ಅಕ್ರಮವಾಗಿ ಒತ್ತುವರಿಯಾಗಿದ್ದ 10 ಕೋಟಿ ಮೌಲ್ಯದ ಮುಡಾ ಆಸ್ತಿ ವಶಕ್ಕೆ

ಮೈಸೂರು: ಅಕ್ರಮವಾಗಿ ಒತ್ತುವರಿಯಾಗಿದ್ದ ಮೈಸೂರು ನಗರಾಭಿವೃದ್ಧಿ ಪ್ರಾಧಿಕಾರದ 10 ಕೋಟಿ ರೂ. ಮೌಲ್ಯದ ನಿವೇಶನಗಳನ್ನು ಮುಡಾ ಮತ್ತೆ ತನ್ನ ವಶಕ್ಕೆ ಪಡೆದಿದ್ದು, ಸಂರಕ್ಷಣೆ ಮಾಡಿದೆ. ಪ್ರಾಧಿಕಾರಕ್ಕೆ ಸೇರಿದ ದೇವನೂರು ಗ್ರಾಮದ ದೇವನೂರು ಗ್ರಾಮ ಸರ್ವೆ ನಂಬರ್‌ 166/1, 166/2 ಮತ್ತು 164ರ ಜಮೀನುಗಳನ್ನು ಸ್ವಾಧೀನ ಪಡಿಸಿಕೊಂಡು ರಚಿಸಿದ್ದ ನಿವೇಶನಗಳನ್ನು ವಶಕ್ಕೆ ಪಡೆದು ತಂತಿ ಬೇಲಿ ಹಾಕಿದೆ.

ಈ ಸರ್ವೆ ನಂಬರ್‌ಗಳಲ್ಲಿಇದ್ದ ಜಮೀನುಗಳನ್ನು ಪ್ರಾಧಿಕಾರವು ಭೂ ಸ್ವಾಧೀನ ಪಡಿಸಿಕೊಂಡು ಸಂಬಂಧಪಟ್ಟ ಭೂ ಮಾಲೀಕರಿಗೆ 1988ರಲ್ಲಿ ಪರಿಹಾರ ಕೂಡ ಪಾವತಿ ಮಾಡಿತ್ತು. ಬಡಾವಣೆ ರಚಿಸಿ ಈ ಸರ್ವೆ ನಂಬರ್‌ಗಳಲ್ಲಿ ನಿವೇಶನಗಳನ್ನು ಮಾಡಲಾಗಿತ್ತು. ಆದರೆ ನಿವೇಶನ ಸಂಖ್ಯೆ 1030ರಿಂದ 1043ರವರೆಗಿನ ನಿವೇಶನಗಳ್ನು ಸ್ಥಳೀಯ ನಿವಾಸಿ ಸೈಯದ್‌ ಹಸೀಬ್‌ ಎಂಬಾತ ತನ್ನದೆಂದು ಅತಿಕ್ರಮ ಪ್ರವೇಶ ಮಾಡಿದ್ದರು. ಇದನ್ನು ಗಂಭೀರವಾಗಿ ಪರಿಗಣಿಸಿದ ಮುಡಾ ಆಯುಕ್ತ ಡಾ. ನಟೇಶ್‌, ಅಕ್ರಮ ತೆರವುಗೊಳಿಸಿ ನಿವೇಶನಗಳನ್ನು ವಶಕ್ಕೆ ಪಡೆಯುವಂತೆ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ.

ಮಂಗಳವಾರ ಬೆಳಗ್ಗೆ ಕಾರ್ಯಾಚರಣೆ ಉದಯಗಿರಿ ಪೊಲೀಸರ ಸಹಕಾರದಲ್ಲಿಕಾರ್ಯಾಚರಣೆ ನಡೆಸಿದ ಮುಡಾ ಅಧಿಕಾರಿಗಳು, ಒತ್ತುವರಿ ತೆರವುಗೊಳಿಸಿ, ನಿವೇಶನಗಳನ್ನು ತಮ್ಮ ವಶಕ್ಕೆ ಪಡೆಯುವ ಮೂಲಕ ಸಂರಕ್ಷಣೆ ಮಾಡಿದ್ದಾರೆ. ಈ ಸಂದರ್ಭದಲ್ಲಿ ಮುಡಾ ಆಯುಕ್ತ ಡಾ.ಡಿ.ಬಿ. ನಟೇಶ್‌, ಅಧೀಕ್ಷಕ ಎಂಜಿನಿಯರ್‌, ಕಾರ್ಯಾಪಾಲಕ ಎಂಜಿನಿಯರ್‌, ವಲಯ ಕಚೇರಿ ಎಂಜಿನಿಯರ್‌ಗಳು ಹಾಗೂ ಉದಯಗಿರಿ ಠಾಣೆಯ ಪೊಲೀಸರು ಇದ್ದರು.