ಯೂಟ್ಯೂಬ್ ನೋಡಿ ಬೈಕ್ ಕದಿಯುತ್ತಿದ್ದ ಕಳ್ಳನನ್ನು ಹೆಡೆಮುರಿಕಟ್ಟಿದ ಮೈಸೂರು ಪೊಲೀಸರು

ಮೈಸೂರು: ದುಬಾರಿ ಬೆಲೆಯ ಬೈಕ್ ಎಂದರೆ ಯಾರಿಗೆ ತಾನೇ ಕಣ್ಣು ಕುಕ್ಕದು ಹೇಳಿ. ಅಂತಹ ಬೈಕ್‌ಗಳನ್ನೇ ಟಾರ್ಗೆಟ್ ಮಾಡಿಕೊಂಡು ಇಂಟರ್ನೆಟ್‌ನಲ್ಲಿ ಅವುಗಳನ್ನು ಕದಿಯುವ ತಂತ್ರಗಳನ್ನು ತಿಳಿದುಕೊಂಡು ಕಳ್ಳತನ ಮಾಡುತ್ತಿದ್ದ ಖದೀಮನನ್ನು ಮೈಸೂರಿನ ಪೊಲೀಸರು ಬಂಧಿಸಿದ್ದಾರೆ.

ಹತ್ತಾರು ಬೈಕ್‌ಗಳನ್ನು ಕಳ್ಳತನ ಮಾಡಿದ್ದ ಕೆಪಿ ಪ್ರಜ್ವಲ್‌ (23) ಅನ್ನು ಹೆಬ್ಬಾಳ ಠಾಣೆ ಪೊಲೀಸರು ಜೈಲಿಗಟ್ಟಿದ್ದಾರೆ. ಬಂಧಿತ ಸ್ಕೂಟರ್ ಕಳ್ಳನಿಂದ ಒಟ್ಟು 10 ಲಕ್ಷ ರೂ. ಮೌಲ್ಯದ ದುಬಾರಿ ಬೆಲೆ ಬೈಕ್‌ಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಅಚ್ಚರಿಯ ವಿಷಯವೆಂದರೆ ಪೊಲೀಸರು ಬಂಧಿಸಿರುವ ಕಳ್ಳನಿಗೆ ಈ ಕೃತ್ಯಗಳನ್ನು ಎಸಗಲು ‘ಯೂಟ್ಯೂಬ್‌ ವಿಡಿಯೋ’ಗಳೇ ಪ್ರೇರಣೆ.

ಕಳ್ಳತನ ಹೇಗೆ?

ಆರೋಪಿ ಪ್ರಜ್ವಲ್ ಯೂಟ್ಯೂಬ್‌ನಲ್ಲಿರುವ ವಿಡಿಯೋ ನೋಡಿ ಕದಿಯುವ ವಿಧಾನ ತಿಳಿದು ಕಳವು ಮಾಡುತ್ತಿದ್ದ. ಈತ ತನ್ನ ಗುಂಪಿಗೆ ತಮಿಳುನಾಡಿನ ಕೆಲವು ಯುವಕರನ್ನೂ ಸೇರಿಸಿಕೊಂಡಿದ್ದ.

ಮೊದಲು ಯೂಟ್ಯೂಬ್‌ನಲ್ಲಿ ರಾಯಲ್ ಎನ್‌ಫೀಲ್ಡ್‌ ಸೇರಿದಂತೆ ದುಬಾರಿ ಬೆಲೆಯ ಬೈಕ್‌ಗಳನ್ನು ಕಳವು ಮಾಡುವ ಕುರಿತ ವಿವರವಾದ ಯಾವುದೋ ವಿಡಿಯೊವೊಂದನ್ನು ನೋಡಿದ್ದ. ಆ ನಂತರ ಆರೋಪಿ ಇದೇ ತಂತ್ರಗಾರಿಕೆ ಬಳಸಿ ಕಳವು ಮಾಡಲು ಆರಂಭಿಸಿದ್ದ. ಈತ ಐಟಿಐ ಕೋರ್ಸ್‌ ಮಾಡಿದ್ದರಿಂದ ವಿಡಿಯೋ ನೋಡಿದ ಕೆಲವೇ ಸೆಕೆಂಡ್‌ಗಳಲ್ಲಿ ಬೈಕ್‌ಗಳನ್ನು ಕಳವು ಮಾಡುತ್ತಿದ್ದ ಎನ್ನಲಾಗಿದೆ.

ಹೀಗೆ ಕದ್ದ ಬೈಕ್ ಅನ್ನು ಮೈಸೂರಿನ ಹೆಬ್ಬಾಳು ಕೈಗಾರಿಕಾ ಪ್ರದೇಶದಲ್ಲಿ ಮಾರಾಟ ಮಾಡುತ್ತಿದ್ದ. ಇದೇ ರೀತಿ ಮಾರಾಟ ಮಾಡಲು ಯತ್ನಿಸುತ್ತಿದ್ದ ವೇಳೆ ಈತನ ಬಳಿ ಇದ್ದ ನಂಬರ್‌ ಪ್ಲೇಟ್‌ ಇಲ್ಲದ ಬೈಕ್‌ನ್ನು ಕಂಡು ಪೊಲೀಸರು ಕೂಡಲೇ ತಮ್ಮ ವಶಕ್ಕೆ ಪಡೆದಿದ್ದಾರೆ. ನಂತರ ವಿಚಾರಣೆ ನಡೆಸಿದಾಗ ಈತ ಬೈಕ್‌ ಕಳ್ಳ ಎಂಬುದು ಗೊತ್ತಾಗಿದೆ. ನಂತರ ಈತನಿಂದ 4 ರಾಯಲ್ ಎನ್‌ಫೀಲ್ಡ್‌ ಬೈಕ್‌ಗಳು, ಟಿವಿಎಸ್ ಸ್ಟಾರ್ ಸಿಟಿ, ಹೀರೊ ಹೊಂಡಾ ಸ್ಪೆಂಡ್ಲರ್, ಹೊಂಡಾ ಡಿಯೊದ ತಲಾ ಒಂದೊಂದು ಬೈಕ್‌ಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.