ರೇಟಿಂಗ್‌ನಲ್ಲಿ9ನೇ ಸ್ಥಾನಕ್ಕೆ ಕುಸಿದ ಮೈಸೂರು ವಿವಿ

ಸಂಶೋಧನೆ, ಮೂಲ ಸೌಕರ್ಯ ವಿಭಾಗದಲ್ಲಿ ಹಿಂದುಳಿದ ಯೂನಿವರ್ಸಿಟಿ

Vijaya Karnataka Web

ಮೈಸೂರು: ರಾಜ್ಯ ಸರಕಾರದ ಉನ್ನತ ಶಿಕ್ಷಣ ಇಲಾಖೆಯು ಐಕೇರ್ ಸಂಸ್ಥೆಯೊಂದಿಗೆ ಮಂಗಳವಾರ ಪ್ರಕಟಿಸಿರುವ 2019-20ನೇ ಸಾಲಿನ ರೇಟಿಂಗ್‌ನಲ್ಲಿ ಸಂಸ್ಥಾಪಿತ ವಿವಿ ವಿಭಾಗಗಳಲ್ಲಿ ಮೈಸೂರು ವಿಶ್ವವಿದ್ಯಾಲಯವು 4ನೇ ಸ್ಥಾನದಿಂದ 9ನೇ ಸ್ಥಾನಕ್ಕೆ ಕುಸಿದಿರುವುದು ಮೈಸೂರಿನ ಶಿಕ್ಷಣ ಪ್ರೇಮಿಗಳಲ್ಲಿ ಬೇಸರ ಮೂಡಿಸಿದೆ.

ಮೈಸೂರು ವಿಶ್ವವಿದ್ಯಾಲಯ ಕಳೆದ ಬಾರಿ 4ನೇ ಸ್ಥಾನದಲ್ಲಿತ್ತು. ಈ ಬಾರಿ 9ನೇ ಸ್ಥಾನಕ್ಕೆ ಇಳಿದಿದೆ. ಮೈಸೂರು ವಿವಿ ಒಟ್ಟು 1000 ಅಂಕಗಳಿಗೆ 584 ಅಂಕಗಳನ್ನು ಗಳಿಸಿದೆ. ಸಂಶೋಧನೆ ಮತ್ತು ಮೂಲ ಸೌಕರ್ಯಗಳ ವಿಭಾಗದಲ್ಲಿ ಮೈಸೂರು ವಿವಿ ಹಿಂದುಳಿದಿದೆ. ಹೀಗಾಗಿ, ರ್ಯಾಂಕಿಂಗ್‌ನಲ್ಲಿ ಕುಸಿದಿದೆ. ಆದರೂ ವಿಶ್ವವಿದ್ಯಾಲಯ ನಾಲ್ಕು ಸ್ಟಾರ್‌ಗಳ ಸ್ಥಾನಮಾನವನ್ನು ಉಳಿಸಿಕೊಂಡಿದೆ. ಮೈಸೂರು ವಿವಿಯಲ್ಲಿ ಶೇ.49ರಷ್ಟು ಮಾತ್ರ ಬೋಧಕ ಸಿಬ್ಬಂದಿ ಇದ್ದಾರೆ. ಹೀಗಿರುವಾಗ ಉತ್ತಮ ರ್ಯಾಂಕ್ ಪಡೆಯಲು ಹೇಗೆ ಸಾಧ್ಯಘಿ? ಎಂದು ಮೈಸೂರು ವಿವಿ ಮೂಲಗಳು ಪ್ರಶ್ನಿಸಿವೆ.

ಇನ್ನು ವಿಶೇಷ ವಿಶ್ವವಿದ್ಯಾಲಯದ ವರ್ಗದಲ್ಲಿ ಮೈಸೂರಿನ ಡಾ.ಗಂಗೂಬಾಯಿ ಹಾನಗಲ್ ಸಂಗೀತ ಮತ್ತು ಪ್ರದರ್ಶಕ ಕಲೆಗಳ ವಿಶ್ವವಿದ್ಯಾಲಯವು 9ನೇ ಸ್ಥಾನದಿಂದ 11ನೇ ಸ್ಥಾನಕ್ಕೆ ಕುಸಿದಿದೆ. ಕಳೆದ ಬಾರಿಗೆ ಹೋಲಿಸಿದರೆ ಈ ಬಾರಿ ಸಂಗೀತ ವಿವಿ ಪಡೆದಿರುವ ಅಂಕ ಹೆಚ್ಚಾಗಿದೆ. ಕಳೆದ ಬಾರಿ ಎರಡು ಸ್ಟಾರ್ ಗಳಿಸಿತ್ತು. ಈ ಬಾರಿ ಮೂರು ಸ್ಟಾರ್‌ಗಳನ್ನು ಪಡೆದಿದೆ. ಆದರೆ, ಒಟ್ಟಾರೆ 11ನೇ ಸ್ಥಾನಕ್ಕೆ ಕುಸಿದಿದೆ. ಸಂಗೀತ ವಿವಿಯಲ್ಲಿ ಬೋಧಕ ಸಿಬ್ಬಂದಿಯ ಕೊರತೆ ಇದೆ. ಇದು ಸಂಶೋಧನಾ ಚಟುವಟಿಕೆಗಳ ಮೇಲೆ ಪ್ರತಿಕೂಲ ಪರಿಣಾಮ ಬೀರಿದೆ ಎಂದು ಸಂಗೀತ ವಿವಿ ಮೂಲಗಳು ಹೇಳಿವೆ.

ಯುವ ವಿವಿ ವಿಭಾಗದಲ್ಲಿ ಮೈಸೂರಿನ ಜೆಎಸ್‌ಎಸ್ ವಿಶ್ವವಿದ್ಯಾಲಯವು ರಾಜ್ಯದಲ್ಲೇ ಮೊದಲ ಸ್ಥಾನದಲ್ಲಿದ್ದು ಹೆಮ್ಮೆ ಮೂಡಿಸಿದೆ.