ರೈತರಿಗೆ ಹಾಲಿನ ದರ 1.10 ರೂ. ಹೆಚ್ಚಳ

ಮೈಸೂರು: ಮೈಸೂರು ಜಿಲ್ಲಾ ಸಹಕಾರಿ ಹಾಲು ಉತ್ಪಾದಕರ ಸಂಘ ಗಳ ಒಕ್ಕೂಟವು ಬೇಸಿಗೆಯಲ್ಲಿ ಹಾಲು ಉತ್ಪಾದಕರಿಗೆ ಇನ್ನೂ ಹೆಚ್ಚಿನ ಉತ್ತೇಜನ ನೀಡಲು ಹಾಲಿನ ಖರೀದಿ ದರವನ್ನು ಪ್ರತಿ ಕೆಜಿಗೆ 1 ರೂ. 10 ಪೈಸೆ ಹೆಚ್ಚಿಸಿದೆ.

ಒಕ್ಕೂಟವು ಸಂಘಗಳಿಂದ ಖರೀದಿಸುವ ಶೇ.3.5 ಜಿಡ್ಡಿನಂಶ ಹಾಗೂ ಶೇ.8.5 ಎಸ್‌ಎನ್‌ಎಫ್‌ ಇರುವ ಪ್ರತಿ ಕೆಜಿ ಹಾಲಿಗೆ 32 ರೂ.25 ಪೈಸೆ ಆಗಲಿದೆ. ಸಂಘಗಳಿಂದ ಉತ್ಪಾದಕರಿಗೆ ಪಾವತಿಸುವ ಶೇ.3.5 ಜಿಡ್ಡಿನಂಶ ಹಾಗೂ ಶೇ.8.5 ಎಸ್‌ಎನ್‌ಎಫ್‌ ಇರುವ ಪ್ರತಿ ಕೆಜಿ ಹಾಲಿಗೆ 30 ರೂ. ದರ ನಿಗದಿಪಡಿಸಲಾಗಿದೆ. ಹಾಲು ಉತ್ಪಾದಕರ ಸಂಘಗಳಿಗೆ ಹಾಗೂ ಸಂಘಗಳಿಂದ ಉತ್ಪಾದಕರಿಗೆ ನೀಡುವ ದರ ವ್ಯತ್ಯಾಸವು ಪ್ರತಿ ಕೆಜಿಗೆ 2.25 ರೂ.ಇದೆ. ಇದರಲ್ಲಿಸಂಘಗಳ ಮಾರ್ಜಿನ್‌ 70 ಪೈಸೆ ನಿಗದಿಪಡಿಸಲಾಗಿದೆ.

ಸಂಘದಲ್ಲಿಕಾರ್ಯನಿರ್ವಹಿಸುವ ಸಿಬ್ಬಂದಿ ವೇತನ ಪರಿಷ್ಕರಿಸಲು ಈ ಹಿಂದೆ ಇದ್ದ ಮಾರ್ಜಿನ್‌ ಹಣ 60 ಪೈಸೆಯಿಂದ 70 ಪೈಸೆಗೆ ಹೆಚ್ಚಿಸಲು ಒಕ್ಕೂಟ ತೀರ್ಮಾನಿಸಿದೆ. ಒಕ್ಕೂಟದ ಅಧ್ಯಕ್ಷ ಎಸ್‌. ಸಿದ್ದೇಗೌಡ ಅವರ ಅಧ್ಯಕ್ಷತೆಯಲ್ಲಿಶನಿವಾರ ನಡೆದ ಆಡಳಿತ ಮಂಡಳಿ ಸಭೆಯಲ್ಲಿಈ ಕುರಿತು ನಿರ್ಧಾರ ಕೈಗೊಳ್ಳಲಾಗಿದೆ.

ಮಾರುಕಟ್ಟೆಯಲ್ಲಿಗ್ರಾಹಕರು ಖರೀದಿಸುವ ಹಾಲಿನ ದರದಲ್ಲಿಯಾವುದೇ ಏರಿಕೆಯಾಗಿಲ್ಲ. ಆಡಳಿತ ಮಂಡಳಿ ಸದಸ್ಯರಾದ ಎ.ಟಿ. ಸೋಮಶೇಖರ್‌, ಕೆ.ಜಿ.ಮಹೇಶ್‌, ಕೆ.ಈರೇಗೌಡ, ಕೆ.ಎಸ್‌.ಕುಮಾರ್‌, ಕೆ.ಸಿ. ಬಲರಾಮ್‌, ಪಿ.ಎಂ.ಪ್ರಸನ್ನ, ಎಸ್‌.ಸಿ.ಅಶೋಕ್‌, ಲೀಲಾ, ದಾಕ್ಷಾಯಿಣಿ, ವ್ಯವಸ್ಥಾಪಕ ನಿರ್ದೇಶಕ ಡಿ.ಅಶೋಕ್‌ ಸಭೆಯಲ್ಲಿದ್ದರು.