ಮೈಸೂರು: ವಿವಿಧ ಅಪರಾಧ ಪ್ರಕರಣಗಳ ಮೇಲೆ ಇತ್ತೀಚೆಗಷ್ಟೇ ಪೊಲೀಸರ ಬಲೆಗೆ ಬಿದ್ದು, ನ್ಯಾಯಾಂಗ ಬಂಧನಕ್ಕೆ ಒಳಪಟ್ಟಿರುವ ಸ್ಯಾಂಟ್ರೋ ರವಿ ವಿಚಾರ ಬಗೆದಷ್ಟು ವಿಸ್ತರಿಸುತ್ತಿದೆ. ಗುಜರಾತ್‌ನಲ್ಲಿ ಆತನನ್ನು ಸೆರೆ ಹಿಡಿದ ಪೋಲಿಸರಿಗೆ ಆತ ಹೇಗೆ ಯಾಮಾರಿಸಲು ಪ್ರಯತ್ನ ಮಾಡಿದ್ದ ಅನ್ನುವ ಅಂಶ ಬಹಿರಂಗವಾಗಿದೆ.
ಮಾಸದ ಗಾಯದ ಗುರುತು:
ಹಿಂದಿಯಲ್ಲಿ ಮಾತನಾಡಿ ಪೊಲೀಸರಿಗೆ ಮತ್ತೊಮ್ಮೆ ಚಳ್ಳೆಹಣ್ಣು ತಿನ್ನಿಸಲು ಮುಂದಾಗಿದ್ದ ಕೆ.ಎಸ್.ಮಂಜುನಾಥ್‌ ಅಲಿಯಾಸ್‌ ಸ್ಯಾಂಟ್ರೋ ರವಿಯನ್ನು ಪತ್ತೆ ಮಾಡಲು ಆತನ ಹಣೆಯ ಮೇಲಿದ್ದ ಹಳೆಯ ಗಾಯದ ಗುರುತು ನೆರವಾಗಿದೆ. ಕರ್ನಾಟಕದಿಂದ ಆಚೆಗೆ ಆತ ಓಡಾಟ ನಡೆಸಿರುವ ಸುಳಿವು ಆಧರಿಸಿ, ಇತರೆ ರಾಜ್ಯಗಳ ಪೊಲೀಸರಿಗೂ ಆರೋಪಿಯ ಪತ್ತೆಗಾಗಿ ಮಾಹಿತಿ ರವಾನಿಸಲಾಗಿತ್ತು. ಫೋಟೋ ಹಿಡಿದುಕೊಂಡು ಹೊರಟ ಪೊಲೀಸರು, ತಮ್ಮ ಮುಂದೆಯೇ ಇದ್ದ ಶಂಕಿತ ವ್ಯಕ್ತಿಯ ಮುಖ ಚರ್ಯೆಯನ್ನು ಸೂಕ್ಷ್ಮವಾಗಿ ಗಮನಿಸಿದ್ದರು.
ಸ್ಯಾಂಟ್ರೋ ರವಿ ಹಣೆಯ ಎಡ ಭಾಗದಲ್ಲಿದ್ದ ಗಾಯದ ಗುರುತು ಪ್ರಮುಖ ಸುಳಿವು ನೀಡಿತ್ತು. 20 ವರ್ಷದ ಹಿಂದಿನ ಫೋಟೋ ಹಾಗೂ ತಲೆಗೆ ವಿಗ್ ಹಾಕಿದಾಗ ತೆಗಿದಿರೋ ಫೋಟೋ ಹಾಗೂ ಪೊಲೀಸರು ವಶಕ್ಕೆ ಪಡೆದ ಬಳಿಕ ತೆಗೆದಿರುವ ಫೋಟೋವನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದ್ದಂತೆ ಆತನೇ ಹುಡುಕುತ್ತಿದ್ದ ಆರೋಪಿ ಎಂಬುದು ಖಚಿತವಾಗಿದೆ. ಗುಜರಾತ್‌ನಲ್ಲಿ ಪೊಲೀಸರಿಗೆ ಮೊದಲು ಈತನೇ ಸ್ಯಾಂಟ್ರೋ ರವಿ ಅನ್ನೋ ಬಗ್ಗೆ ಅನುಮಾನ ವ್ಯಕ್ತವಾಗಿತ್ತು.
ಕಾಮನ್‌ ಮ್ಯಾನ್‌ ಆದ, ವಿಗ್ ತೆಗೆದ!
ಬೊಂಬಾಟಾಗಿ ಹಲವು ಕಡೆ ಫೋಟೋಗೆ ಪೋಸ್ ಕೊಟ್ಟಿರೋ ಸ್ಯಾಂಟ್ರೋ ರವಿ, ಯಾವಾಗ ಸಿಕ್ಕಿಹಾಕಿಕೊಳ್ಳುತ್ತೇನೆ ಎಂಬ ಆತಂಕ ಆರಂಭವಾಯಿತೋ ಆಗ ಧರಿಸಿದ್ದ ವಿಗ್ ತೆಗೆದಿದ್ದ. ಹಾಗೆಯೇ ಮೀಸೆ ಸಹ ತೆಗೆದಿದ್ದ. ಅಲ್ಲದೇ ತೀರಾ ಸಾಮಾನ್ಯ ವ್ಯಕ್ತಿ ಧರಿಸುವ ಬಟ್ಟೆಗಳಲ್ಲಿ ಓಡಾಡಿದ್ದ. ಜೀವನ ಶೈಲಿಯನ್ನು ಬದಲಿಸಿಕೊಂಡು, ಯಾರಿಗೂ ಅನುಮಾನ ಬಾರದ ರೀತಿ ಹಿಂದಿ ಭಾಷೆಯನ್ನಷ್ಟೇ ಮಾತಾಡುತ್ತಿದ್ದ ಎಂಬ ಮಾಹಿತಿ ಪೊಲೀಸ್ ಮೂಲಗಳಿಂದ ತಿಳಿದು ಬಂದಿದೆ.
ನ್ಯಾಯಾಂಗ ಬಂಧನ..
ಸದ್ಯ ಸ್ಯಾಂಟ್ರೋ ರವಿಯನ್ನು 14 ದಿನಗಳ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ. ಆರೋಪಿಗಳನ್ನು 6ನೇ ಹೆಚ್ಚುವರಿ ಜಿಲ್ಲಾ ಸೆಷನ್ಸ್ ನ್ಯಾಯಾಲಯಕ್ಕೆ ಹಾಜರುಪಡಿಸಬೇಕಿತ್ತು. ಎರಡನೇ ಶನಿವಾರ ನ್ಯಾಯಾಲಯದ ಕಲಾಪ ಇಲ್ಲದ ಕಾರಣ ನ್ಯಾಯಾಧೀಶರ ನಿವಾಸಕ್ಕೆ ಕರೆದುಕೊಂಡು ಹೋಗಿ ಹಾಜರು ಪಡಿಸಲಾಗಿತ್ತು. ಬಿಗಿ ಭದ್ರತೆಯಲ್ಲಿ ಪೊಲೀಸರು ವಾಲ್ಮೀಕಿ ನಗರದ ರಸ್ತೆಯಲ್ಲಿರುವ ನ್ಯಾಯಾಧೀಶರ ನಿವಾಸಕ್ಕೆ ಆರೋಪಿಗಳನ್ನು ಕರೆತಂದಿದ್ದರು. ನ್ಯಾಯಾಧೀಶರು ಎಲ್ಲ ಆರೋಪಿಗಳನ್ನು 14 ದಿನ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.