ವಿದೇಶಿಗರ ವಿಶೇಷ ಯೋಗಾಸಕ್ತಿ

ಮೈಸೂರು : ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿ ನಡೆದ 4ನೇ ಅಂತಾರಾಷ್ಟ್ರೀಯ ಯೋಗ ದಿನಾಚರಣೆ ದಿನ ಸುಮಾರು 100ಕ್ಕೂ ಹೆಚ್ಚು ವಿದೇಶಿಗರು ಕನ್ನಡಿಗರೊಂದಿಗೆ ಬೆರೆತು ಯೋಗಾಸನ ಮಾಡಿ, ಸೆಲ್ಫಿ ಕ್ಲಿಕ್ಕಿಸಿಕೊಂಡು ಸಂಭ್ರಮಿಸಿದರು.

ಮುಂಜಾನೆ 5ಕ್ಕೆ ರೇಸ್‌ಕೋರ್ಸ್‌ ಮೈದಾನಕ್ಕೆ ಆಗಮಿಸಿ ಪ್ರತ್ಯೇಕವಾಗಿ ವಿದೇಶಿಗರಿಗಾಗಿ ನಿಯೋಜಿಸಿದ್ದ ಸ್ಥಳದಲ್ಲಿ ಸೇರಿ ಯೋಗ ಆರಂಭಿಸಿದರು. ಹಾಲೆಂಡ್‌, ಯುರೋಪ್‌, ಜರ್ಮನಿ, ನೇಪಾಳ, ಸೌತ್‌ ಆಫ್ರಿಕಾ ಸೇರಿದಂತೆ ಇನ್ನೂ ಅನೇಕ ವಿದೇಶಗಳಿಂದ ವಿದ್ಯಾಭ್ಯಾಸಕ್ಕಾಗಿ ಮೈಸೂರು ವಿವಿ ಹಾಗೂ ಜೆಎಸ್‌ಎಸ್‌ ವಿವಿ ವಿದ್ಯಾರ್ಥಿಗಳು ಮಾತ್ರವಲ್ಲದೇ, ಯೋಗ ತರಬೇತಿಯನ್ನು ಪಡೆಯಲು ಆಗಮಿಸಿದ್ದ ಸುಮಾರು 20 ಮಂದಿ ಭಾಗವಹಿಸಿದ್ದರು. ಎಸ್‌ಜಿವೈಎಸ್‌ಎಸ್‌ ಶ್ರೀ ಪತಾಂಜಲಿ ಯೋಗ ಶಿಕ್ಷಣ ಸಂಸ್ಥೆಯಿಂದ 40 ಮಂದಿ ಯೋಗ ತರಬೇತಿ ವಿದ್ಯಾರ್ಥಿಗಳು ಸೇರಿದಂತೆ ವಿವಿಧ ಸಂಘ, ಸಂಸ್ಥೆಗಳಲ್ಲಿ ತರಬೇತಿ ಪಡೆಯುವವರಲ್ಲದೆ ಸ್ವ ಆಸಕ್ತಿಯಿಂದಲೂ ಅನೇಕರು ಯೋಗದಲ್ಲಿ ಭಾಗವಹಿಸಿದ್ದರು.

ಯೋಗ ಎಂದರೆ ದೇಶಿಯರಿಗಿಂತ ವಿಶೇಷ ಆಸಕ್ತಿ ಹೊಂದಿರುವ ವಿದೇಶಿಗರು ಕೇವಲ ಯೋಗ ತರಬೇತಿಗಳಿಗೆ ತೆರಳುವುದಲ್ಲದೆ, ಅಂತಾರಾಷ್ಟ್ರೀಯ ಯೋಗ ದಿನಾಚರಣೆಯಲ್ಲಿ ಭಾಗವಹಿಸುವ ಮೂಲಕವು ಯೋಗದ ಮೇಲಿನ ಆಸಕ್ತಿಯನ್ನು ಸಾಕ್ಷಿಕರಿಸಿದರು.

ನಾಡಗೀತೆ, ರಾಷ್ಟ್ರಗೀತೆಯ ಗುನುಗು: ಯೋಗ ಮಾಡುವ ಮುನ್ನಾ ನಾವೆಲ್ಲರೂ ಒಂದೇ ಎಂಬುದನ್ನು ಸಾರಲು ಹಾಡಲಾದ ನಾಡಗೀತೆಗೆ ಹಾಗೂ ಕೊನೆಯಲ್ಲಿ ಹಾಡಲಾದ ರಾಷ್ಟ್ರಗೀತೆಗೆ ವಿದೇಶಿಗರು ಧ್ವನಿಗೂಡಿಸಿದ್ದು ನೋಡುಗರಲ್ಲಿ ಆಶ್ವರ್ಯವನ್ನುಂಟು ಮಾಡಿತ್ತು. ಕನ್ನಡಿಗರಷ್ಟೇ ಸ್ಪಷ್ಟವಾಗಿ ಪದಗಳನ್ನು ಉಚ್ಚರಿಸುವ ಮೂಲಕ ಎಲ್ಲರೂ ಎದ್ದು ಗೌರವವನ್ನು ಸೂಚಿಸಿದರು.


ಎರಡು ವರ್ಷದಿಂದ ಯೋಗ ಕಲಿಯುತ್ತಿದ್ದೇನೆ. ಆರೋಗ್ಯ ಚೆನ್ನಾಗಿದ್ದು, ಏಕಾಗ್ರತೆಯನ್ನು ಗಳಿಸಿಕೊಂಡಿದ್ದೇನೆ. ಮನಸ್ಸಿಗೆ ಒಂದು ರೀತಿಯ ನೆಮ್ಮದಿ, ಎಲ್ಲರೊಟ್ಟಿಗೆ ಯೋಗ ಮಾಡುವುದರಿಂದ ಸಂಬಂಧಗಳು ಮತ್ತಷ್ಟು ಬೆಸೆದುಕೊಳ್ಳುತ್ತದೆ. ನಿತ್ಯ ಬೆಳಗ್ಗೆ 6ಕ್ಕೆ ಯೋಗ ಮಾಡುತ್ತೇನೆ.

-ಆ್ಯನಿ, ಯುಎಸ್‌ಎ ಕೆನಡಿಯನ್‌ ಯೂನಿವರ್ಸಿಟಿ ವಿದ್ಯಾರ್ಥಿ

ಪೋಷಕರು ಭಾರತೀಯರು ನಾನು ಅಮೇರಿಕಾದಲ್ಲಿ ಬೆಳೆದಿದ್ದು, ಆದರೆ ಇಂದು ಭಾರತಕ್ಕೆ ಬಂದು ಯೋಗ ಕಲಿಯುತ್ತಿರುವುದು ನನಗೆ ಸಂತೋಷವಾಗುತ್ತಿದೆ. ಮೊದಲ ಬಾರಿಗೆ ಎಲ್ಲರೊಡಗೂಡಿ ಯೋಗ ಮಾಡಿರುವುದು ತುಂಬಾ ಖುಷಿಯಾಯಿತು. ಎಲ್ಲರೂ ಒಟ್ಟಿಗೆ ಯೋಗ ಮಾಡಲು ತುಂಬಾ ಉತ್ತಮ ವ್ಯವಸ್ಥೆ ಮಾಡಲಾಗಿದೆ.

-ಸಮೀರ್‌ನಂದ್‌ (20)

ನಿರ್ವಾಣ ಶಾಲೆಯಲ್ಲಿ 8 ತಿಂಗಳಿಂದ ಯೋಗ ಕಲಿಯುತ್ತಿದ್ದೇನೆ. ಉತ್ತಮ ಯೋಗ ತರಬೇತಿ ದೊರಕುತ್ತಿದ್ದು, ಮೈಸೂರಿನಲ್ಲಿ ಯೋಗ ಕಲಿಯುತ್ತಿರುವುದು ಸಂತೋಷ ನೀಡಿದೆ.

-ಜೇನಾ, ಇರಾನ್‌

ಮೊದಲ ಬಾರಿಗೆ ಯೋಗದಲ್ಲಿ ಭಾಗವಹಿಸಿರುವುದು ಖುಷಿಯ ಜಕತೆಗೆ ಯೋಗದ ನಂತರ ನೆಮ್ಮದಿಯ ಭಾವ ಮೂಡಿದೆ. ಹಾಗಾಗಿ ಯೋಗವನ್ನು ಹೀಗೆ ಮುಂದುವರಿಸಿಕೊಂಡು ಹೋಗುತ್ತೇನೆ.

-ಟೇನ್ಜಿ ಡೆಡಾನ್‌, ಟಿಬೆಟ್‌ ಕ್ಯಾಂಪ್‌, ಕೊಳ್ಳೇಗಾಲ