ಮೈಸೂರು ಪ್ರವಾಸೋದ್ಯಮಕ್ಕೆ ತಿಂಗಳಿಗೆ 500 ಕೋಟಿ ನಷ್ಟ!

ಐತಿಚಂಡ ರಮೇಶ್‌ ಉತ್ತಪ್ಪ

ಮೈಸೂರು: ಬರ, ನೆರೆ, ಪ್ರವಾಹ, ಭೂಕುಸಿತ ಮುಂತಾದ ಸಂಕಷ್ಟಗಳಿಂದ ಮೈ ಕೊಡವಿಕೊಂಡು ಎದ್ದೇಳುತ್ತಿದ್ದ ಸಂದರ್ಭವೇ ಬಂದೆರಗಿದ ಕೊರೊನಾ ವೈರಸ್ ಎಂಬ ಮಹಾಮಾರಿಗೆ ಪ್ರವಾಸೋದ್ಯಮ ತತ್ತರಿಸಿದ್ದು, ಸದ್ಯಕ್ಕೆ ಚೇತರಿಸಿಕೊಳ್ಳಲಾಗದ ಸ್ಥಿತಿಯಲ್ಲಿದೆ. ತಿಂಗಳಿನಲ್ಲಿ ಸುಮಾರು 500 ಕೋಟಿ ರೂ.ಗಳಿಗೂ ಹೆಚ್ಚು ನಷ್ಟವಾಗಿದೆ ಎಂದು ಅಂದಾಜಿಸಲಾಗಿದೆ.

ಮೂರು ವರ್ಷಗಳಿಂದ ಪ್ರಾಕೃತಿಕ ವಿಕೋಪದಿಂದ ಮೈಸೂರು ಪ್ರವಾಸೋದ್ಯಮದ ಬೆನ್ನು ಮೂಳೆ ಮುರಿದಿದೆ. ಮೊದಲ ವರ್ಷ ಬರದಿಂದ, ಬಳಿಕ ಕೊಡಗು ಸೇರಿದಂತೆ ಮಲೆನಾಡಿನಲ್ಲಿ ಭಾರಿ ಮಳೆ ಹಾಗೂ ಭೂ ಕುಸಿತದಿಂದ, ಕಳೆದ ವರ್ಷ ಉತ್ತರ ಕರ್ನಾಟಕದಲ್ಲಿ ಕೂಡ ಪ್ರವಾಹ ಉಂಟಾಗಿದ್ದರಿಂದ ಪ್ರವಾಸೋದ್ಯಮ ನಲುಗಿತು. ಆರೇಳು ತಿಂಗಳಿನಲ್ಲಿ ಮೆಲ್ಲನೆ ಚೇತರಿಸಿಕೊಳ್ಳುತ್ತಿದ್ದ ಸಂದರ್ಭ ಕೊರೊನಾ ಬಂದೆರಗಿದೆ. ಲಾಕ್‌ಡೌನ್‌ ತೆರವುಗೊಂಡರೂ ಜನರು ಪ್ರವಾಸಕ್ಕೆ ಸದ್ಯ ಬರೋಲ್ಲಎಂಬುದು ಇನ್ನಷ್ಟು ಚಿಂತೆಗೀಡು ಮಾಡಿದೆ.

ಹಾಟ್‌ಸ್ಪಾಟ್‌: ದೇಶದಲ್ಲಿಯೇ ಮೈಸೂರು ಕೊರೊನಾ ವೈರಸ್ ಹಾಟ್‌ಸ್ಪಾಟ್‌. ಪರಿಣಾಮ, ಇನ್ನೂ ಕೆಲವು ತಿಂಗಳು ನಿಯಂತ್ರಣ ಇರುತ್ತದೆ. ಹಾಗಾಗಿ ಮೈಸೂರಿಗೆ ಪ್ರವಾಸ ಬರುವವರ ಸಂಖ್ಯೆಯಲ್ಲಿ ಗಣನೀಯವಾಗಿ ಇಳಿಮುಖವಾಗಬಹುದು ಎನ್ನುವ ಆತಂಕ ಎದುರಾಗಿದೆ.

ಬೆಂಗಳೂರು: ಲಾಕ್‌ಡೌನ್‌ ವೇಳೆ ಪ್ರೇಯಸಿಯ ಕೊಲೆ ಮಾಡಲು ಯತ್ನಿಸಿದ ಪ್ರಿಯಕರ!

ಹೋಟೆಲ್‌ ಉದ್ಯಮಕ್ಕೂ ಕುತ್ತು: ''ಹೋಟೆಲ್‌ಗಳಿಗೆ ಗ್ರಾಹಕರು ಬಾರದಿದ್ದಲ್ಲಿ ನೊಣ ಹೊಡೆಯುವ
ಕೆಲಸ ನಮ್ಮದು ಎಂದು ಹಾಸ್ಯ ಮಾಡಿಕೊಳ್ಳುತ್ತಿದ್ದೆವು. ಇದೀಗ ಅದೇ ಸ್ಥಿತಿ ತಲುಪಿದ್ದೇವೆ,'' ಎಂದು ಮಾಲೀಕರು ಹೇಳುತ್ತಿದ್ದಾರೆ. ಮೈಸೂರು ಜಿಲ್ಲೆಯಲ್ಲಿ 15,000 ಹೋಟೆಲ್‌ಗಳಿವೆ. ಬೇಕರಿ, ಲಾಡ್ಜ್‌, ರೆಸ್ಟೋರೆಂಟ್‌ಗಳಿವೆ. ಇಲ್ಲಿ ಸುಮಾರು 30,000 ಮಂದಿ ನೇರವಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಇವರನ್ನು ಅವಲಂಬಿಸಿದವರು ಸುಮಾರು 60,000 ಜನರು ಗಳಿಕೆ ಇಲ್ಲದೆ ಪರ ದಾಡುವಂತಾಗಿದೆ. ಹೋಟೆಲ್‌ ಉದ್ಯಮವೊಂದರಿಂದಲೇ ಲಕ್ಷಕ್ಕೂ ಹೆಚ್ಚು ಜನರು ಬೇರೆ ದಾರಿ ಕಾಣದೆ ತಲೆ ಮೇಲೆ ಕೈ ಹೊತ್ತು ಕುಳಿತಿದ್ದಾರೆ. ಈ ಉದ್ಯಮಕ್ಕೆ 200 ಕೋಟಿ ರೂ.ಗಳಿಗೂ ಹೆಚ್ಚು ನಷ್ಟವಾಗಿರುವ ಅಂದಾಜಿದೆ.