ಬಿಜೆಪಿಯಿಂದ ಹಣದ ಆಮಿಷ ಆರೋಪ

ಹುಣಸೂರು: ಹುಣಸೂರು ಉಪ ಚುನಾವಣೆಯಲ್ಲಿ ಬಿಜೆಪಿಯಿಂದ 'ಬಾಡಿ ಶಾಪಿಂಗ್‌' ನಡಿತಾ ಇದೆ. ಬರೀ ವೋಟ್‌ ಅಲ್ಲ, ದುಡ್ಡಿನಿಂದ ಮನುಷ್ಯರನ್ನೇ ಖರೀದಿ ಮಾಡುತ್ತಿದ್ದಾರೆಂದು ಕಾಂಗ್ರೆಸ್‌ ಅಭ್ಯರ್ಥಿ ಎಚ್‌.ಪಿ. ಮಂಜುನಾಥ್‌ ನೇರ ಆರೋಪ ಮಾಡಿದರು.

ಹುಣಸೂರು ನಗರದ ವಿವಿಧೆಡೆ ಪ್ರಚಾರದ ನಡುವೆ ಪತ್ರಕರ್ತರೊಂದಿಗೆ ಮಾತನಾಡಿ, ''ವಿಶ್ವನಾಥ್‌ ಮತ್ತವರ ಕಡೆಯವರು ನಮಗೆ ಮತ ಕೊಡಿಸಿ ಎಂದು ಒಬ್ಬೊಬ್ಬ ಮುಖಂಡರಿಗೆ 5 ರಿಂದ 10 ಲಕ್ಷ ಹಣ ಕೊಟ್ಟು ಕೊಂಡುಕೊಳ್ಳುತ್ತಿದ್ದಾರೆ. ಮೈಸೂರು ಮುಡಾ ಪ್ರಾಧಿಕಾರದ ಅಧ್ಯಕ್ಷ ಸ್ಥಾನ ಮಾರಾಟ ಮಾಡಿ ಆ ಹಣ ಇಲ್ಲಿಗೆ ತಂದಿದ್ದಾರೆ. ಆಯೋಗ ಹಂಚಬೇಕಿದ್ದ ಮತದಾರರ ಪಟ್ಟಿಯನ್ನು ಅಧಿಕಾರಿಗಳಿಂದ ಖರೀದಿ ಮಾಡಿದ್ದಾರೆ. ಅಧಿಕಾರಿಗಳನ್ನು ಬಳಸಿಕೊಂಡು ಮತದಾರರ ಮನೆಗೆ ಕೈ ಹಾಕಿದ್ದಾರೆ. ಈ ಬಗ್ಗೆ ತನಿಖೆಯಾಗಬೇಕು,'' ಎಂದು ಒತ್ತಾಯಿಸಿದರು. ''ವಿಶ್ವನಾಥರು ಹುಣಸೂರು ತಾಲೂಕನ್ನೇ ಪಾತಾಳಕ್ಕೆ ತಳ್ಳಿದ್ದಾರೆ. ಕಳೆದ ಚುನಾವಣೆ ಯಲ್ಲಿಅವರ ಅನುಭವ, ಜ್ಞಾನ ನೋಡಿ ಜನ ಮತ ಹಾಕಿದ್ದರು. ಈ ಚುನಾವಣೆಯಲ್ಲಿ ಅದೆಲ್ಲಾ ಮಾಯವಾಗಿದೆ, ''ಎಂದು ಮಂಜುನಾಥ್‌ ಛೇಡಿಸಿದರು.