ಫ್ಲ್ಯಾಟ್‌ ಮಾರಾಟದಲ್ಲಿ ವಂಚನೆ: ಬಂಧನ

ಮೈಸೂರು: ಫ್ಲ್ಯಾಟ್‌ಗಳನ್ನು ಮಾರಾಟ ಮಾಡುವಾಗ ಗ್ರಾಹಕರಿಗೆ ವಂಚಿಸಿದ್ದಾರೆ ಎಂಬ ಆರೋಪದಡಿ ಖಾಸಗಿ ಡೆವಲಪರ್‌ ಮತ್ತು ಕನಸ್ಟ್ರಕ್ಷ ನ್‌ ಕಂಪನಿಯೊಂದರ ಮುಖ್ಯಸ್ಥನನ್ನು ವಿವಿ ಪುರಂ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ನಗರದ ಪಾಠಕ್‌ ಡೆವಲಪರ್ಸ್‌ ಪ್ರೈವೇಟ್‌ ಲಿಮಿಟೆಡ್‌ ವ್ಯವಸ್ಥಾಪಕ ನಿರ್ದೇಶಕ ಶ್ರೀಹರಿ ಪಾತಕ್‌ ಬಂಧಿತರಾಗಿದ್ದು, ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.

ಇವರು ಹೆಬ್ಬಾಳು ಬಳಿ ನಿರ್ಮಿಸಿರುವ ಅಪಾರ್ಟ್‌ಮೆಂಟ್‌ನಲ್ಲಿ 5-2 ಸಂಖ್ಯೆಯ ಫ್ಲ್ಯಾಟ್‌ ಕೊಡಿಸುವುದಾಗಿ ತಮಿಳುನಾಡು ಮೂಲದ ಟಿ.ವಿ.ರಾಜು ಎಂಬವರಿಂದ ಮುಂಗಡ ಹಣ ಪಡೆದು ಅಗ್ರಿಮೆಂಟ್‌ ಮಾಡಿಕೊಟ್ಟು, ನಿರ್ಮಾಣ ಪೂರ್ಣಗೊಂಡ ನಂತರ ಆ ಫ್ಲ್ಯಾಟ್‌ ಅನ್ನು ರಾಜು ಅವರ ಪತ್ನಿ ಕೆ.ಆರ್‌.ಜನ್ನಾಂಬಿಕ ಹೆಸರಿಗೆ ಸೇಲ್‌ ಡೀಡ್‌ ಮಾಡಿಕೊಟ್ಟಿದ್ದರು. ಆದರೆ, ಅದೇ ಫ್ಲ್ಯಾಟ್‌ಅನ್ನು 2016ರಲ್ಲಿಯೇ ಮಿಥುನ್‌ ಎಂಬವವರಿಗೂ ಸೇಲ್‌ ಡೀಡ್‌ ಮಾಡಿದ್ದಾರೆ. ಅಲ್ಲದೇ, ಅದನ್ನು ಕನ್ನಿಕಾ ಪರಮೇಶ್ವರಿ ಕೋ-ಆಪರೇಟಿವ್‌ ಬ್ಯಾಂಕಿನಲ್ಲಿ ಅಡವಿಟ್ಟು ವಂಚಿಸಿದ್ದಾರೆ ಎಂದು ರಾಜು ಅವರು ತಿಂಗಳ ಹಿಂದೆ ವಿವಿ ಪುರಂ ಠಾಣೆಗೆ ದೂರು ನೀಡಿದ್ದರು.

ಪ್ರಕರಣ ದಾಖಲಿಸಿಕೊಂಡಿದ್ದ ಪೊಲೀಸರು ಸೋಮವಾರ ಕೆಆರ್‌ಎಸ್‌ ಬಳಿ ತೋಟದ ಮನೆಯಲ್ಲಿ ಆರೋಪಿಯನ್ನು ಬಂಧಿಸಿದ್ದಾರೆ.