ಉಗ್ರ ಅಬು ಜುಬೇದಾನಿಗೆ ಮೈಸೂರು ನಂಟು

ಮೈಸೂರು: ಅಮೆರಿಕದ ಕೇಂದ್ರ ಗುಪ್ತಚರ ಸಂಸ್ಥೆ (ಸಿಐಎ) ಪಾಕಿಸ್ತಾನದಲ್ಲಿ 2002ರಲ್ಲಿ ಬಂಧಿತನಾಗಿರುವ ಅಲ್‌ಖೈದಾ ಸಂಘಟನೆ ಶಂಕಿತ ಉಗ್ರ ಅಬು ಜುಬೇದಾ ಓದಿದ್ದು ಮೈಸೂರಿನಲ್ಲಿ ಎಂಬುದು ಪತ್ತೆಯಾಗುತ್ತಿದ್ದಂತೆ ಈ ಕುರಿತು ಪೊಲೀಸರು ಮಾಹಿತಿ ಕಲೆ ಹಾಕಲಾರಂಭಿಸಿದ್ದಾರೆ.

ಅಮೆರಿಕದ ಕಿರುಚಿತ್ರ ನಿರ್ಮಾಪಕ ಏಡ್ರಿಯನ್‌ ಲೆವಿ ಈಚೆಗೆ ನಗರಕ್ಕೆ ಬಂದು ಅಬು ಜುಬೇದಾ ಬಗ್ಗೆ ಮಾಹಿತಿ ಸಂಗ್ರಹಿಸಿದ್ದರು. ಆತ ಓದಿದ ಮೈಸೂರಿನ ಶಾರದಾ ವಿಲಾಸ ಕಾಲೇಜು, ವಾಸ್ತವ್ಯವಿದ್ದ ಮನೆ, ಸ್ನೇಹಿತರು ಸೇರಿದಂತೆ 27 ವರ್ಷದ ಹಿಂದಿನ ಮಾಹಿತಿ ಕಲೆ ಹಾಕಿದ್ದರು. ಈ ಸಂದರ್ಭದಲ್ಲಿ ಅಬು ಜುಬೇದಾನ ಬಗ್ಗೆ ಇನ್ನಷ್ಟು ಮಾಹಿತಿ ಲಭ್ಯವಾಗಿತ್ತು.

ಉದಯಗಿರಿಯಲ್ಲಿ ವಾಸ್ತವ್ಯ: ಪ್ಯಾಲೆಸ್ತೀನ್‌ನಿಂದ ಸೌದಿ ಅರೇಬಿಯಾಕ್ಕೆ ಬಂದು ನೆಲೆ ನಿಂತ ಅಬು ಜುಬೇದಾ 1989ರ ಜೂನ್‌ನಲ್ಲಿ ಮೈಸೂರಿಗೆ ಬಂದು ಶಾರದಾ ವಿಲಾಸ ಕಾಲೇಜಿನಲ್ಲಿ ಪದವಿ (ಕಂಪ್ಯೂಟರ್‌ ಸೈನ್ಸ್‌) ವ್ಯಾಸಂಗಕ್ಕೆ ಸೇರಿದ್ದ. ಆದರೆ ಅನುತ್ತೀರ್ಣನಾದ ಕಾರಣ ವ್ಯಾಸಂಗ ಪೂರ್ಣಗೊಳಿಸಿರಲಿಲ್ಲ. ಮೈಸೂರು ವಿವಿಯಲ್ಲಿ ಸಿಕ್ಕಿದ ಶೈಕ್ಷಣಿಕ ದಾಖಲೆಗಳಲ್ಲಿ ಈ ಮಾಹಿತಿ ಪತ್ತೆಯಾಗಿದೆ. ವಿದ್ಯಾಭ್ಯಾಸ ಸಂದರ್ಭ ಯೆಮನ್‌, ಕುವೈತ್‌ನಿಂದ ಬಂದ ಇತರ ಐವರ ಜತೆ ಈತ ಉದಯಗಿರಿಯಲ್ಲಿ ವಾಸ್ತವ್ಯ ಹೂಡಿದ್ದ ಎನ್ನುವುದು ಬೆಳಕಿಗೆ ಬಂದಿದೆ.

1991ರಲ್ಲಿ ಜಿಹಾದ್‌ ಆಗಿ ಆಫ್ಘಾನಿಸ್ತಾನಕ್ಕೆ ತೆರಳಿದ ಈತ, ಅಲ್ಲಿ ನಡೆದ ಯುದ್ಧವೊಂದರಲ್ಲಿ ಗಾಯಗೊಂಡು ಪಾಕಿಸ್ತಾನದ ಫೈಸಲಾಬಾದ್‌ಗೆ ಹೋಗಿದ್ದ. ಅಲ್ಲಿ ಜಿಹಾದಿಗಳು ತಂಗುವ ವಸತಿಗೃಹದ ವ್ಯವಸ್ಥಾಪಕನಾಗಿ ಕಾರ್ಯ ನಿರ್ವಹಿಸಿದ್ದ. ಅಮೆರಿಕದಲ್ಲಿ ವಿಶ್ವ ವ್ಯಾಪಾರ ಕೇಂದ್ರದ ಕಟ್ಟಡ ಧ್ವಂಸದ ಬಳಿಕ ಅಮೆರಿಕದ ಸಿಐಎ ತಂಡವು 2001ರಲ್ಲಿ ಪಾಕಿಸ್ತಾನದಲ್ಲಿ ಅಲ್‌ಖೈದಾದ ಮೂರನೇ ಪ್ರಮುಖ ಉಗ್ರ ಎಂಬ ಆರೋಪ ಹೊರಿಸಿ ಈತನನ್ನು ಬಂಧಿಸಿತ್ತು.

ಡೈರಿಯಲ್ಲಿ ಪ್ರಸ್ತಾಪ: ತಾನು ಮೈಸೂರಿನಲ್ಲಿ ಓದಿದ ದಿನಗಳು, ಸ್ನೇಹಿತರ ಕುರಿತು ಅಬು ಜುಬೇದಾ ಡೈರಿಯಲ್ಲಿ ಪ್ರಸ್ತಾಪಿಸಿದ್ದಾನೆ. ಈತನ ಡೈರಿಯನ್ನು ಅಮೆರಿಕ ಅಲ್‌ಜಜೀರಾ.ಕಾಮ್‌(http://america.aljazeera.com/articles/2013/11/5/notebook-one-thesecretdiariesofabuzubaydah.html) ಬಿಡುಗಡೆಗೊಳಿಸಿದೆ.

ಹೀಗಾಗಿ, ಈತನ ಬಿಡುಗಡೆಗೆ ಆಗ್ರಹಿಸುತ್ತಿರುವ ಅಂತರರಾಷ್ಟ್ರೀಯ ಮಾನವಹಕ್ಕು ಹೋರಾಟಗಾರರ ಗಮನ ಮೈಸೂರಿನತ್ತ ನೆಟ್ಟಿದೆ. ಪಾಕ್‌ ಸರಕಾರ ಇದುವರೆಗೆ ಈತನ ಮೇಲೆ ಯಾವುದೇ ದೋಷಾರೋಪ ಪಟ್ಟಿ ಸಲ್ಲಿಸಿಲ್ಲ. ಈತ ಅಲ್‌ಖೈದಾ ಜತೆ ಸಂಪರ್ಕ ಇಟ್ಟುಕೊಂಡಿದ್ದ ಎಂಬುದಕ್ಕೆ ಯಾವುದೇ ಪುರಾವೆ ಸಹ ಸಿಕ್ಕಿಲ್ಲ ಎಂದು ಅಲ್ಲಿನ ಹೋರಾಟಗಾರರು ಹೇಳುತ್ತಾರೆ. ಈತನ ಮೇಲೆ ದೋಷಾರೋಪ ಹೊರಿಸಬೇಕು ಇಲ್ಲವೇ ಬಿಡುಗಡೆಗೊಳಿಸಬೇಕು ಎನ್ನುವ ಒಂದು ಚಳವಳಿ ಅಮೆರಿಕದಲ್ಲಿ ಆರಂಭವಾಗಿದೆ. ಇದರ ಒಂದು ಭಾಗವಾಗಿ ಅಬು ಜುಬೇದಾ ಕುರಿತು ಕಿರುಚಿತ್ರ ನಿರ್ಮಿಸಲು ಏಡ್ರಿಯನ್‌ ಲೆವಿ ಮಾಹಿತಿ ಕಲೆ ಹಾಕಲು ಈಚೆಗೆ ನಗರಕ್ಕೆ ಬಂದಿದ್ದರು.