ಆ್ಯಪ್ನಗರ

ಮೈಸೂರು ಪಾಲಿಕೆ ಚುನಾವಣೆ ಘೋಷಣೆ: ರಾಜಕೀಯ ಚಟುವಟಿಕೆ ಬಿರುಸು

ಮೈಸೂರು ಮಹಾನಗರ ಪಾಲಿಕೆಗೆ ಚುನಾವಣೆ ಘೋಷಣೆಯಾದ ಬೆನ್ನಿಗೆ ರಾಜಕೀಯ ಚಟುವಟಿಕೆ ಗರಿಗೆದರಿದೆ.

Vijaya Karnataka 10 Aug 2018, 5:00 am
ಮೈಸೂರು: ಮೈಸೂರು ಮಹಾನಗರ ಪಾಲಿಕೆಗೆ ಚುನಾವಣೆ ಘೋಷಣೆಯಾದ ಬೆನ್ನಿಗೆ ರಾಜಕೀಯ ಚಟುವಟಿಕೆ ಗರಿಗೆದರಿದೆ.
Vijaya Karnataka Web declaration of elections political activity blaster
ಮೈಸೂರು ಪಾಲಿಕೆ ಚುನಾವಣೆ ಘೋಷಣೆ: ರಾಜಕೀಯ ಚಟುವಟಿಕೆ ಬಿರುಸು


ಮೈಸೂರು ಪಾಲಿಕೆ ವಾರ್ಡ್‌ಗಳ ಮೀಸಲು ನಿಗದಿಯಾದ ನಂತರ ಚುನಾವಣೆಗೆ ನಿಲ್ಲಲು ಸಾಧ್ಯವಾಗದಿರುವ ಪಾಲಿಕೆ ಸದಸ್ಯರು ತಮ್ಮ ಬೆಂಬಲಿಗರನ್ನು ಕಣಕ್ಕೆ ಇಳಿಸಲು ಕಸರತ್ತು ನಡೆಸುತ್ತಿದ್ದಾರೆ.

ಮೈಸೂರು ಪಾಲಿಕೆಯ ಚುನಾವಣೆ ಸಂಬಂಧ ಮೀಸಲು ಮತ್ತು ಕ್ಷೇತ್ರ ಮರುವಿಂಗಡಣೆ ಪ್ರಶ್ನಿಸಿ ಸಲ್ಲಿಸಲಾದ ಅರ್ಜಿ ವಜಾಗೊಂಡಿರುವ ಕಾರಣ ಈಗಾಗಲೇ ಪ್ರಕಟಗೊಂಡಿರುವ ಮೀಸಲು ಪಟ್ಟಿಯಂತೆ ಚುನಾವಣೆ ನಡೆಯಲಿದೆ. ಹಾಲಿ ಪಾಲಿಕೆ ಸದಸ್ಯರ ಪೈಕಿ ಮೀಸಲು ಬದಲಾಗದೆ ಇರುವ ಕೆಲವು ಸದಸ್ಯರು ಮರು ಆಯ್ಕೆ ಬಯಸಿ ಸ್ಪರ್ಧೆ ಮಾಡಲು ಬಯಸಿದರೆ, ಮೀಸಲು ಬದಲಾಗಿ ಹಾಲಿ ವಾರ್ಡ್‌ನಿಂದ ಚುನಾವಣೆಗೆ ಸ್ಪರ್ಧಿಸಲು ಆಗದ ಸದಸ್ಯರು ತಮ್ಮ ಬೆಂಬಲಿಗರನ್ನು ಕಣಕ್ಕೆ ಇಳಿಸಲು ಸಿದ್ಧತೆ ನಡೆಸಿದ್ದಾರೆ.

ಗೆಲ್ಲುವ ತಂತ್ರ ಶುರು: ಮೈಸೂರು ಪಾಲಿಕೆಗೆ ಆ.31ರಂದು ಚುನಾವಣೆ ನಡೆಯಲಿದ್ದು ಚುನಾವಣೆ ಗೆಲ್ಲಲು ಪಾಲಿಕೆ ಸದಸ್ಯರು ರಣತಂತ್ರ ರೂಪಿಸತೊಡಗಿದ್ದಾರೆ. ಕಳೆದ ಬಾರಿ 12ನೇ ವಾರ್ಡ್‌ನಿಂದ ಸ್ಪರ್ಧಿಸಿ ಮೇಯರ್‌ ಆಗಿದ್ದ ಬಿ.ಎಲ್‌.ಭೈರಪ್ಪ ಅವರಿಗೆ ಈ ಬಾರಿ ಅವರ ವಾರ್ಡ್‌ನಿಂದ ಸ್ಪರ್ಧಿಸಲು ಮೀಸಲು ಅಡ್ಡಿಯಾಗಿದೆ. ಹೊಸದಾಗಿ ರಚನೆಗೊಂಡಿರುವ 62, 63ನೇ ವಾರ್ಡ್‌ಗಳಲ್ಲಿ ತಮ್ಮ ಬೆಂಬಲಿಗರನ್ನು ಕಣಕ್ಕೆ ಇಳಿಸಲು ಅವರು ತಯಾರಿ ನಡೆಸಿದ್ದಾರೆ.

''ನಾನು 21 ವರ್ಷಗಳ ಕಾಲ ವಾರ್ಡ್‌ ಪ್ರತಿನಿಧಿಸಿದ್ದೆ. ಈಗ ನಾನು ಪ್ರತಿನಿಧಿಸುತ್ತಿದ್ದ ವಾರ್ಡ್‌ 62, 63ನೇ ವಾರ್ಡ್‌ ಆಗಿ ಮರುವಿಂಗಡನೆಗೊಂಡಿದ್ದು ಎಸ್‌ಸಿ ಮಹಿಳೆಯರಿಗೆ ಮೀಸಲಾಗಿದೆ. ನಾನು ಬೇರೆ ಕಡೆ ಸ್ಪರ್ಧಿಸುವ ಇಂಗಿತ ಹೊಂದಿಲ್ಲ. ಕೆಲಸಗಳನ್ನು ಪೂರ್ಣಗೊಳಿಸುವ ನಿಟ್ಟಿನಲ್ಲಿ ನನ್ನ ಬೆಂಬಲಿಗರನ್ನೇ ಚುನಾವಣೆಗೆ ನಿಲ್ಲಿಸಲು ತಯಾರಿ ಮಾಡಿಕೊಂಡಿದ್ದೇನೆ'' ಎನ್ನುತ್ತಾರೆ ಬಿ.ಎಲ್‌.ಭೈರಪ್ಪ.

ಈ ಬಾರಿಯ ಚುನಾವಣೆಯಲ್ಲಿ ಮಹಿಳೆಯರಿಗೆ ಶೇ.50ರಷ್ಟು ಮೀಸಲು ಕಲ್ಪಿಸಲಾಗಿದೆ. ಇದರಿಂದ ಕಳೆದ ಬಾರಿಗಿಂತ ಹೆಚ್ಚು ಪ್ರಾತಿನಿಧ್ಯ ಮಹಿಳೆಯರಿಗೆ ಈ ಬಾರಿ ಸಿಗಲಿದೆ. ಮೀಸಲಿನಿಂದ ಸ್ಪರ್ಧಿಸಲು ಆಗದೆ ಇರುವ ಹಾಲಿ ಸದಸ್ಯರು ತಮ್ಮ ಬೆಂಬಲಿಗರನ್ನು ಆಯಾ ವಾರ್ಡ್‌ನ ಮೀಸಲಿಗೆ ಅನುಗುಣವಾಗಿ ಕಣಕ್ಕೆ ಇಳಿಸಲು ಸಿದ್ಧತೆ ನಡೆಸಿದ್ದಾರೆ.

ಮರು ಆಯ್ಕೆಗೆ ಒಲವು: ಹಾಲಿ ಸದಸ್ಯರ ಪೈಕಿ ಕೆಲವರಿಗೆ ವಾರ್ಡ್‌ ಮೀಸಲು ಚುನಾವಣೆಗೆ ಸ್ಪರ್ಧಿಸಲು ಅಡ್ಡಿ ಉಂಟು ಮಾಡಿಲ್ಲ. ಇಂತವರ ಪೈಕಿ ಕೆಲ ಸದಸ್ಯರು ಮತ್ತೆ ಕಣಕ್ಕೆ ಇಳಿಯಲು ಒಲವು ತೋರಿದ್ದಾರೆ.

''ನಾನು ಪ್ರತಿನಿಧಿಸಿದ್ದ 6ನೇ ವಾರ್ಡ್‌ ಈಗ 55ನೇ ವಾರ್ಡ್‌ ಆಗಿ ಮರು ವಿಂಗಡಣೆಗೊಂಡಿದೆ. ಇಲ್ಲಿ ಈ ಹಿಂದಿನಂತೆಯೇ ಮೀಸಲು ಸಾಮಾನ್ಯ ವರ್ಗಕ್ಕೆ ನಿಗದಿಯಾಗಿದೆ. ಮರು ವಿಂಗಡನೆ ಬಳಿಕ ಅಂತಹÜ ಬದಲಾವಣೆ ಆಗಿಲ್ಲ. ಈ ಬಾರಿ ಮತ್ತೆ ಸ್ಪರ್ಧಿಸಲು ಬಯಸಿದ್ದೇನೆ,'' ಎಂದು ಹಾಲಿ ಸದಸ್ಯ ಮ.ವಿ.ರಾಮಪ್ರಸಾದ್‌ ತಿಳಿಸಿದ್ದಾರೆ. ಈ ಬಾರಿ ಚುನಾವಣೆಗೆ ಮೇಯರ್‌, ಉಪ ಮೇಯರ್‌ ಆಗಿದ್ದವರು ಮತ್ತೆ ಸ್ಪರ್ಧೆ ಮಾಡಬಾರದು ಎಂದು ಕೆಲ ಸದಸ್ಯರು ಅಭಿಪ್ರಾಯ ಪಟ್ಟಿದ್ದಾರೆ. ಹೊಸ ನಾಯಕರನ್ನು ಬೆಳೆಸಲು ಅವಕಾಶ ನೀಡಬೇಕು ಎನ್ನುವುದು ಅವರ ವಾದ.

''ನಾನು ಪ್ರತಿನಿಧಿಸುತ್ತಿದ್ದ 35ನೇ ವಾರ್ಡ್‌ ಈಗ 41ನೇ ವಾರ್ಡ್‌ ಆಗಿದೆ. ಸಾಮಾನ್ಯ ವರ್ಗಕ್ಕೆ ಮೀಸಲಿದ್ದ ಈ ವಾರ್ಡ್‌ ಈಗ ಬಿಸಿ (ಬಿ)ಗೆ ಮೀಸಲಾಗಿದೆ. ನಾನು ಈ ಬಾರಿ ಚುನಾವಣೆಗೆ ಸ್ಪರ್ಧಿಸುತ್ತಿಲ್ಲ. ಮೇಯರ್‌, ಉಪ ಮೇಯರ್‌ ಆಗಿದ್ದವರು ಚುನಾವಣೆಗೆ ಮತ್ತೆ ಸ್ಪರ್ಧೆ ಮಾಡಬಾರದು. ಹೊಸಬರಿಗೆ ಅವಕಾಶ ಕಲ್ಪಿಸಬೇಕಿದೆ,'' ಎನ್ನುತ್ತಾರೆ ಮಾಜಿ ಮೇಯರ್‌ ಎಂ.ಜೆ.ರವಿಕುಮಾರ್‌.

ಆ.13ರಂದು ಜಿಲ್ಲಾಧಿಕಾರಿಗಳು ಚುನಾವಣಾ ಅಧಿಸೂಚನೆ ಹೊರಡಿಸಲಿದ್ದಾರೆ. ಆ.20 ನಾಮಪತ್ರ ಸಲ್ಲಿಸಲು ಕೊನೆಯ ದಿನಾಂಕವಾಗಿದ್ದು ಇಷ್ಟರೊಳಗೆ ಪಕ್ಷಗಳು ಯಾರಿಗೆ ಟಿಕೆಟ್‌ ನೀಡಲಿವೆ ಎನ್ನುವುದು ಸ್ಪಷ್ಟವಾಗಿ ಗೊತ್ತಾಗಲಿದೆ.

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ