ಕೆಲಸ ಮಾಡುತ್ತಿದ್ದಾರೆ.
ರಾಷ್ಟ್ರಮಟ್ಟದಲ್ಲಿ ಕಳೆದ ನಾಲ್ಕು ವರ್ಷಗಳಿಂದ ಸ್ವಚ್ಛ ಸರ್ವೇಕ್ಷಣೆ ಅಭಿಯಾನ ನಡೆಯುತ್ತಿದ್ದು, ಮೈಸೂರು ನಗರ ಎರಡು ಬಾರಿ ದೇಶದ ಮೊದಲ ಸ್ವಚ್ಛನಗರ ಪಟ್ಟ ಪಡೆದುಕೊಂಡಿದೆ. ಕಳೆದ ಬಾರಿಯೂ 3ರಿಂದ 10 ಲಕ್ಷ ಒಳಪಟ್ಟ ಜನಸಂಖ್ಯೆಯ ನಗರಗಳ ಪೈಕಿ ಮೈಸೂರು ನಗರ ಮೊದಲ ಸ್ಥಾನ ಪಡೆದಿದೆ. ಈ ಬಾರಿ ಮೊದಲ ಸ್ಥಾನಕ್ಕೆ ಮರಳುತ್ತೇವೆ.
-ನಾಗರಾಜ್, ನೋಡೆಲ್ ಅಧಿಕಾರಿ, ಸ್ವಚ್ಛ ಸರ್ವೇಕ್ಷಣ್.