ಕೊರೊನಾ ಹರಡುವ ಭೀತಿ ಹಿನ್ನೆಲೆ: ನೋಟಿಗೆ ಬೆಂಕಿ ಹಚ್ಚಿದ ಸಾರ್ವಜನಿಕರು!

ಮೈಸೂರು: ಕೊರೊನಾ ರೆಡ್‌ ಝೋನ್‌ ಎಂದು ಘೋಷಿಸಿರುವ ಮೈಸೂರಿನಲ್ಲಿ ದಿನವೂ ಜನರಿಗೆ ಇಲ್ಲಿನ ಸೋಂಕಿತರ ಏರಿಕೆಯ ಭೀತಿ ನಿದ್ದೆಗೆಡಿಸಿದೆ. ಈ ಹಿನ್ನೆಲೆ ರಸ್ತೆಯಲ್ಲಿ ಬಿದ್ದಿರುವ ದುಡ್ಡಿಗೆ ಜನರು ಬೆಂಕಿ‌ ಹಚ್ಚಿದ ಘಟನೆ ನಜರ್‌ ಬಾದ್‌ನಲ್ಲಿ‌ ನಡೆದಿದೆ.

ನಜರ್ ಬಾದ್ ನ ಮೆಡಿಕಲ್ ಸ್ಟೋರ್ ಮುಂಭಾಗ ಶನಿವಾರ ಬೆಳಿಗ್ಗೆ 100 ರೂ. ಮುಖಬೆಲೆಯ ನೋಟು ಬಿದ್ದಿತ್ತು. ಇದನ್ನು ಗಮನಿಸಿದ ಸ್ಥಳೀಯರೊಬ್ಬರು ನೋಟಿನಲ್ಲಿ ಕೊರೋನಾ ವೈರಸ್ ಇರಬಹುದೆಂಬ ಶಂಕೆಯಿಂದ ನೋಟಿಗೆ ಸ್ಯಾನಿಟೈಸರ್ ಸಿಂಪಡಿಸಿ ನಂತರ ಬೆಂಕಿ ಇಟ್ಟಿದ್ದಾರೆ. ಸದ್ಯ ನೋಟಿಗೆ ಬೆಂಕಿ‌ ಇಟ್ಟ ವಿಡಿಯೋ ವೈರಲ್ ಆಗಿದೆ.

ಇನ್ನು ಇದೇ ಗುರುವಾರ ಹೆಬ್ಬಾಳದಲ್ಲಿಯೂ ಕೂಡ 50ರೂ.ನೋಟು ಕೂಡ ಅಪರಿಚಿತರು ಬಿಸಾಡಿ ಹೋಗಿದ್ದರು. ಅದನ್ನು ಪಾಲಿಕೆ ಅಧಿಕಾರಿಗಳು ಎತ್ತಿಕೊಂಡು ಬಂದಿದ್ದು, ಪರಿಶೀಲನೆ ಸಹ ನಡೆಸಿದ್ದಾರೆ. ಘಟನೆ ಬಳಿಕ ಜನರಲ್ಲಿ ಆತಂಕ ಹೆಚ್ಚಿದೆ. ಸಾಮಾನ್ಯವಾಗಿ ಜನತೆಯಲ್ಲಿ ಭೀತಿ ಹುಟ್ಟಿಸಲು ಬೇಕೆಂದೆ ಈ ಕೆಲಸ ಮಾಡುತ್ತಿದ್ದಾರೋ ಅಥವಾ ವೈರಸ್‌ ಸೋಂಕಿರುವವರೇ ಈ ರೀತಿ ಮಾಡುತ್ತಿದ್ದಾರಾ ಎಂಬ ಬಗ್ಗೆ ತನಿಖೆ ನಡೆಸುವಂತೆ ಸಾರ್ವಜನಿಕರು ಒತ್ತಾಯಿಸಿದ್ದಾರೆ.