ಮುಡಾ ವಿರುದ್ಧ ಕಾನೂನು ಹೋರಾಟಕ್ಕೆ ನಿರ್ಧಾರ

ಮೈಸೂರು: ಮೈಸೂರು ನಗರಾಭಿವೃದ್ಧಿ ಪ್ರಾಧಿಕಾರವು ಸಾವಿರಾರು ಅನಾಥ ನಿವೇಶನಗಳನ್ನು ಅಕ್ರಮವಾಗಿ ಪರಭಾರೆ ಮಾಡಿದೆ ಎಂದು ಆರೋಪಿಸಿರುವ ಕರ್ನಾಟಕ ರಾಷ್ಟ್ರ ಸಮಿತಿ, ಈ ಬಗ್ಗೆ ಕಾನೂನು ಹೋರಾಟ ನಡೆಸಲು ಮುಂದಾಗಿದೆ. ಶನಿವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಕರ್ನಾಟಕ ರಾಷ್ಟ್ರ ಸಮಿತಿ ರಾಜ್ಯಾಧ್ಯಕ್ಷ ಜೋಗನ ಹಳ್ಳಿ ಗುರುಮೂರ್ತಿ, ''ನಿವೇಶನಗಳ ಅಕ್ರಮ ಪರಭಾರೆ ಕುರಿತು ಸೂಕ್ತ ಕ್ರಮ ಕೈಗೊಳ್ಳಿ ಎಂದು ಹಲವು ಬಾರಿ ಮನವಿ ಸಲ್ಲಿಸಿದರೂ ಅಧಿಕಾರಿಗಳು ಯಾವುದೇ ಕ್ರಮ ಕೈಗೊಳ್ಳುತ್ತಿಲ್ಲ. ಹಾಗಾಗಿ ನ್ಯಾಯಾ ಲಯದ ಮೊರೆ ಹೋಗಲಾಗುವುದು,'' ಎಂದರು.

ಈ ಹಿಂದೆ ಮುಡಾ ನಡೆಸಿದ ಕಾರಾರ‍ಯಚರಣೆ ಯಲ್ಲಿ, ಮಾಲೀಕ ರಿಲ್ಲದ 26,147 ನಿವೇಶನಗಳು ಪತ್ತೆಯಾಗಿದ್ದವು. ನಂತರ ಇವುಗಳಲ್ಲಿಕೇವಲ 9,508 ಸೈಟ್‌ಗಳು ಮಾತ್ರ ಅನಾಥ ಎಂದು ಮುಡಾ ಹೇಳಿತು. ಇನ್ನುಳಿದ 16,639 ನಿವೇಶನಗಳಿಗೆ ನಕಲಿ ದಾಖಲೆ ಸೃಷ್ಟಿಸಿ ಮಾರಾಟ ಮಾಡಲಾಗಿದೆ ಎಂದು ಆರೋಪಿಸಿದರು. ಅನಾಥ ನಿವೇಶನಗಳು ಎಂದು ಘೋಷಣೆ ಯಾಗಿರುವ 9,508 ಸೈಟ್‌ಗಳಿಗೆ ಇಂದಿನ ಮಾರುಕಟ್ಟೆ ಬೆಲೆ ಸುಮಾರು ನಾಲ್ಕು ಸಾವಿರ ಕೋಟಿ ರೂ.ಆಗಿದೆ. ಸರಕಾರ ಈ ನಿವೇಶನಗಳನ್ನು ಗುರುತಿಸಿ ಸಂರಕ್ಷಿಸಬೇಕು. ಹಾಗೂ ದಾಖಲೆ ಸೃಷ್ಟಿಸಿ ಮಾರಾಟ ಮಾಡಿರುವ 16,639 ನಿವೇಶನಗಳಿಗೆ ಸಂಬಂಧಿಸಿದಂತೆ ತನಿಖೆ ನಡೆಸಬೇಕು ಎಂದರು.

ಸುದ್ದಿಗೋಷ್ಠಿಯಲ್ಲಿಕರ್ನಾಟಕ ರಾಷ್ಟ್ರ ಸಮಿತಿ ಕಾರ್ಯದರ್ಶಿ ಶ್ರೀನಿವಾಸ್‌, ಜಿಲ್ಲಾಧ್ಯಕ್ಷ ಸಿ.ಎಸ್‌.ವೆಂಕಟೇಶ್‌, ಜಿಲ್ಲಾಕಾರ‍್ಯದರ್ಶಿ ಕೆ.ಎ. ಸೋಮ ಸುಂದರ್‌, ಆರ್‌ಟಿಐ ಕಾರ‍್ಯಕರ್ತ ಎಂ.ಡಿ.ಆದೀಶ್‌ ಸಾಗರ್‌ ಹಾಗೂ ಇತರರು ಇದ್ದರು.