ವಾರದೊಳಗೆ ಮುಕ್ತ ವಿವಿ ಮಾನ್ಯತೆ ಆದೇಶ?

ಕುಲಪತಿ ಜತೆ ಯುಜಿಸಿ ಅಧ್ಯಕ್ಷರನ್ನು ಭೇಟಿ ಮಾಡಿದ ಶಾಸಕ ರಾಮದಾಸ್‌

ಮೈಸೂರು: ಕರ್ನಾಟಕ ರಾಜ್ಯ ಮುಕ್ತ ವಿಶ್ವವಿದ್ಯಾನಿಲಯಕ್ಕೆ ಮಾನ್ಯತೆ ನೀಡುವ ಬಗ್ಗೆ ವಿಶ್ವವಿದ್ಯಾನಿಲಯ ಧನಸಹಾಯ ಆಯೋಗ ಇನ್ನು 2-3 ದಿನಗಳಲ್ಲಿ ಆದೇಶ ಹೊರಡಿಸುವ ನಿರೀಕ್ಷೆ ಇದೆ.

ಮೈಸೂರಿನ ಕೃಷ್ಣರಾಜ ಕ್ಷೇತ್ರದ ಶಾಸಕ ಎಸ್‌.ಎ.ರಾಮದಾಸ್‌ ಮತ್ತು ಮುಕ್ತ ವಿವಿ ಕುಲಪತಿ ಪ್ರೊ.ಡಿ.ಶಿವಲಿಂಗಯ್ಯ ಹೊಸದಿಲ್ಲಿ ಯಲ್ಲಿ ಮಂಗಳವಾರ ಯುಜಿಸಿ ಅಧ್ಯಕ್ಷ ಪ್ರೊ.ಡಿ.ಪಿ.ಸಿಂಗ್‌ ಅವರನ್ನು ಭೇಟಿ ಮಾಡಿದ ಸಂದರ್ಭ ಈ ಮಾಹಿತಿ ಲಭ್ಯವಾಗಿದೆ.

‘‘ಆ.2ರಂದು ನಡೆದ ಯುಜಿಸಿ ಸಭೆಯಲ್ಲಿ ಕರ್ನಾಟಕ ರಾಜ್ಯ ಮುಕ್ತ ವಿಶ್ವವಿದ್ಯಾನಿಲಯಕ್ಕೆ ಪ್ರಸ್ತುತ ಸಾಲಿನಿಂದ ಮಾನ್ಯತೆಯನ್ನು ನೀಡುವ ಕ್ರಮಕ್ಕೆ ದೊರೆತ ಒಪ್ಪಿಗೆಯ ನಡಾವಳಿಯನ್ನು ಅನುಮೋದನೆಗಾಗಿ ಕೇಂದ್ರದ ಮಾನವ ಸಂಪನ್ಮೂಲ ಸಚಿವ ಪ್ರಕಾಶ್‌ ಜಾವಡೇಕರ್‌ ಅವರಿಗೆ ಕಳುಹಿಸಲಾಗಿತ್ತು. ಪ್ರಸ್ತಾವಕ್ಕೆ ಅಂಕಿತ ಹಾಕಿರುವ ಅವರು ಸಂಬಂಧಪಟ್ಟ ಯುಜಿಸಿ ಅಧಿಕಾರಿಗಳಿಗೆ ಕೂಡಲೇ ಕೆಎಸ್‌ಒಯುಗೆ ಪ್ರವೇಶಾತಿ ಕೈಗೊಳ್ಳಲು ಯುಜಿಸಿ ಮಾನ್ಯತೆಯ ಆದೇಶವನ್ನು ಜಾರಿ ಮಾಡುವಂತೆ ಸೂಚಿಸಿದ್ದಾರೆ,’’ ಎಂದು ರಾಮದಾಸ್‌ ತಿಳಿಸಿದ್ದಾರೆ.

-----------------

ಸುಮಾರು 3 ವರ್ಷಗಳಿಂದ ನನೆಗುದಿಗೆ ಬಿದ್ದಿದ್ದ ಯುಜಿಸಿ ಮಾನ್ಯತೆ ಸದ್ಯದಲ್ಲಿಯೇ ದೊರಕಲಿದೆ. ಇದಕ್ಕೆ ಪ್ರತಿ ಹಂತದಲ್ಲೂ ಸ್ಪಂದಿಸಿ, ಪ್ರಮುಖ ಪಾತ್ರವಹಿಸಿದ ಕೇಂದ್ರ ಸಚಿವ ಅನಂತಕುಮಾರ್‌ ಮತ್ತು ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ಎಸ್‌. ಯಡಿಯೂರಪ್ಪ ಅವರಿಗೆ ಕೆಎಸ್‌ಒಯು ವಿದ್ಯಾರ್ಥಿಗಳು, ನೌಕರರ ಪರವಾಗಿ ಧನ್ಯವಾದಗಳನ್ನು ಸಲ್ಲಿಸುತ್ತೇನೆ.
-ಎಸ್‌.ಎ.ರಾಮದಾಸ್‌ ಶಾಸಕ

------------------

ಮಾನ್ಯತೆ ಪ್ರಸ್ತಾವಕ್ಕೆ ಯುಜಿಸಿ ಅನುಮೋದನೆ ಸಿಕ್ಕಿದ್ದು, ಮಾನವ ಸಂಪನ್ಮೂಲ ಸಚಿವರ ಒಪ್ಪಿಗೆಯೂ ಸಿಕ್ಕಿದೆ. ಸದ್ಯದಲ್ಲೇ ಆದೇಶ ಕೈಸೇರುವ ನಿರೀಕ್ಷೆ ಇದೆ.
-ಪ್ರೊ.ಡಿ.ಶಿವಲಿಂಗಯ್ಯ, ಕುಲಪತಿ, ಮುಕ್ತ ವಿವಿ.