ಯೋಗದಲ್ಲಿ ಮೈಸೂರಿನ ಖುಷಿಯ ದಾಖಲೆ

ಒಂದು ನಿಮಿಷಕ್ಕೆ 15 ಬಾರಿ ನಿರಾಲಂಬ ಪೂರ್ಣ ಚಕ್ರಾಸನ ಮಾದರಿ ಪ್ರದರ್ಶಿಸಿದ 13ರ ಬಾಲಕಿ

ಬೀರೇಶ್‌ ಕಬಿನಿ ಮೈಸೂರು

ಮೈಸೂರಿನ 13 ವರ್ಷದ ಬಾಲಕಿ ಖುಷಿ, ನಿರಾಲಂಬ ಪೂರ್ಣ ಚಕ್ರಾಸನ ಹೋಲುವ ಕಲಾತ್ಮಕ ಯೋಗದ ಒಂದು ಭಂಗಿಯನ್ನು ಒಂದು ನಿಮಿಷಕ್ಕೆ 15 ಬಾರಿ ಪೂರ್ಣಗೊಳಿಸುವ ಮೂಲಕ ವಿಶ್ವದಾಖಲೆ ನಿರ್ಮಿಸಿದ್ದಾಳೆ.

ಮೈಸೂರಿನ ಆರ್‌ಬಿಐ ನಗರದ ಸಮುದಾಯ ಭವನದಲ್ಲಿ ಭಾನುವಾರ ನಡೆದ ಕಾರ್ಯಕ್ರಮದಲ್ಲಿ ನಾನಾ ಗಣ್ಯರ ಸಮ್ಮುಖದಲ್ಲಿ ಆರ್‌ಬಿಐ ಮೈಸೂರು ಶಾಖೆ ಅಧಿಕಾರಿ ಹೇಮಚಂದ್ರಧಿ ಕುಮುದಾ ದಂಪತಿಯ ಪುತ್ರಿ ಖುಷಿ ಈ ಸಾಧನೆ ಮಾಡಿದ್ದಾಳೆ.

ಖುಷಿಗೆ ಸ್ವಲ್ಪ ಉಸಿರಾಟದ ಸಮಸ್ಯೆಯಾಗುತ್ತಿದ್ದ ಕಾರಣ ತಂದೆ ಹೇಮಚಂದ್ರ ಯೋಗಾಭ್ಯಾಸಕ್ಕೆ ಸೇರಿಸಿದರು. ಕಾಲಾನಂತರ ಉಸಿರಾಟದ ಸಮಸ್ಯೆ ಬಗೆಹರಿಯಿತು. ಹೀಗೆ ಆರಂಭವಾದ ಯೋಗ ನಂಟು ಈಗ ವಿಶ್ವದಾಖಲೆಯ ಹಂತಕ್ಕೆ ತಲುಪಿದೆ. ಅಭ್ಯಾಸದ ವೇಳೆ ನಿಮಿಷಕ್ಕೆ 13 ಬಾರಿ ಈ ಮಾದರಿಯ ಯೋಗ ಪೂರ್ಣಗೊಳಿಸುತ್ತಿದ್ದ ಖುಷಿ ನೆರೆದಿದ್ದವರ ಪ್ರೋತ್ಸಾಹ, ಪ್ರೇರಣೆಯಿಂದ ಸಾಧನೆಯ ವೇದಿಕೆಯಲ್ಲಿ ಎರಡು ಬಾರಿ ಹೆಚ್ಚಾಗಿ ಈ ವಿಶೇಷ ಯೋಗ ಮಾದರಿ ಪ್ರದರ್ಶಿಸಿದಳು.

ಯೋಗ ವಿಧಾನ: ತನ್ನ ಎರಡೂ ಕೈಗಳನ್ನು ಮುಂಭಾಗಕ್ಕೆ ಕಟ್ಟಿಕೊಂಡು ಯಾವುದೇ ವಸ್ತುವಿನ ಸಹಾಯವಿಲ್ಲದೆ ಚಕ್ರಾಸನದ ಮಾದರಿಯಲ್ಲಿ ಕಾಲಿನ ಮೇಲೆ ನಿಯಂತ್ರಣ ಸಾಧಿಸಿಕೊಂಡು ಹಿಂಭಾಗಕ್ಕೆ ಬಾಗಿ ನೆಲಕ್ಕೆ ಮೊದಲು ತಲೆಯನ್ನು ಮುಟ್ಟಿಸುತ್ತಾರೆ. ಹಾಗೆಯೇ ಜಾರಿಕೊಂಡು ನೇರವಾಗಿ ಮಲಗುವುದು. ಅದೇ ರೀತಿಯಲ್ಲಿ ಕಾಲಿನ ಸಹಾಯದಿಂದಲೇ ಮೇಲಕ್ಕೇಳುವ ವಿಧಾನವು ಅತ್ಯಂತ ಕ್ಲಿಷ್ಟಕರವಾಗಿದೆ. ಕಲಾತ್ಮಕ ಯೋಗ ಮಾಡುವಾಗ ಕೈಗೊಳ್ಳುವ ಒಂದು ಭಂಗಿ ಇದಾಗಿದೆ. ಖುಷಿ ನೋಡ ನೋಡುತ್ತಿದ್ದಂತೆ ಒಂದಾದ ಮೇಲೆ ಒಂದರಂತೆ ಈ ಮಾದರಿ ಯೋಗ ಮಾಡಿ ತೋರಿಸಿ, ನೆÜರೆದಿದ್ದವರಲ್ಲಿ ಅಚ್ಚರಿ ಮೂಡಿಸಿದಳು.

ದಾಖಲೆಯ ವಿಶೇಷ: ಈವರೆಗಿನ ಗಿನ್ನಿಸ್‌ ದಾಖಲೆಗಳ ಪಟ್ಟಿಯಲ್ಲಿ ಈ ಮಾದರಿ ಯೋಗ ದಾಖಲಾಗಿಲ್ಲ. ಅಲ್ಲದೆ ಆ ರೀತಿಯ ಪ್ರಯತ್ನಗಳೂ ನಡೆದಿಲ್ಲ. ಹಾಗಾಗಿ ಖುಷಿ ಕೇವಲ ಎರಡು ಬಾರಿ ಈ ಯೋಗ ಪ್ರದರ್ಶಿಸಿದರೂ ದಾಖಲೆಯಾಗುತ್ತಿತ್ತು. ಆದರೆ ಆಕೆ ಮುಂದೆ ತನ್ನ ದಾಖಲೆಯನ್ನು ಯಾರೂ ಸಹ ಅಷ್ಟು ಸುಲಭವಾಗಿ ಪೂರ್ಣಗೊಳಿಸಬಾರದು ಎಂಬ ಕಾರಣಕ್ಕೆ 15 ಬಾರಿ ಈ ಆಸನ ಪ್ರದರ್ಶಿಸಿದ್ದು ವಿಶೇಷ.

ಪ್ರಮಾಣ ಪತ್ರ ವಿತರಣೆ: ಈವರೆಗೆ ಯಾರೂ ಈ ಮಾದರಿಯ ದಾಖಲೆ ನಿರ್ಮಿಸದ ಕಾರಣ ಇಂದೋರ್‌ನಿಂದ ಆಗಮಿಸಿದ್ದ ಗೋಲ್ಡನ್‌ ಬುಕ್‌ ಆಫ್‌ ವರ್ಲ್ಡ್‌ ರೆಕಾರ್ಡ್‌ನ ಪ್ರತಿನಿಧಿ ಸಂತೋಷ್‌ ಅಗರ್‌ವಾಲ್‌ ಖುಷಿ ಮಾಡಿದ ಸಾಧನೆಯನ್ನು ವಿಶ್ವ ದಾಖಲೆ ಎಂದು ಘೋಷಿಸಿದ್ದಲ್ಲದೆ, ಸ್ಥಳದಲ್ಲಿಯೇ ಪ್ರಮಾಣ ಪತ್ರ ನೀಡಿ ಬೆನ್ನು ತಟ್ಟಿದರು.

-------------------------------

ಗೋಲ್ಡನ್‌ ಬುಕ್‌ ಆಫ್‌ ವರ್ಲ್ಡ್‌ ರೆಕಾರ್ಡ್‌ನವರಿಗೆ ಸಂಪರ್ಕಿಸಿ ಮಗಳ ಸಾಧನೆಯ ವೀಡಿಯೊ ಕಳುಹಿಸಿದ್ದೆವು. ಆಗ ಅವರು ಒಪ್ಪಿ ಈ ರೀತಿಯ ದಾಖಲೆಯನ್ನು ಈವರೆಗೆ ಯಾರೂ ಮಾಡಿಲ್ಲ ಎಂದು ಹೇಳಿ, ಪ್ರತಿನಿಧಿಯೊಬ್ಬರನ್ನು ಕಳುಹಿಸಿಕೊಟ್ಟಿದ್ದರು. ಅಂತೆಯೆ ಅವರ ಸಮ್ಮುಖದಲ್ಲಿ ಸಾಧನೆ ಮಾಡಿ ತೋರಿಸಿದ್ದು ಅವರು ಅದನ್ನು ವಿಶ್ವದಾಖಲೆಯಾಗಿ ಘೋಷಿಸಿದ್ದಾರೆ.

-ಹೇಮಚಂದ್ರ, ಖುಷಿಯ ತಂದೆ.

------------------------------

ಸಾಧನೆಗಳು ಹಲವು

ಯೋಗಾಭ್ಯಾಸ ಆರಂಭಿಸಿದ ಎರಡೂವರೆ ವರ್ಷಗಳ ಅವಧಿಯಲ್ಲಿಯೇ ಖುಷಿ ನಾನಾ ರಾಜ್ಯ, ರಾಷ್ಟ್ರ, ಅಂತಾರಾಷ್ಟ್ರೀಯ ಯೋಗ ಸ್ಪರ್ಧೆಗಳಲ್ಲಿ ಭಾಗವಹಿಸಿ ಪದಕ ಪಡೆದಿದ್ದಾಳೆ.

2014ರಲ್ಲಿ ಚೀನಾದಲ್ಲಿ ನಡೆದ ಅಂತಾರಾಷ್ಟ್ರೀಯ ಯೋಗ ಸ್ಪರ್ಧೆಯಲ್ಲಿ 17 ವರ್ಷ ಒಳಪಟ್ಟವರ ಜೂನಿಯರ್‌ ವಿಭಾಗದಲ್ಲಿ ಬೆಳ್ಳಿ, 2016ರಲ್ಲಿ ವಿಯಟ್ನಾಂನಲ್ಲಿ ನಡೆದ 6ನೇ ಅಂತಾರಾಷ್ಟ್ರೀಯ ಯೋಗ ಸ್ಪರ್ಧೆಯಲ್ಲಿ 4 ಇವೆಂಟ್‌ನಲ್ಲಿ ಎರಡು ಚಿನ್ನ, ಎರಡು ಬೆಳ್ಳಿ ಪದಕ ಪಡೆದುಕೊಂಡಿದ್ದಾಳೆ. ಸೋಲೊ ಆರ್ಟಿಸ್ಟಿಕ್‌ನಲ್ಲಿ ಚಿನ್ನ, ರಿದಮಿಕ್‌ ಪೇರ್‌ನಲ್ಲಿ ಚಿನ್ನ, ಪೇರ್‌ ಆರ್ಟಿಸ್ಟಿಕ್‌ ಹಾಗೂ ಮತ್ತೊಂದು ವಿಭಾಗದಲ್ಲಿ ಬೆಳ್ಳಿ ಪದಕ ಲಭಿಸಿತು.

ಸಾಧನೆಗೆ ಪ್ರೇರಣೆ: ಅಮೆರಿಕಾದ ಯೋಗ ಪಟುವೊಬ್ಬರು ಈ ಮಾದರಿಯ ಯೋಗ ಪ್ರದರ್ಶಿಸುವುದನ್ನು ಮೊಬೈಲ್‌ನಲ್ಲಿ ಗಮನಿಸಿದೆ. ಆಗ ನನ್ನ ತಂದೆ ಈ ಕ್ಲಿಷ್ಟಕರವಾದ ಯೋಗವನ್ನು ಒಂದು ನಿಮಿಷದಲ್ಲಿ ಹೆಚ್ಚು ಬಾರಿ ಮಾಡಿದರೆ ಇದು ವಿಶ್ವದಾಖಲೆಯಾಗಲಿದೆ ಎಂದು ಹೇಳಿದರು. ಹಾಗಾಗಿ ನಾನು ಈ ಸಾಧನೆಯಲ್ಲಿ ತೊಡಗಿಸಿಕೊಂಡೆ ಎಂದರು ಖುಷಿ.

---------------------------

ಯೋಗ ಶಿಕ್ಷಕಿಯಾಗಬೇಕು

ಮುಂದೆ ಯೋಗ ಶಿಕ್ಷಕಿಯಾಗಬೇಕು ಎಂದು ನಿರ್ಧರಿಸಿದ್ದೇನೆ. ಅಲ್ಲದೆ ಈ ಕ್ಷೇತ್ರದಲ್ಲಿ ಇನ್ನೂ ಹಲವಾರು ದಾಖಲೆಗಳನ್ನು ಮಾಡಲು ತೀರ್ಮಾನಿಸಿದ್ದೇನೆ. ಅಲ್ಲದೆ ಇದರ ಜತೆಗೆ ಐಎಎಸ್‌ ಅಧಿಕಾರಿಯಾಗಬೇಕೆಂಬ ಆಸೆಯೂ ಇದೆ.

-ಖುಷಿ, ಸಾಧಕಿ.