ಸಾಂಸ್ಕೃತಿಕ ಸಂಭ್ರಮ: ನೃತ್ಯ, ಗಾಯನ ಮೋಡಿ

ಮೈಸೂರು: ಅರಮನೆ ವೇದಿಕೆಯಲ್ಲಿ ಗುರುವಾರ ಆಯೋಜಿಸಿದ್ದ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ 'ಆಪ್ತ ರಕ್ಷಕ' ಸಿನಿಮಾ ಖ್ಯಾತಿಯ ನೃತ್ಯ ಕಲಾವಿದೆ ಲಕ್ಷ್ಮೇ ಗೋಪಾಲಸ್ವಾಮಿ ಅವರು ನಡೆಸಿಕೊಟ್ಟ ನೃತ್ಯ ವೈಭವ ಎಲ್ಲರ ಮೆಚ್ಚುಗೆ ಪಾತ್ರವಾಯಿತು.

ನಾಗಚಂದ್ರಿಕಾ ಭಟ್‌, ರವಿ ಮುರೂರು ತಂಡದ ಗೀತಗಾಯನ ಸಭಿಕರು ತಲೆ ತೂಗುವಂತೆ ಮಾಡಿತು.

ಗಾಯಕಿ ನಾಗಚಂದ್ರಿಕಾ ಭಟ್‌ ಅವರು ಹಾಡಿದ, ಎಂ.ಎನ್‌.ವ್ಯಾಸರಾಯ್‌ ಅವರ ರಚನೆಯ 'ನಿನ್ನ ಕಂಗಳ ಕೊಳದಿ ಬೆಳದಿಂಗಳಿಳಿದಂತೆ, ನನ್ನೆದೆಯ ಕಡಲೇಕೆ ಬೀಗುತಿಹುದು?, ಸೂಜಿಗಲ್ಲಾಗಿರುವೆ ಸೆಳೆದು ನಿನ್ನಯ ಕಡೆಗೆ ಗರಿಗೆದರಿ ಕನಸುಗಳು ಕಾಡುತಿಹುದು' ಭಾವಗೀತೆ ಕೇಳುಗರಿಗೆ ಮುದನೀಡಿತು.

ಗಾಯಕ ರವಿ ಮುರೂರು ಕಂಠದಲ್ಲಿ ಮೂಡಿಬಂದ 'ಕಾಣದ ಕಡಲಿಗೆ ಹಂಬಲಿಸಿದೆ ಮನ' ಭಾವಗೀತೆಗೆ ಪ್ರೇಕ್ಷಕರೂ ದನಿಗೂಡಿಸಿದರು.

ಮೈಸೂರಿನ ಶೃತಿ ವಿದ್ಯಾಸಂಗೀತ ಪಾಠಶಾಲೆಯ ವಿದ್ವಾನ್‌ ಎ.ವಿ.ದತಾತ್ರೇಯ ಅವರು ಒಂದು ತಾಸು ನಡೆಸಿಕೊಟ್ಟ ಶಾಸ್ತ್ರೀಯ ಮ್ಯಾಂಡೋಲಿನ್‌ ವಾದನ ಮತ್ತು ನಗರದ ಸಮೀರ್‌ರಾವ್‌ ಮತ್ತು ವಂಶಿಧರ್‌ ಅವರ ಕೊಳಲು ವಾದನ ಜುಗಲ್‌ಬಂದಿಗೆ ಪ್ರೇಕ್ಷಕರು ತಲೆದೂಗಿದರು.