ಮುಕ್ತ ವಿವಿಯಲ್ಲಿ ಪಿಎಚ್‌.ಡಿ ಕೋರ್ಸ್‌ ಜನವರಿಯಿಂದ ಆರಂಭ

ಮೈಸೂರು : ಯುಜಿಸಿಯಿಂದ ಪಿಎಚ್‌.ಡಿ ಕೋರ್ಸ್‌ ನಡೆಸಲು ಅನುಮತಿ ಸಿಕ್ಕಿದ್ದು, ಜನವರಿಯಿಂದ ಪ್ರಾರಂಭಿಸಲು ಕರಾಮುವಿವಿ ವ್ಯವಸ್ಥಾಪನಾ ಮಂಡಳಿ ಸಭೆಯಲ್ಲಿ ಶುಕ್ರವಾರ ತೀರ್ಮಾನಿಸಲಾಯಿತು.

''ಪಿಎಚ್‌.ಡಿ ಕೋರ್ಸ್‌ ನಡೆಸಲು ಎಲ್ಲರಂತೆ ನಮಗೂ ಪಬ್ಲಿಕ್‌ ನೋಟಿಸ್‌ ಸಿಕ್ಕಿದೆ. ನಾವು ಮತ್ತೊಮ್ಮೆ ಯುಜಿಸಿಗೆ ಪತ್ರ ಬರೆದು ಅನುಮತಿ ಪಡೆದು ಕೋರ್ಸ್‌ ಅನ್ನು ಶುರು ಮಾಡುತ್ತೇವೆ. ಕರಾಮುವಿವಿಯಲ್ಲಿ ಈಗಾಗಲೇ ಮಾರ್ಗದರ್ಶಕರು ಇದ್ದಾರೆ. ಆದರೂ ಗೈಡ್‌ಗಳು ಯಾರಾರ‍ಯರು? ಎಷ್ಟು ಸಂಖ್ಯೆಯಲ್ಲಿ ಇದ್ದಾರೆ ಎಂದು ನೋಡಿಕೊಂಡು ಜನವರಿಯಿಂದ ಪಿಎಚ್‌.ಡಿ ಕೋರ್ಸ್‌ ಶುರು ಮಾಡಲಾಗುವುದು,'' ಎಂದು ಮುಕ್ತ ವಿವಿ ಕುಲಪತಿ ಪ್ರೊ. ಶಿವಲಿಂಗಯ್ಯ ಅವರು 'ವಿಜಯ ಕರ್ನಾಟಕ'ಕ್ಕೆ ತಿಳಿಸಿದರು.

''2017ರ ಯುಜಿಸಿ ನಿಯಮಾವಳಿಗೆ ಅನುಗುಣವಾಗಿ 2019-20ನೇ ಸಾಲಿನಲ್ಲಿ ಬಿಎಸ್ಸಿ, ಬಿಬಿಎ, ಬಿಎಸ್‌ಡಬ್ಲ್ಯೂ, ಎಂಎಸ್‌ಡಬ್ಲ್ಯೂ, ಎಂಎಸ್ಸಿ (ಸಸ್ಯಶಾಸ್ತ್ರ), ಎಂಎಸ್ಸಿ (ಪ್ರಾಣಿಶಾಸ್ತ್ರ), ಎಂಎ ಎಜುಕೇಶನ್‌ ಕೋರ್ಸ್‌ ಪ್ರಾರಂಭಿಸಲು ಈಗಿನಿಂದಲೇ ಅಗತ್ಯ ಸಿದ್ಧತೆ ಮಾಡಿಕೊಳ್ಳಲಾಗುತ್ತಿದೆ. ಸೂಕ್ತ ದಾಖಲೆಯನ್ನು ಯುಜಿಸಿಗೆ ಕಳುಹಿಸಿ ಅನುಮತಿ ಪಡೆದು ಮುಂದಿನ ವರ್ಷದಿಂದ ಪ್ರಾರಂಭಿಸಲಾಗುವುದು. ಅ.30ರಂದು ಈಗಾಗಲೇ ಅಕಾಡೆಮಿ ಕೌನ್ಸಿಲ್‌ ಸಭೆ ನಡೆಸಲಾಗಿದೆ. ಅಲ್ಲದೆ, ಡಿಪ್ಲೋಮಾ ಹಾಗೂ ಪಿಜಿ ಡಿಪ್ಲೋಮಾ ಕೋರ್ಸ್‌ಗಳನ್ನು ಆರಂಭಿಸಲು ಅನುಮತಿ ಸಿಕ್ಕಿದೆ,'' ಎಂದು ಹೇಳಿದರು.
ಜನವರಿಯಿಂದ ಬಿ.ಇಡಿ ಪ್ರವೇಶ: ''ಜನವರಿಯಿಂದ ಎಂಬಿಎ, ಬಿ.ಇಡಿ ಪ್ರವೇಶ ಪ್ರಾರಂಭಿಸಲಾಗುವುದು. ಇದಕ್ಕೆ ಯುಜಿಸಿ ಈಗಾಗಲೇ ಅನುಮತಿ ನೀಡಿದೆ. ಇದಕ್ಕಾಗಿ ನವೆಂಬರ್‌ನಿಂದಲೇ ಪ್ರಕಟಣೆ ಹೊರಡಿಸಲಾಗುವುದು,'' ಎಂದು ಕುಲಪತಿ ಪ್ರೊ. ಶಿವಲಿಂಗಯ್ಯ ತಿಳಿಸಿದ್ದಾರೆ.