ಮೈಸೂರು-ಬೆಂಗಳೂರು ನಡುವಿನ E-ಬಸ್ ಗಳಿಗೆ ಜನ ಫಿದಾ; ಬಸ್ ಗಳ ಸಂಖ್ಯೆ 8ಕ್ಕೇರಿಕೆ

ಮೈಸೂರು: ಬೆಂಗಳೂರು - ಮೈಸೂರು ನಡುವೆ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಯು (ಕೆಎಸ್ ಆರ್ ಟಿಸಿ) ಹೊಸದಾಗಿ ಶುರು ಮಾಡಿದ್ದ ವಿದ್ಯುತ್ ಚಾಲಿತ ಬಸ್ ಗಳ ಸೇವೆಗೆ ಭಾರೀ ಡಿಮ್ಯಾಂಡ್ ಬಂದಿದೆ. ಫೇಮ್ ಯೋಜನೆಯಡಿ, ಜಾರಿಗೊಳಿಸಲಾಗಿದ್ದ ಈ ಸೇವೆಯನ್ನು ಹೈದರಾಬಾದ್ ಮೂಲದ ಸೇವೆಗೆ ಗುತ್ತಿಗೆ ನೀಡಲಾಗಿತ್ತು. ಜನರ ಡಿಮ್ಯಾಂಡ್ ಮೇರೆಗೆ ಆರಂಭದಲ್ಲಿ ಇದ್ದ ಒಂದು ಬಸ್ ಸೇವೆಯನ್ನು ಈಗ ಎಂಟು ಬಸ್ಸುಗಳಿಗೆ ವಿಸ್ತರಿಸಲಾಗಿದೆ.ಜ. 16ರಂದು ಎರಡೂ ನಗರಗಳ ನಡುವಿನ ಎಕ್ಸ್ ಪ್ರೆಸ್ ಹೈವೇಯಲ್ಲಿ ಒಂದು ವಿದ್ಯುತ್ ಚಾಲಿತ ಬಸ್ಸನ್ನು ಪ್ರಾಯೋಗಿಕವಾಗಿ ಬಿಡಲಾಗಿತ್ತು. ಮೈಸೂರಿನ ಸಬ್ ಅರ್ಬನ್ ಬಸ್ ನಿಲ್ದಾಣದಿಂದ ಹೊರಡುತ್ತಿದ್ದ ಬಸ್ಸು, ಬೆಂಗಳೂರಿನ ಮೈಸೂರು ರಸ್ತೆಯಲ್ಲಿರುವ ಸ್ಯಾಟಲೈಟ್ ಬಸ್ ನಿಲ್ದಾಣದಲ್ಲಿ ಒಂದು ನಿಲುಗಡೆ ಕೊಟ್ಟು ಆನಂತರ, ಬೆಂಗಳೂರಿನ ಮೆಜೆಸ್ಟಿಕ್ ಬಸ್ ನಿಲ್ದಾಣದಲ್ಲಿ ತನ್ನ ಪ್ರಯಾಣವನ್ನು ಅಂತ್ಯಗೊಳಿಸುತ್ತದೆ.


ಮೊದಲಿಗೆ ಒಂದು ಬಸ್ಸನ್ನು ಪ್ರಾಯೋಗಿಕವಾಗಿ ಬಿಟ್ಟಾಗ ಆರಂಭದಿಂದಲೇ ಈ ಬಸ್ಸುಗಳಲ್ಲಿ ಸಂಚರಿಸಲು ಪ್ರಯಾಣಿಕರು ಒಲವು ತೋರಿದರು. ಪ್ರತಿ ಟ್ರಿಪ್ ನಲ್ಲಿ ಎಲ್ಲಾ ಆಸನಗಳೂ ಭರ್ತಿಯಾಗುತ್ತಿದ್ದವು. ಪ್ರಯಾಣಿಕರು ಸೀಟುಗಳಲಿಲ್ಲದೆ ಅನಿವಾರ್ಯವಾಗಿ ಅನ್ಯ ಎಕ್ಸ್ ಪ್ರೆಸ್ ಬಸ್ಸುಗಳಲ್ಲಿ ಪ್ರಯಾಣ ಬೆಳೆಸುತ್ತಿದ್ದರು.

ಇದನ್ನು ಗಮನಿಸಿದ ಸಂಸ್ಥೆಯು, ಡಿಮ್ಯಾಂಡಿಗೆ ತಕ್ಕಂತೆ ಬಸ್ಸುಗಳ ಸಂಖ್ಯೆಯನ್ನು ಹೆಚ್ಚಳ ಮಾಡುತ್ತಾ ಬಂದಿದ್ದು, ಮೇ 21ರ ಹೊತ್ತಿಗೆ ಈ ರೂಟ್ ನಲ್ಲಿ ಒಟ್ಟು 8 ವಿದ್ಯುತ್ ಚಾಲಿತ ಬಸ್ಸುಗಳು ಸಂಚರಿಸುತ್ತಿವೆ. ಪ್ರತಿ ಬಸ್ ಪ್ರತಿ ಟ್ರಿಪ್ ನಲ್ಲಿ ಎಲ್ಲಾ ಬಸ್ಸುಗಳಲ್ಲಿಯೂ ಶೇ. 100ರಷ್ಟು ಸೀಟುಗಳು ಭರ್ತಿಯಾಗುತ್ತಿವೆ. ಪ್ರತಿದಿನ 1,032ಕ್ಕೂ ಹೆಚ್ಚು ಪ್ರಯಾಣಿಕರು, ಎರಡೂ ನಗರಗಳ ನಡುವೆ ಸಂಚರಿಸುತ್ತಿದ್ದಾರೆ. ತಿಂಗಳಿಗೆ ಸರಾಸರಿ 31 ಸಾವಿರ ಪ್ರಯಾಣಿಕರು ಈ ಬಸ್ಸುಗಳಲ್ಲಿ ಪ್ರಯಾಣಿಸುತ್ತಿದ್ದಾರೆ.

ರಸ್ತೆ ಗುಂಡಿ ಮುಚ್ಚಲು ಇನ್ನೆಷ್ಟು ವರ್ಷ ಬೇಕು ಹೇಳಿ? ಮೈಸೂರು ಪಾಲಿಕೆಗೆ ಜನರ ಪ್ರಶ್ನೆ

ಟಿಕೆಟ್ ದರ ಹಾಗೂ ಟೈಮಿಂಗ್

ಸದ್ಯಕ್ಕೆ ಈ ಬಸ್ಸುಗಳಲ್ಲಿ ಒಂದು ಟ್ರಿಪ್ ಗೆ ಗರಿಷ್ಠ 340 ರೂ.ಗಳನ್ನು ನಿಗದಿಪಡಿಸಲಾಗಿದೆ. ಮೈಸೂರಿನಿಂದ ಸ್ಯಾಟಲೈಟ್ ಬಸ್ ನಿಲ್ದಾಣದವರೆಗೆ ಪ್ರಯಾಣಿಸುವವರಿಗೆ 320 ರೂ. ದರವಿದೆ. ಮೈಸೂರಿನಿಂದ ಬೆಂಗಳೂರಿನ ಮೆಜೆಸ್ಟಿಕ್ ಬಸ್ ನಿಲ್ದಾಣದಲ್ಲಿ ನಿಲ್ಲಿಸುವವರಿಗೆ 340 ರೂ. ಇದೆ. ಪ್ರತಿದಿನ ಮೈಸೂರಿನಿಂದ ಬೆಳಗ್ಗೆ 6 ಗಂಟೆಗೆ ಮೊದಲ ಎಲೆಕ್ಟ್ರಿಕ್ ಬಸ್ ಸಂಚಾರ ಆರಂಭವಾಗುತ್ತದೆ. ಸಂಜೆ, 7 ಗಂಟೆಯವರೆಗೆ ಬಸ್ ಸೇವೆ ಇರುತ್ತದೆ.