ಹೌದು, ನಗರದ ರೈಲು ನಿಲ್ದಾಣದ ಬಳಿಯಿರುವ ರೈಲ್ವೆ ವಸ್ತು ಸಂಗ್ರಹಾಲಯದಲ್ಲಿ ಹೊಸ ತೆರನಾದ ರೆಸ್ಟೋರೆಂಟ್ ಆರಂಭವಾಗಿದೆ. ಇತ್ತೀಚಿನ ದಿನಗಳಲ್ಲಿ ವಸ್ತು ಸಂಗ್ರಹಾಲಯಕ್ಕೆ ಭೇಟಿ ನೀಡುವವರ ಸಂಖ್ಯೆ ಹೆಚ್ಚುತ್ತಿದ್ದು, ಭಾರತೀಯ ರೈಲ್ವೆಯ ವಿಕಾಸದ ಕಥೆಯನ್ನು ವಸ್ತು ಸಂಗ್ರಹಾಲಯದಲ್ಲಿ ಹೊರ ತಂದ ರೀತಿಗೆ ಹಲವಾರು ಸಂದರ್ಶಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಈ ನಡುವೆ ರೈಲ್ವೆ ಕೋಚ್‌ನಲ್ಲಿಯೇ ರೆಸ್ಟೋರೆಂಟ್ ಸಹ ವಿನೂತನವಾಗಿ ಆರಂಭಗೊಂಡಿದೆ. ಇಲ್ಲಿ ಒಂದು ಬಾರಿಗೆ ಮೂರರಿಂದ ನಾಲ್ಕು ಕುಟುಂಬಗಳಿಗೆ ಆತಿಥ್ಯ ನೀಡುವ ಸಾರ್ಮಥ್ಯ ಹೊಂದಿದೆ.
ಲಾಭ ಬೇಕಿಲ್ಲ, ಶುಚಿ-ರುಚಿಗೆ ಆದ್ಯತೆ
ಶುಚಿಯಾಗಿ ಆರೋಗ್ಯಕರವಾಗಿ ತಯಾರಿಸಿದ ತಿಂಡಿಗಳು, ಲಘು ಉಪಹಾರಗಳು ಮತ್ತು ಇಲ್ಲಿ ನೀಡಲಾಗುವ ಕಾಫಿ ಮತ್ತು ಚಹಾದಂತಹ ಪಾನೀಯಗಳನ್ನು ಆನಂದಿಸಿ ಪ್ರವಾಸಿಗರು ಹೊಸ ಅನುಭವ ಪಡೆಯಬಹುದಾಗಿದೆ. ಈ ಕೆಫೆಟೇರಿಯಾವನ್ನು ಮೈಸೂರು ವಿಭಾಗದ ವಿಭಾಗೀಯ ರೈಲ್ವೆ ವ್ಯವಸ್ಥಾಪಕರಾದ ಅಪರ್ಣ ಗರ್ಗ್ ಅವರು ಉದ್ಘಾಟಿಸಿದರು. ಈ ಕೋಚ್ ರೆಸ್ಟೋರೆಂಟ್ ಲಾಭ ರಹಿತ-ನಷ್ಟವಿಲ್ಲದ ಮಾದರಿಯಲ್ಲಿ ಕಾರ್ಯನಿರ್ವಹಿಸಲಿದ್ದು, ಸಾರ್ವಜನಿಕರು ಇದರ ಸದುಪಯೋಗಪಡಿಸಿಕೊಳ್ಳುವಂತೆ ತಿಳಿಸಿದ್ದಾರೆ.
ರೈಲ್ವೆ ವಿಕಾಸದ ಜೊತೆ ಸವಿರುಚಿಯ ಖಾದ್ಯ..!
ಪುನಶ್ಚೇತನಗೊಂಡಿರುವ ನಗರದ ರೈಲ್ವೆ ವಸ್ತುಸಂಗ್ರಹಾಲಯದಲ್ಲಿ ರೈಲು ಕೋಚ್ ಕೆಫೆಟೇರಿಯಾ ಇದೀಗ ಸಾರ್ವಜನಿಕರ ಹೊಸ ಆಕರ್ಷಣೆಯ ಕೇಂದ್ರವಾಗಲಿದೆ. ಭಾರತೀಯ ರೈಲ್ವೆಯ ವಿಕಾಸದ ಕಥೆಯನ್ನು ಜೀವಂತವಾಗಿ ಹೊರತಂದಿರುವ ರೀತಿ ಈಗಾಗಲೇ ಹಲವು ಸಂದರ್ಶಕರ ಮೆಚ್ಚುಗೆಗೆ ಪಾತ್ರವಾಗಿದೆ. ಪಾರಂಪರಿಕ ಬೋಗಿ ಮತ್ತು ರೈಲು ಗಾಡಿಗಳಿಗೆ ಸಮಕಾಲೀನ ಕಲೆ, ಬಹುಮಾಧ್ಯಮ, ವಿಡಿಯೋ ಮತ್ತು ಧ್ವನಿಯನ್ನು ಅಳವಡಿಸಿರುವುದು ಹೆಚ್ಚು ಆಕರ್ಷಣೀಯವಾಗಿದೆ.
ಕೋಚ್ ರೆಸ್ಟೋರೆಂಟ್ ಸ್ಪೆಷಾಲಿಟಿ ಏನು..?
ರೈಲ್ವೆ ಸಂಗ್ರಹಾಲಯಕ್ಕೆ ಹೊಸ ಮೆರುಗು ತುಂಬುತ್ತಿದೆ ಕೋಚ್ ಕೆಫೆಟೇರಿಯಾ ರೆಸ್ಟೋರೆಂಟ್. ರೈಲ್ವೆ ಇಲಾಖೆ ಕುರಿತು ವಿಶಿಷ್ಟ ಮಾಹಿತಿಗಳನ್ನು ತಿಳಿದುಕೊಳ್ಳಲು ಬರುವವರಿಗೆ ಈ ರೈಲು ಕೋಚ್ ಕೆಫೆಟೇರಿಯಾ ಹೊಸ ಆಕರ್ಷಣೆಯಾಗಿದೆ. ಬಗೆಬಗೆಯ ಖಾದ್ಯಗಳನ್ನು ಇಲ್ಲಿ ಉಣಬಡಿಸಲಾಗುತ್ತಿದೆ. ಕೋಚ್ ರೆಸ್ಟೋರೆಂಟ್ ಒಂದು ಬಾರಿಗೆ ಮೂರರಿಂದ ನಾಲ್ಕು ಕುಟುಂಬಗಳಿಗೆ ಆತಿಥ್ಯ ವಹಿಸಬಲ್ಲದು.
ಕೋಚ್ ರೆಸ್ಟೋರೆಂಟ್ ಉದ್ಘಾಟನೆ
ಮೈಸೂರು ವಿಭಾಗದ ವಿಭಾಗೀಯ ರೈಲ್ವೆ ವ್ಯವಸ್ಥಾಪಕಿ ಮತ್ತು ನೈಋುತ್ಯ ರೈಲ್ವೆ ಮಹಿಳಾ ಕಲ್ಯಾಣ ಸಂಸ್ಥೆಯ ಅಧ್ಯಕ್ಷೆ ಅಪರ್ಣ ಗರ್ಗ್ ಅವರು ಈ ಕೋಚ್ ರೆಸ್ಟೋರೆಂಟ್ ಉದ್ಘಾಟಿಸಿದರು. ''ಈ ಕೋಚ್ ರೆಸ್ಟೋರೆಂಟ್ ಎಸ್‌ಡಬ್ಲ್ಯುಆರ್‌ಡಬ್ಲ್ಯುಡಬ್ಲ್ಯುಒ ಪದಾಧಿಕಾರಿಗಳ ಆಶ್ರಯದಲ್ಲಿ ಲಾಭರಹಿತ-ನಷ್ಟವಿಲ್ಲದ ಮಾದರಿಯಲ್ಲಿ ಕಾರ್ಯ ನಿರ್ವಹಿಸಲಿದೆ'' ಎಂದು ಅವರು ತಿಳಿಸಿದರು. ಈ ಸಂದರ್ಭದಲ್ಲಿ ಪದಾಧಿಕಾರಿಗಳು ಹಾಗೂ ವಿಭಾಗದ ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು.