ಕರಾಮುವಿವಿ ಸಭೆ ರದ್ದು

ಮೈಸೂರು : ಕರ್ನಾಟಕ ರಾಜ್ಯ ಮುಕ್ತ ವಿಶ್ವವಿದ್ಯಾನಿಲಯದಲ್ಲಿ ಮಂಜೂರಾತಿ ಹುದ್ದೆಗಳು ಖಾಲಿ ಇಲ್ಲದಿದ್ದರೂ ಅನಧಿಕೃತವಾಗಿ 22 ಹುದ್ದೆಗಳನ್ನು ಸೃಜಿಸುವುದಲ್ಲದೆ ಆ ಹುದ್ದೆಗೆ ಅನರ್ಹರನ್ನು ನೇಮಕ ಮಾಡಿರುವ ವಿಚಾರದ ಬಗ್ಗೆ ಚರ್ಚಿಸಲು ಶನಿವಾರ ಕರೆಯಲಾಗಿದ್ದ ಕರ್ನಾಟಕ ರಾಜ್ಯ ಮುಕ್ತ ವಿವಿ ವ್ಯವಸ್ಥಾಪನ ಮಂಡಳಿ ಸಭೆ ರದ್ದಾಗಿದೆ.

ಉನ್ನತ ಶಿಕ್ಷಣ ಇಲಾಖೆ ಆಡಳಿತಕ್ಕೆ ಒಳಪಟ್ಟಿರುವ ವಿಶ್ವವಿದ್ಯಾನಿಲಯಗಳ ಕಾರ್ಯಕಾರಿ ಸಮಿತಿ, ಪರಿಷತ್‌ ಹಾಗೂ ಆಡಳಿತ ಮಂಡಳಿಗೆ ಆಯಾ ವಿವಿಗಳ ಅಧಿನಿಯಮಗಳಲ್ಲಿನ ಅವಕಾಶದನ್ವಯ ಸರಕಾರದಿಂದ ನಾಮ ನಿರ್ದೇಶನಗೊಂಡಿರುವ ಸದಸ್ಯರನ್ನು ರಾಜ್ಯ ಸರಕಾರ ಜು. 17 ರಂದು ಹಿಂಪಡೆದಿದೆ. ಹಾಗಾಗಿ ಶನಿವಾರ ನಡೆಯಬೇಕಿದ್ದ ಸಭೆಗೆ ಸದಸ್ಯರ ಕೋರಂ ಕೊರತೆ ಉಂಟಾದ ಕಾರಣ ಸಭೆಯನ್ನು ರದ್ದುಪಡಿಸಲಾಗಿದೆ.

ಸಭೆಯಲ್ಲಿ ಕರಾಮುವಿವಿಲ್ಲಿ ನಿಯಮ ಬಾಹಿರವಾಗಿ 22 ಮಂದಿ ಉಪನ್ಯಾಸಕರನ್ನು ನೇಮಕ ಮಾಡಿರುವ ವಿಚಾರವನ್ನು ಚರ್ಚಿಸಬೇಕಿತ್ತು. ಸಭೆ ರದ್ದಾದ ಕಾರಣ ಈ ವಿಚಾರದ ಬಗ್ಗೆ ಚರ್ಚೆಯು ಮತ್ತಷ್ಟು ವಿಳಂಬವಾಗಲಿದೆ. ಸರಕಾರ ಇದೀಗ ಹಿಂಪಡೆದಿರುವ ನಾಮನಿರ್ದೇಶಿತರ ಜಾಗಕ್ಕೆ ಬೇರೆಯವರನ್ನು ನೇಮಕ ಮಾಡುವ ವರೆಗೆ ಈ ವಿಷಯದ ಬಗ್ಗೆ ಚರ್ಚಿಸಲು ಸಾಧ್ಯವಾಗದ ಸನ್ನಿವೇಶ ನಿರ್ಮಾಣವಾಗಿದೆ.