ಅಧಿಕಾರಿಗಳಿಗೆ ಬಿಸಿ ಮುಟ್ಟಿಸಿದ ಸಾರಾ

ಮೈಸೂರು: ''ಒಂದು ತಿಂಗಳು ಚುನಾವಣೆ, ಇನ್ನೊಂದು ತಿಂಗಳು ರೆಸ್ಟಾ? ನಿಮ್ಮ ಕೈಯಲ್ಲಿ ಆಗದಿದ್ದರೆ ವರ್ಗಾವಣೆ ಮಾಡಿಸಿಕೊಂಡು ಹೋಗಿ'' ಎಂದು ಪ್ರವಾಸೋದ್ಯಮ ಖಾತೆ ಸಚಿವ ಸಾ.ರಾ.ಮಹೇಶ್‌ ಅಧಿಕಾರಿಗಳನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡರು.

ಜಿಲ್ಲಾ ಪಂಚಾಯಿತಿ ಸಭಾಂಗಣದಲ್ಲಿ ಜಿಲ್ಲಾ ಉಸ್ತುವಾರಿ ಸಚಿವ ಜಿ.ಟಿ.ದೇವೇಗೌಡ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ಅಧಿಕಾರಿಗಳ ಕಾರ್ಯವೈಖರಿಯನ್ನು ಮಹೇಶ್‌ ಖಂಡಿಸಿದರು.

''ಎಡಿಸಿ, ನೀವು ಎಷ್ಟು ಸಭೆಗಳನ್ನು ಮಾಡಿದ್ದೀರಿ? ಯಾವ ಪ್ರದೇಶಕ್ಕೆ ತೆರಳಿದ್ದೀರಿ?'' ಎಂದು ಪ್ರಶ್ನಿಸಿದರು. ಇದಕ್ಕೆ ಉತ್ತರಿಸಿದ ಹೆಚ್ಚುವರಿ ಜಿಲ್ಲಾಧಿಕಾರಿ ಜಿ.ಅನುರಾಧ, ''ಹುಣಸೂರಿಗೆ ತೆರಳಿದ್ದೇನೆ. ಉಳಿದ ಭಾಗಗಳಲ್ಲಿ ತೆರಳಲು ಸಾಧ್ಯವಾಗಲಿಲ್ಲ. ಚುನಾವಣೆ ಕಾರ್ಯ ಇತ್ತು'' ಎಂದು ಹೇಳಿದರು. ''ಚುನಾವಣೆ ಕೆಲಸ ಜಿಲ್ಲಾಧಿಕಾರಿಗೆ ಇರುತ್ತದೆ. ನೀವು ಕುಡಿಯುವ ನೀರಿನ ಸಮಸ್ಯೆ ಬಗೆಹರಿಸಬಹುದಿತ್ತು. ಅಧಿಕಾರಿಗಳ ಸಭೆ ನಡೆಸಬಹುದಿತ್ತು'' ಎಂದು ಸಚಿವರು ಹೇಳಿದರು. ''ನಾನು ಸಹಾಯಕ ಚುನಾವಣಾಧಿಕಾರಿಯಾಗಿದ್ದು, ನಮ್ಮದೇ ಆದ ಕರ್ತವ್ಯ ಇರುತ್ತದೆ'' ಎಂದು ಅನುರಾಧ ಸಮರ್ಥನೆ ನೀಡಿದರು.

ಇದಕ್ಕೂ ಮುನ್ನ ಜಿಲ್ಲಾ ಕೃಷಿ ಇಲಾಖೆ ಉಪ ನಿರ್ದೇಶಕರಾದ ಚಂದ್ರಕಲಾರನ್ನು ಸಚಿವರು ತರಾಟೆಗೆ ತೆಗೆದುಕೊಂಡರು. ''ಕಚೇರಿಯಲ್ಲಿ ಕುಳಿತುಕೊಂಡರೆ ರೈತರ ಸಮಸ್ಯೆ ಬಗೆಹರಿಯುವುದಿಲ್ಲ. ಇದರಿಂದಾಗಿ ರಾಜ್ಯದ ರೈತರು ಸುಭೀಕ್ಷರಾಗಿದ್ದಾರೆ. ಎಷ್ಟು ಗ್ರಾಮಗಳಿಗೆ ತೆರಳಿದ್ದೀರಿ ಎನ್ನುವುದರ ವಿವರ ಕೊಡಿ. ಕೃಷಿ ಇಲಾಖೆ ಅಧಿಕಾರಿಗಳ ಜವಾಬ್ದಾರಿ ಹೆಚ್ಚಿದೆ ಎನ್ನುವುದನ್ನು ತಿಳಿದುಕೊಳ್ಳಬೇಕು'' ಎಂದರು. ಇದಕ್ಕೆ ಪ್ರತಿಕ್ರಿಯಿಸಿದ ಚಂದ್ರಕಲಾ, ''ನಾನು ಬಂದು ಎರಡು ತಿಂಗಳಾಗಿದೆ. ಇಲ್ಲಿತನಕ ಚುನಾವಣೆ ಕಾರ್ಯ ಇತ್ತು. ಮುಂದೆ ಎಲ್ಲಾ ಕಡೆ ಭೇಟಿ ನೀಡುತ್ತೇನೆ'' ಎಂದು ಹೇಳಿದರು.