ಮೈಸೂರು: ತಿ.ನರಸೀಪುರ ಠಾಣೆಯಲ್ಲಿ ರೈಫಲ್‌ ಬುಲೆಟ್‌ ನಾಪತ್ತೆ!

ಮೈಸೂರು: ಮೈಸೂರು ಜಿಲ್ಲೆಯ ತಿ.ನರಸೀಪುರ ಪೊಲೀಸ್‌ ಠಾಣೆಯಲ್ಲಿ ಇರಿಸಿದ್ದ ಪಾಯಿಂಟ್‌ 303 ರೈಫೆಲ್ಸ್‌ನ 50 ಬುಲೆಟ್‌ಗಳು ನಾಪತ್ತೆಯಾಗಿರುವ ಘಟನೆ ಬೆಳಕಿಗೆ ಬಂದಿದೆ. ಜಿಲ್ಲೆ ಸಶಸ್ತ್ರ ಮೀಸಲು ಪಡೆಯ ಪೊಲೀಸ್‌ ಅಧಿಕಾರಿಗಳ ತಪಾಸಣೆ ವೇಳೆ ಬುಲೆಟ್‌ಗಳು ನಾಪತ್ತೆಯಾಗಿರುವುದು ಬೆಳಕಿಗೆ ಬಂದಿದೆ.

ಠಾಣೆಯಲ್ಲಿ ಕರ್ತವ್ಯ ನಿರ್ವಹಿಸುವ ಪೊಲೀಸ್‌ ಸಿಬ್ಬಂದಿಗೆ ಬ್ರಿಟಿಷ್‌ ಕಾಲದ ರೈಫಲ್‌ಗಳನ್ನು ನೀಡಲಾಗಿದ್ದು, ತುರ್ತು ಕಾರ್ಯಾಚರಣೆ ವೇಳೆ ಬಳಸಲು ಬುಲೆಟ್‌ಗಳನ್ನು ಸಹ ನೀಡಲಾಗಿತ್ತು. ಪ್ರತಿ ವರ್ಷದ ಡಿಎಆರ್‌ನ ಪೊಲೀಸ್‌ ಅಧಿಕಾರಿಗಳು ಪ್ರತಿ ಠಾಣೆಗೆ ತೆರಳಿ, ಶಸ್ತ್ರಾಸ್ತ್ರಗಳ ಬಗ್ಗೆ ಮಾಹಿತಿ ಪಡೆಯುತ್ತಾರೆ. ಅದರಂತೆ ಶನಿವಾರ ಕೂಡ ತಪಾಸಣೆ ನಡೆಸಿದ್ದು, 50 ಬುಲೆಟ್‌ಗಳು ನಾಪತ್ತೆಯಾಗಿರುವುದು ಕಂಡುಬಂದಿದೆ.

ತಕ್ಷಣ ಎಸ್ಪಿ ಅವರ ಗಮನಕ್ಕೆ ತಂದರು. ಠಾಣೆಯಲ್ಲಿ ಶೋಧ ಕಾರ್ಯ ನಡೆಸಿದರೂ ಬುಲೆಟ್‌ಗಳು ಸಿಗಲಿಲ್ಲ. ಎಸ್ಪಿ ರಿಷ್ಯಂತ್‌ ತನಿಖೆಗೆ ಆದೇಶ ಮಾಡಿದ್ದಾರೆ. ತಿ.ನರಸೀಪುರ ಪೊಲೀಸ್‌ ಠಾಣೆಯಲ್ಲಿ ಪಾಯಿಂಟ್‌ 303 ರೈಫಲ್‌ನ ಬುಲೆಟ್‌ಗಳು ನಾಪತ್ತೆಯಾಗಿರುವುದು ಡಿಎಆರ್‌ನ ಪೊಲೀಸ್‌ ಅಧಿಕಾರಿಗಳ ತಪಾಸಣೆ ವೇಳೆ ಪತ್ತೆಯಾಗಿದೆ. ಈ ಸಂಬಂಧ ತನಿಖೆಗೆ ಆದೇಶಿಸಲಾಗಿದೆ. -ಸಿ.ಬಿ.ರಿಷ್ಯಂತ್‌, ಎಸ್ಪಿ.