ಬಂಡೀಪುರದಲ್ಲಿಸೆರೆ ಸಿಕ್ಕ ಹುಲಿ ಚೇತರಿಕೆ

ಮೈಸೂರು: ಮಾನವ-ಪ್ರಾಣಿ ಸಂಘರ್ಷ ಕಾರ್ಯಾಚರಣೆಯಡಿ ಬಂಡೀಪುರ ಹುಲಿ ಸಂರಕ್ಷಿತ ಪ್ರದೇಶ ವ್ಯಾಪ್ತಿಯಲ್ಲಿಸೆರೆ ಹಿಡಿದು ಮೃಗಾಲಯಕ್ಕೆ ಹಸ್ತಾಂತರಿಸಲಾಗಿರುವ ಹುಲಿಯು ಸದ್ಯ ಚೇತರಿಸಿಕೊಳ್ಳುತ್ತಿದೆ.

ಬೆಂಗಳೂರಿನ ಪ್ರಧಾನ ಮುಖ್ಯ ಅರಣ್ಯ ಸಂರಕ್ಷಣಾಧಿಕಾರಿ, ಮುಖ್ಯ ವನ್ಯಜೀವಿ ಪಾಲಕರ ಆದೇಶದಂತೆ ಮಾನವ-ಪ್ರಾಣಿ ಸಂಘರ್ಷ ಕಾರ್ಯಾಚರಣೆಯಡಿ ಬಂಡೀಪುರ ಹುಲಿ ಸಂರಕ್ಷಿತ ಪ್ರದೇಶದಲ್ಲಿ ಕಾಣಿಸಿಕೊಂಡಿದ್ದ ಗಂಡು ಹುಲಿಯನ್ನು ಸತತ 5 ದಿನಗಳ ಕಾರ್ಯಾಚರಣೆ ಬಳಿಕ ಭಾನುವಾರ ಸೆರೆ ಹಿಡಿಯಲಾಗಿದೆ.

ನಂತರ ಅದನ್ನು ಮೈಸೂರಿನ ಶ್ರೀ ಚಾಮರಾಜೇಂದ್ರ ಮೃಗಾಲಯ ಸುಪರ್ದಿಗೆ ನೀಡಲಾಗಿದೆ. ಅಂತೆಯೆ ಹುಲಿಯನ್ನು ಮೃಗಾಲಯದ ವ್ಯಾಪ್ತಿಗೊಳಪಡುವ ಮೈಸೂರಿನ ಕೂರ್ಗಳ್ಳಿಯಲ್ಲಿರುವ ಚಾಮುಂಡಿ ವನ್ಯಜೀವಿ ರಕ್ಷಣೆ, ಸಂರಕ್ಷಣೆ ಮತ್ತು ಪುನರ್ವಸತಿ ಕೇಂದ್ರದಲ್ಲಿಟ್ಟು ಪಾಲನೆ ಮಾಡಲಾಗುತ್ತಿದೆ. ಹುಲಿಯ ಆರೋಗ್ಯ ಸ್ಥಿರ ವಾಗಿದ್ದು, ವೈದ್ಯಕೀಯ ನಿಗಾದಲ್ಲಿಇರಿಸಲಾಗಿದೆ ಎಂದು ಮೃಗಾಲಯ ಕಾರ್ಯ ನಿರ್ವಾಹಕ ನಿರ್ದೇಶಕ ಅಜಿತ್‌ ಕುಲಕರ್ಣಿ ತಿಳಿಸಿದ್ದಾರೆ.

ಹುಲಿಗೆ ಸುಮಾರು 4-5 ವರ್ಷ ವಯಸ್ಸಾಗಿದೆ ಎಂದು ಅಂದಾಜಿಸಲಾಗಿದ್ದು, ಆರೋಗ್ಯ ಸ್ಥಿರವಾಗಿದೆ. ಹುಲಿಯ ಮೈಮೇಲೆ ಯಾವುದೇ ಗಾಯದ ಗುರುತುಗಳಿಲ್ಲ. ಹುಲಿಯು ಸೋಮವಾರ ಬೆಳಗ್ಗೆ ಆಹಾರವನ್ನು ಸೇವಿಸಿದೆ. ಹುಲಿಯನ್ನು ಬೋನಿನಲ್ಲಿಕೂಡಿ ಹಾಕಿದ್ದರಿಂದ ಆತಂಕಗೊಂಡಿದ್ದು, ರಾತ್ರಿಯಿಡಿ ಘರ್ಜಿಸಿ ಪ್ರತಿರೋಧ ವ್ಯಕ್ತಪಡಿಸಿದೆ.

ವಾತಾವರಣಕ್ಕೆ ಒಗ್ಗಲು ಹಲವು ದಿನಗಳು ಬೇಕಾಗುವುದರಿಂದ ಸೂಕ್ಷತ್ರ್ಮವಾಗಿ ಗಮನಿಸಲಾಗುತ್ತಿದೆ. ಬೋನ್‌ ಸುತ್ತಲೂ ಹಸಿರು ಬಣ್ಣದ ಪರದೆ ಬಿಡಲಾಗಿದ್ದು, ಸಿಬ್ಬಂದಿ ಸಂಚರಿಸದಂತೆ ಸೂಚನೆ ನೀಡಲಾಗಿದೆ. ಸಾರ್ವಜನಿಕರ ಪ್ರವೇಶವನ್ನು ನಿಷೇಧಿಸಲಾಗಿದೆ.