ಪೇದೆ ಲಂಚ ಸ್ವೀಕಾರ ವಿಡಿಯೋವೈರಲ್‌: ವಿಚಾರಣೆಗೆ ಆದೇಶ

ಮೈಸೂರು: ನೋ ಪಾರ್ಕಿಂಗ್‌ನಲ್ಲಿ ಖಾಸಗಿ ಬಸ್‌ ನಿಲ್ಲಿಸಿದ್ದ ಕಂಡಕ್ಟರ್‌ನಿಂದ ಸಂಚಾರ ಪೊಲೀಸ್‌ ಪೇದೆಯೊಬ್ಬರು 20 ರೂ. ಲಂಚ ಸ್ವೀಕರಿಸುತ್ತಿದ್ದ ವಿಡಿಯೋ ಸಾಮಾಜಿಕ ಜಾಲ ತಾಣದಲ್ಲಿ ವೈರಲ್‌ ಆಗಿದೆ.

ವಿಡಿಯೋವನ್ನು ಗಂಭೀರವಾಗಿ ಪರಿಗಣಿಸಿರುವ ಅಪರಾಧ ಮತ್ತು ಸಂಚಾರ ವಿಭಾಗದ ಡಿಸಿಪಿ ರುದ್ರಮುನಿ, ಪೇದೆ ವಿರುದ್ಧ ಇಲಾಖಾ ವಿಚಾರಣೆಗೆ ಆದೇಶ ನೀಡಿದ್ದಾರೆ.

ನಗರದ ಕರಿಕಲ್ಲು ತೊಟ್ಟಿಯ ಮುಂಭಾಗ ಖಾಸಗಿ ಸಂಸ್ಥೆಗೆ ಸೇರಿದ ಬಸ್ಸೊಂದು ನೋ ಪಾರ್ಕಿಂಗ್‌ನಲ್ಲಿ ನಿಂತಿತ್ತು. ಇದನ್ನು ಕಂಡ ಸಂಚಾರ ಪೊಲೀಸ್‌ ಪೇದೆಯೊಬ್ಬರು ಕಂಡಕ್ಟರ್‌ನಿಂದ ಯಾರಿಗೂ ಗೊತ್ತಾಗದ ಹಾಗೆ 20 ರೂಪಾಯಿ ಲಂಚ ಸ್ವೀಕರಿಸಿದ್ದಾರೆ. ಇದನ್ನು ಕಂಡ ದಾರಿಹೋಕರು ಅವರಿಗೆ ಗೊತ್ತಾಗದ ರೀತಿಯಲ್ಲಿ ವಿಡಿಯೋ ಮಾಡಿದ್ದಾರೆ. ನಂತರ ಪೇದೆಯ ಬಳಿ ಹೋಗಿ, '20 ರೂಪಾಯಿ ಲಂಚ ಯಾಕೆ ತೆಗೆದುಕೊಂಡಿರಿ? ನಿಮ್ಮ ಕಮೀಷನರ್‌ ಏನಾದರೂ ಲಂಚ ಸ್ವೀಕರಿಸಲು ಹೇಳಿದ್ದಾರಾ,' ಎಂದು ಪ್ರಶ್ನೆ ಮಾಡಿದಾಗ ಗಲಿಬಿಲಿಗೊಂಡ ಪೇದೆ, "ನೀವು ನಮ್ಮವರೇ ಬಿಡಪ್ಪ,' ಎಂದಿದ್ದಾರೆ. ಇಷ್ಟಕ್ಕೂ ಸುಮ್ಮನಾಗದ ದಾರಿಹೋಕರು, ನೋ ಪಾರ್ಕಿಂಗ್‌ನಲ್ಲಿ ನಿಂತಿದ್ದ ಬಸ್‌ ಕಂಡಕ್ಟರ್‌ ಬಳಿ ಬಂದು, 'ನೀವು ಲಂಚ ಏಕೆ ಕೊಟ್ಟಿದ್ದು, ಎಂದು ಕೇಳಿದಾಗ, 'ನಾನು ಕೊಟ್ಟಿಲ್ಲ,' ಎಂದು ಬಸ್‌ ಹತ್ತಿ ಸ್ಥಳದಿಂದ ಪರಾರಿಯಾಗಿದ್ದಾನೆ. ಈ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ.

ಸಾಮಾಜಿಕ ಜಾಲ ತಾಣಗಳಲ್ಲಿ ವಿಡಿಯೋ ಹರಿದಾಡುತ್ತಿರುವುದನ್ನು ಗಂಭೀರವಾಗಿ ಪರಿಗಣಿಸಿದ ಅಪರಾಧ ಮತ್ತು ಸಂಚಾರ ವಿಭಾಗದ ಡಿಸಿಪಿ ರುದ್ರಮುನಿ ಅವರು, ಆರೋಪಿ ಎನ್ನಲಾದ ಪೊಲೀಸ್‌ ಪೇದೆ ಈರಣ್ಣ ಅವರ ವಿರುದ್ಧ ದೇವರಾಜ ಸಂಚಾರ ವಿಭಾಗದ ಎಸಿಪಿ ನೇತೃತ್ವದಲ್ಲಿ ಇಲಾಖಾ ವಿಚಾರಣೆಗೆ ಆದೇಶ ನೀಡಿದ್ದಾರೆ.

ವಿಚಾರಣೆ ವೇಳೆ ಆರೋಪ ಸಾಬೀತಾದರೆ ಅವರ ವಿರುದ್ಧ ಶಿಸ್ತು ಕ್ರಮ ಜರುಗಿಸುವುದಾಗಿ ಡಿಸಿಪಿ ರುದ್ರಮುನಿ ತಿಳಿಸಿದ್ದಾರೆ.