ಮೈಸೂರಲ್ಲಿ ನ್ಯೂ ಇಯರ್‌ ಸೆಲೆಬ್ರೆಷನ್‌ ಕಸಿದುಕೊಂಡ ಕೊರೊನಾ..! ನಿರಾಸೆಯಲ್ಲಿ ಸಾಂಸ್ಕೃತಿಕ ನಗರಿಯ ಜನ

ಮೈಸೂರು: ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿ ಪ್ರತಿವರ್ಷ ಸಂಭ್ರಮವಾಗಿ ಮೂಡಿಬರುತ್ತಿದ್ದ ಹೊಸ ವರ್ಷದ ಆಚರಣೆಗೆ ಈ ಬಾರಿ ಬ್ರೇಕ್‌ ಬಿದ್ದಿದೆ. ಅರಮನೆ ಎದುರು ಹೊಸ ವರ್ಷದ ಮುನ್ನಾ ದಿನ ನಡೆಯುತ್ತಿದ್ದ ಬಾಣ ಬಿರುಸು, ಪಟಾಕಿ ಸಿಡಿತ, ಪೊಲೀಸ್ ಬ್ಯಾಂಡ್, ಸಂಗೀತ ಸೇರಿ ಸಂಭ್ರಮಾಚರಣೆಗಳಿಗೆ ಕೊರೊನಾ ಕೋಕ್‌ ನೀಡಿದೆ.

ಈ ಸಂಬಂಧ ಸುದ್ದಿಗಾರರೊಂದಿಗೆ ಮಾತನಾಡಿದ ಅರಮನೆ ಆಡಳಿತ ಮಂಡಳಿ ಉಪನಿರ್ದೇಶಕ‌ ಟಿ.ಎಸ್. ಸುಬ್ರಹ್ಮಣ್ಯ, ಈ ಬಾರಿ ಕೊರೊನಾ ಹಿನ್ನೆಲೆಯಲ್ಲಿ ಅರಮನೆಯಲ್ಲಿ ಹೊಸ ವರ್ಷ ಸಂಭ್ರಮಾಚರಣೆ ಇಲ್ಲ. ಕೊರೊನಾ ಕಡಿಮೆಯಾದರೆ ಯುಗಾದಿಗೆ ಸಂಭ್ರಮಾಚರಣೆ ಮಾಡಲಾಗುವುದು ಎಂದರು.

ಇನ್ನು, ಡಿಸಿಪಿ ಪ್ರಕಾಶ್‌ ಗೌಡ ಮಾತನಾಡಿ, ಹೊಸ ವರ್ಷಾಚರಣೆ ಹಿನ್ನೆಲೆ ನಗರದಾದ್ಯಂತ 144 ಸೆಕ್ಷನ್ ಜಾರಿಯಲ್ಲಿದ್ದು, ಅರಮನೆಯ ಮುಂಭಾಗದಲ್ಲಿ ಹೊಸವರ್ಷ ಆಚರಣೆಗೆ ಅವಕಾಶವಿಲ್ಲ. ಈ ಹಿನ್ನೆಲೆ ಎಲ್ಲಾ ಹೋಟೆಲ್ ಮಾಲೀಕರನ್ನು ಕರೆದು ಅವರಿಗೆ ತಿಳುವಳಿಕೆ ನೀಡಲಾಗಿದೆ. ಎಲ್ಲರೂ ಸಹ ಸರ್ಕಾರ ಏನು ರೂಲ್ಸ್ ಮಾಡುತ್ತದೆ ಅದರಂತೆ ಪಾಲನೆ ಮಾಡಬೇಕು. ಈ ವರ್ಷ ಯಾವುದೇ ವಿಶೇಷವಾದಂತಹ ಯಾವುದೇ ರೀತಿಯ ಕಾರ್ಯಕ್ರಮವನ್ನು ಮಾಡಬಾರದು. ಹೆಚ್ಚು ಜನ ಸಮುದಾಯ ಸೇರಬಾರದು ಎಂದರು.

ಹೊಸ ವರ್ಷದ ಸಂಭ್ರಮಕ್ಕೆ ಬ್ರೇಕ್ ಹಾಕಿ‌ ಸರ್ಕಾರದ ಆದೇಶ ಹಿನ್ನೆಲೆ ಇತ್ತ ಮೈಸೂರಿನ ಯಾವುದೇ ಸ್ಟಾರ್ ಹೊಟೆಲ್, ಕ್ಲಬ್‌ಗಳಲ್ಲಿ ವಿಶೇಷ ಆಚರಣೆ ಇಲ್ಲ. ಇದರಿಂದಾಗಿ ತಮಗೆ ಕನಿಷ್ಠ 2 ಕೋಟಿ ರೂ. ವ್ಯಾಪಾರ ನಷ್ಟ ಆಗಲಿದೆ ಎಂದು ಹೊಟೆಲ್ ಮಾಲೀಕರ ಸಂಘದ ಅಧ್ಯಕ್ಷ ನಾರಾಯಣ್ ಗೌಡ ತಿಳಿಸಿದ್ದಾರೆ.

ನಾವು ಸರ್ಕಾರದ ಆದೇಶವನ್ನು ಚಾಚು ತಪ್ಪದೆ ಪಾಲಿಸುತ್ತೇವೆ. ನಗರದಲ್ಲಿ 24 ಸ್ಟಾರ್ ಹೋಟೆಲ್ ಇವೆ. ಇಲ್ಲಿಗೆ ಜನ ಎಂದಿನಂತೆ ಬಂದು ಹೋಗಬಹುದು. ರಾತ್ರಿ 11 ಗಂಟೆ ವೇಳೆಗೆ ನಾವು ವ್ಯಾಪಾರ ಬಂದ್ ಮಾಡುತ್ತೇವೆ. 11.30ರ ನಂತರ ಸಂಪೂರ್ಣ ಎಲ್ಲರೂ ಮನೆಗೆ ತೆರಳುವಂತೆ ಮಾಡುತ್ತೇವೆ. ಗುಂಪಾಗಿ ಜನರು ಹಾಗೂ ಸದಸ್ಯರು ಬರಲು ಅವಕಾಶ ಕೊಡುವುದಿಲ್ಲ. ಸದಸ್ಯರಾದರೂ ಸರಿ 5ಕ್ಕಿಂತ ಹೆಚ್ಚು ಜನ ಸೇರಲು ಅವಕಾಶ ಕೊಡುವುದಿಲ್ಲ ಎಂದರು.

ಹೊಸ ವರ್ಷದ ಸಂಭ್ರಮಾಚರಣೆಗೆ ಮೈಸೂರಿನಲ್ಲೂ ನಿಷೇಧ: ಖಾಕಿ ಕಟ್ಟೆಚ್ಚರ..!

ಹೊಸ ವರ್ಷಾಚರಣೆ ಎಂದರೇ ನೆನಪಾಗುವುದು ಡಿಜೆ, ಈವೆಂಟ್‌ ಮ್ಯಾನೇಜ್‌ ಮೆಂಟ್‌ ಶೋಗಳು. ಆದರೆ, ಸರ್ಕಾರ ಆದೇಶ ಮಾಡಿದ ನಂತರ ನಮ್ಮ ಕಾರ್ಯಕ್ರಮಗಳೆಲ್ಲಾ ಕ್ಯಾನ್ಸಲ್ ಆಗಿದೆ. 144 ಸೆಕ್ಷನ್‌ ಜಾರಿಯಾದ ಬಳಿಕ ಡಿಜೆ, ಡ್ಯಾನ್ಸ್‌, ಈವೆಂಟ್ ಪಾರ್ಟಿಗಳಿಗೆ ಬ್ರೇಕ್ ಬಿದ್ದಿದೆ ಎಂದು ಈವೆಂಟ್ ಆರ್ಗನೈಸರ್ ವಿವೇಕ್ ತಿಳಿಸಿದ್ದಾರೆ.

ಹೊಸ ವರ್ಷಾಚರಣೆಗೆ ಕೊರೊನಾ ಬ್ರೇಕ್‌, ಬೆಂಗಳೂರಿನಲ್ಲಿ ಸೆಕ್ಷನ್‌ 144 ಜಾರಿ

ರ‍್ಯಾಡಿಸನ್ ಬ್ಲೂ, ಹೋಟೆಲ್ ಬೃಂದಾವನ, ಸಂದೇಶ್ ದಿ ಪ್ರಿನ್ಸ್, ಸೈಲೆಂಟ್ ಶೋರ್ಸ್ ಸೇರಿ ಅನೇಕ ಹೊಟೇಲ್ ಗಳಲ್ಲಿ ಈವೆಂಟ್ ಇತ್ತು. ಆದರೆ, ನಾವು ಸರ್ಕಾರದ ಕೋವಿಡ್ ನಿಯಮ ಪಾಲಿಸಿ ಈವೆಂಟ್ ಮಾಡುತ್ತೇವೆ ಎಂದು ಹೇಳಿದ್ದೆವು. ಆದರೆ ಒಪ್ಪಲ್ಲಿಲ್ಲ. ಹತ್ತು ದಿನಗಳ ಹಿಂದೆ ಆ ಎಲ್ಲಾ ಈವೆಂಟ್ ಕ್ಯಾನ್ಸಲ್ ಆಗಿದ್ದು ನಮಗೆ ಲಾಸ್‌ ಆಗಿದೆ ಎಂದು ಬೇಸರ ವ್ಯಕ್ತಪಡಿಸಿದರು.

ಕೋವಿಡ್ ರೂಪಾಂತರ ಆತಂಕ: ಹೊಸ ವರ್ಷಾಚರಣೆಗೆ ಕಟ್ಟುನಿಟ್ಟಿನ ರೂಲ್ಸ್