ಕಬಿನಿ ಡ್ಯಾಂ ಒಳಹರಿವು ಇಳಿಕೆ

ಎಚ್‌.ಡಿ.ಕೋಟೆ : ತಾಲೂಕಿನ ಬೀಚನಹಳ್ಳಿ ಗ್ರಾಮದಲ್ಲಿರುವ ಕಬಿನಿ ಜಲಾಶಯದ ಒಳ ಹರಿವಿನ ಪ್ರಮಾಣ 30 ಸಾವಿರ ಕ್ಯೂಸೆಕ್‌ಗೆ ಇಳಿದಿದ್ದು, ಜಲಾಶಯದಿಂದ 25 ಸಾವಿರ ಕ್ಯೂಸೆಕ್‌ ನೀರನ್ನು ಮಾತ್ರ ಹೊರ ಬಿಡಲಾಗುತ್ತಿದೆ.

ಜಲಾಶಯದ ಗರಿಷ್ಠ ಮಟ್ಟ 2284 ಅಡಿಯಾಗಿದ್ದು, ಪ್ರಸ್ತುತ ಜಲಾಶಯದ ಮಟ್ಟ 2282.50 ಅಡಿ ತಲುಪಿದೆ. ಜಲಾಶಯ ವ್ಯಾಪ್ತಿಯ ಕೇರಳ ರಾಜ್ಯದ ವೈನಾಡು ಜಿಲ್ಲೆಯಲ್ಲಿ ಕಳೆದ ಮೂರು ದಿನಗಳಿಂದ ಮಳೆ ಕಡಿಮೆಯಾಗಿದ್ದು, ಜಲಾಶಯಕ್ಕೆ ಒಳ ಹರಿವು ಇಳಿಕೆಯಾಗಿದೆ.

ನುಗು ಜಲಾಶಯ: ಸರಗೂರು ತಾಲೂಕಿನ ನುಗು ಜಲಾಶಯದಿಂದ ನೀರು ಬಿಡುವುದನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಲಾಗಿದೆ. ಈ ಜಲಾಶಯದ ಒಳಹರಿವು ಸಂಪೂರ್ಣ ನಿಂತಿದೆ.

ಜಲಾಶಯದ ಗರಿಷ್ಠ ಮಟ್ಟ 110 ಅಡಿ ಆಗಿದ್ದು, ಜಲಾಶಯದಲ್ಲಿ 108 ಅಡಿ ನೀರಿದೆ.

ನಿಟ್ಟುಸಿರು: ಒಳ ಹರಿವು ಕಡಿಮೆ ಆಗುತ್ತಿರುವ ಹಿನ್ನೆಲೆಯಲ್ಲಿ ತಾಲೂಕಿನ ಕಬಿನಿ, ತಾರಕಾ ಜಲಾಶಯ ಹಾಗೂ ಸರಗೂರು ತಾಲೂಕಿನ ಬೀರವಾಳು ಗ್ರಾಮದ ನುಗು ಜಲಾಶಯದ ಅಧಿಕಾರಿಗಳು, ಪೊಲೀಸರು ಮತ್ತು ತಾಲೂಕು ಆಡಳಿತ ನಿಟ್ಟುಸಿರು ಬಿಟ್ಟಿದೆ. ಕಳೆದ 2 ತಿಂಗಳಿಂದ ಸತತವಾಗಿ ಪ್ರವಾಹದ ಹಿನ್ನೆಲೆಯಲ್ಲಿ ಎಲ್ಲಾ ಅಧಿಕಾರಿಗಳು ಹಾಗೂ ಪೊಲೀಸರು ಸತತವಾಗಿ ಕೆಲಸ ನಿರ್ವಹಿಸಿದ್ದರು.

ಸಂಚಾರ ಮುಕ್ತ: ಮಾದಾಪುರ-ಕೆ.ಬೆಳತ್ತೂರು ರಸ್ತೆ ನಡುವೆ ಇರುವ ಮಾದಾಪುರ ಸೇತುವೆ, ಹೊಮ್ಮರಗಳ್ಳಿ ಬಳಿ ಇರುವ ಸೇತುವೆ ನೀರಿನಿಂದ ಮುಕ್ತವಾಗಿದ್ದು, ಸಾರ್ವಜನಿಕ ಸಂಚಾರಕ್ಕೆ ಮುಕ್ತವಾಗಿದೆ. ಮಳೆಯಿಂದ ಆಗಿರುವ ನಷ್ಟದ ಬಗ್ಗೆ ಗ್ರಾಮ ಲೆಕ್ಕಿಗರು ಮತ್ತು ಕೃಷಿ ಇಲಾಖೆ ಸಿಬ್ಬಂದಿ ವರದಿ ಸಿದ್ಧಪಡಿಸುತ್ತಿದ್ದಾರೆ.

ಎಚ್‌.ಡಿ. ಕೋಟೆ ತಾಲೂಕಿನಾದ್ಯಂತ ಕಳೆದ ಎರಡು ತಿಂಗಳಿಂದ ಸತತವಾಗಿ ಸುರಿದಿದ್ದ ಮಳೆ, ಇಂದು ಬೆಳಗಿನಿಂದ ಬಿಡುವು ನೀಡಿದೆ.