ಬೀರೇಶ್‌ ಕಬಿನಿ ಮೈಸೂರು
ಮೈಸೂರು ಪಾಕ್‌ ಕರ್ನಾಟಕದ ಹೆಮ್ಮೆಯ ಸಿಹಿಯೇ! ಅದರ ಭೌಗೋಳಿಕ ಸೂಚ್ಯಂಕದ (ಜಿಯಾಗ್ರಾಫಿಕಲ್‌ ಇಂಡಿಕೇಷನ್‌-ಜಿಐ) ಹೆಮ್ಮೆ, ಶ್ರೇಯಸ್ಸು, ಕಿರೀಟ, ಕೀರ್ತಿ ಎಲ್ಲವೂ ಮೈಸೂರಿನದ್ದೇ. ಅದು ಹೇಗೆ ತಾನೆ ತಮಿಳುನಾಡಿಗೆ ಸೇರುತ್ತದೆ?
- ಸಾಮಾಜಿಕ ಜಾಲತಾಣದಲ್ಲಿ ಇಂಥದ್ದೊಂದು ಬಿಸಿ ಬಿಸಿ ಚರ್ಚೆ ಶುರುವಾಗಿದೆ.
ಬಾಯಲ್ಲಿ ನೀರೂರಿಸುವ ರಸಗುಲ್ಲಾ ಯಾರಿಗೆ ಸೇರಿದ್ದು ಎಂಬುದರ ಕುರಿತು ಒರಿಸ್ಸಾ ಹಾಗೂ ಪಶ್ಚಿಮ ಬಂಗಾಳದ ನಡುವೆ ವಾದ-ಪ್ರತಿವಾದ ನಡೆದು, ಅದು ಬಂಗಾಳದ ಪಾಲಾದ ಬೆನ್ನಲ್ಲಿಯೇ ಇತ್ತ ದಕ್ಷಿಣ ಭಾರತದಲ್ಲೂ ಮೈಸೂರು ಪಾಕ್‌ ಜಿಐ ವಾರಸುದಾರಿಕೆ ಕುರಿತು ಟ್ವಿಟರ್‌ ಮತ್ತು ಫೇಸ್‌ಬುಕ್‌ನಲ್ಲಿ ಚರ್ಚೆ ಆರಂಭಗೊಂಡಿದೆ. ಕಾವೇರಿ ವಿವಾದ ತಲೆದೋರಿದಾಗಲೆಲ್ಲಾ, ನೀರಿಗಾಗಿ ಸದಾ ವಾದ-ಪ್ರತಿವಾದದಲ್ಲಿ ಮುಳುಗುವ ಉಭಯ ರಾಜ್ಯದವರು ಈಗ ಮೈಸೂರು ಪಾಕದ ಅಗ್ಗಳಿಕೆಗಾಗಿ ಮುಂದಾಗಿದ್ದಾರೆ. 1835ರಲ್ಲಿ ಲಾರ್ಡ್‌ ಮೆಕಾಲೆ ಟಿಪ್ಪಣಿ ಬರೆದಿದ್ದಾರೆ ಎಂಬ ತಪ್ಪು ಮಾಹಿತಿಯ ಆಧಾರದ ಮೇಲೆ ಮೈಸೂರು ಪಾಕ್‌ ಯಾರಿಗೆ ಸೇರಬೇಕು ಎಂಬ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಕಾರಣವಾಗಿತ್ತು. ಆದರೆ, ಕನ್ನಡಿಗರು ಮಾತ್ರ ಅದರ ಹೆಸರೇ ಮೈಸೂರು ಪಾಕ್‌. ಅಂದ ಮೇಲೆ, ಮೈಸೂರಿನ ಭೌಗೋಳಿಕತನವಲ್ಲದೇ ಬೇರೆ ಇನ್ಯಾವ ಊರಿನ ಅಗ್ಗಳಿಕೆ ನೀಡಲು ಸಾಧ್ಯ ಎಂದು ತಿರುಗೇಟು ನೀಡಿದ್ದಾರೆ.
ಮೆಕಾಲೆ ಹೇಳುವುದೇನು?
ಬ್ರಿಟಿಷ್‌ ಅಧಿಕಾರಿ ಲಾರ್ಡ್‌ ಮೆಕಾಲೆ 1853ರ ಫೆಬ್ರವರಿ 2ರಂದು ಪಾರ್ಲಿಮೆಂಟ್‌ ಉ್ದದೇಶಿಸಿ ಮಾತನಾಡುವಾಗ ಈ ಸಿಹಿಯ ಬಗ್ಗೆ ಪ್ರಸ್ತಾಪಿಸಿದ್ದಾರೆ ಎಂಬ ಕುರಿತು ಆನ್‌ಲೈನ್‌ನಲ್ಲಿ ಚರ್ಚೆಗಳು ನಡೆದಿವೆ. ಹೀಗಾಗಿ ತಮಿಳುನಾಡಿನದ್ದೇ ಮೈಸೂರು ಪಾಕ್‌ ಎಂಬ ವಾದ ಕೂಡ ಜೋರಾಗಿ ಸಾಗಿತ್ತು.
ಮೈಸೂರು ಪಾಕ್‌ ಇತಿಹಾಸ
ಆದರೆ, ಮೈಸೂರಿಗರು ಈ ವಾದವನ್ನು ನಿರಾಕರಿಸುತ್ತಾರೆ. ಮೈಸೂರು ಪಾಕ್‌ ಮೊದಲು ತಯಾರಾಗಿದ್ದು ಮೈಸೂರು ಅರಮನೆ ಅಡುಗೆಮನೆಯಲ್ಲಿ. ನಾಲ್ವಡಿ ಕೃಷ್ಣರಾಜ ಒಡೆಯರ್‌ ಆಳ್ವಿಕೆಯ ಸಂದರ್ಭದಲ್ಲಿ ಅರಮನೆಯ ಅಡುಗೆ ಭಟ್ಟರಾದ ಕಕಸುರ ಮಾದಪ್ಪ ಎಂಬುವರು ಈ ಸಿಹಿಯನ್ನು ತಯಾರಿಸಿದರು. ಮಾದಪ್ಪ ಅವರು ಕಡಲೆ ಹಿಟ್ಟಿನ ಜತೆ ತುಪ್ಪ ಮತ್ತು ಸಕ್ಕರೆ ಮಿಶ್ರಣದ ಪಾಕ ತಯಾರಿಸಿ ಅದನ್ನು ಬೇಕೆಂದ ಆಕಾರಕ್ಕೆ ತುಂಬಿದರು. ಒಣಗಿದ ನಂತರ ಅದು ಮಿಠಾಯಿ ರೀತಿಯಲ್ಲಿ ಕಂಡುಬಂತು. ಅದರ ಹೆಸರು ಕೇಳಿದಾಗ, ಮಾದಪ್ಪನವರು ಮನಸ್ಸಿನಲ್ಲಿ ಏನೂ ಆಲೋಚಿಸದ ಅವರು ಇದು ಕೇವಲ 'ಮೈಸೂರು ಪಾಕ್‌' ಎಂದು ಕರೆದರು. (ಪಾಕ್‌ ಅಥವಾ ಪಾಕ, ನಿಖರವಾಗಿ, ಸಂಸ್ಕೃತ ಮತ್ತು ಇತರೆ ಭಾರತೀಯ ದೇಶೀಯ ಭಾಷೆಗಳಲ್ಲಿ ಸಿಹಿ ಎಂದು ಅರ್ಥ ಕೊಡುತ್ತದೆ). ಇದು ಸಾಂಪ್ರದಾಯಿಕವಾಗಿ ಮದುವೆ ಮತ್ತು ದಕ್ಷಿಣ ಭಾರತದ ಇತರೆ ಹಬ್ಬಗಳಲ್ಲಿ ಬಡಿಸಲಾಗುತ್ತದೆ.
ದಕ್ಷಿಣ ಭಾರತದ ಸಮೃದ್ಧ ಸಿಹಿ ತಿನಿಸಾದ ಮೈಸೂರು ಪಾಕ್‌ ತಯಾರಿಸಲು ಹೇರಳ ಪ್ರಮಾಣದ ಶುದ್ಧ ತುಪ್ಪ, ಸಕ್ಕರೆ, ಕಡಲೆ ಹಿಟ್ಟು, ಏಲಕ್ಕಿಯನ್ನು ಬಳಸಲಾಗುತ್ತದೆ. ದೇವರಾಜ ಮಾರುಕಟ್ಟೆಗೆ ಹೊಂದಿಕೊಂಡಂತೆ ಇರುವ ಗುರು ಸ್ವೀಟ್ಸ್‌, ಸಯ್ಯಾಜಿರಾವ್‌ ರಸ್ತೆಯಲ್ಲಿರುವ ಇಂದ್ರ ಭವನ್‌, ಮಹಾಲಕ್ಷ್ಮಿ ಸ್ವೀಟ್ಸ್‌ನಲ್ಲಿ ಮೈಸೂರು ಪಾಕವನ್ನು ತಯಾರಿಸಲಾಗುತ್ತದೆ.
--------------------
ರುಚಿಕರ ಸಿಹಿಯಾದ ಮೈಸೂರು ಪಾಕ್‌ ಹೆಸರೇ ಸೂಚಿಸುವಂತೆ ಮೈಸೂರಿನದ್ದೇ. ಹಾಗಾಗಿ, ಅದರ ಭೌಗೋಳಿಕ ಸೂಚ್ಯಂಕದ (ಜಿಐ) ಶ್ರೇಯಸ್ಸು ನಮ್ಮದೇ. ಒಂದು ವೇಳೆ ಮೈಸೂರು ಪಾಕದ ಜಿಐ ಶ್ರೇಯಸ್ಸು ನಮಗೆ ಸೇರಿಲ್ಲದಿದ್ದರೆ, ಖಂಡಿತ ಜಿಲ್ಲಾಡಳಿತದ ವತಿಯಿಂದಲೇ ಅದರ ಹಕ್ಕನ್ನು ಚಲಾಯಿಸಲಾಗುವುದು.
- ಡಿ. ರಂದೀಪ್‌, ಜಿಲ್ಲಾಧಿಕಾರಿ, ಮೈಸೂರು
---------------------
ನಮಗೆ ತಿಳಿದಿರುವಂತೆ ಮೈಸೂರು ಪಾಕ್‌ ಮೈಸೂರಿನ ಅರಮನೆಯಲ್ಲಿ ಜನ್ಮ ತಳೆದ ಸಿಹಿ. ಈ ಬಗ್ಗೆ ಯಾರು ಏನೇ ಸಮರ್ಥನೆ ನೀಡಿದರೂ ಇದೇ ಸತ್ಯ ಸಂಗತಿ. ಮೈಸೂರು ಸಂಸ್ಥಾನದ ಇತಿಹಾಸದ ಕುರಿತ ಹಲವು ಪುಸ್ತಕಗಳಲ್ಲಿಯೂ ಈ ವಿಚಾರ ದಾಖಲಾಗಿದೆ. ಹಾಗಾಗಿ ಈ ಬಗ್ಗೆ ವಿಶೇಷವಾಗಿ ಚರ್ಚಿಸುವ ಅಗತ್ಯವೇ ಇಲ್ಲ.
-ಶಿವಕುಮಾರ್‌, ವ್ಯವಸ್ಥಾಪಕ ನಿರ್ದೇಶಕರು, ಮಹಾಲಕ್ಷ್ಮಿಸ್ವೀಟ್ಸ್‌.