ನಂಜನಗೂಡಿನಲ್ಲಿ ವಾಲಿಬಾಲ್‌ ಆಟವಾಡಿ ಸಂಭ್ರಮಿಸಿದ ಸಿದ್ದರಾಮಯ್ಯ

ನಂಜನಗೂಡು: ಭಾರತ್‌ ಐಕ್ಯತಾ ಪಾದಯಾತ್ರೆಯಲ್ಲಿ ಆಗಮಿಸುವ ಕಾಂಗ್ರೆಸ್‌ ವರಿಷ್ಠ ರಾಹುಲ್‌ ಗಾಂಧಿ ಅ. 2ರಂದು ನಂಜನಗೂಡು ತಾಲೂಕಿನ ಬದನವಾಳಿನಲ್ಲಿ ನಡೆಯಲಿರುವ ಗಾಂಧಿ ಜಯಂತಿ ಕಾರ‍್ಯಕ್ರಮದಲ್ಲಿ ಭಾಗಿಯಾಗಲಿದ್ದು, ಈ ಹಿನ್ನೆಲೆಯಲ್ಲಿ ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಬುಧವಾರ ಬದನವಾಳು ಗ್ರಾಮದ ಖಾದಿ ಕೇಂದ್ರಕ್ಕೆ ಭೇಟಿ ನೀಡಿ ಸಿದ್ಧತೆಗಳನ್ನು ಪರಿಶೀಲಿಸಿದರು.


ಬಳಿಕ ಸಿದ್ದರಾಮಯ್ಯ ಪಕ್ಷದ ಮುಖಂಡರೊಂದಿಗೆ ಬದನವಾಳು ಗ್ರಾಮದಲ್ಲಿ ಸುತ್ತು ಹಾಕಿದರು. ಈ ಸಂದರ್ಭ ಸ್ಥಳೀಯ ಯುವಕರೊಡನೆ ವಾಲಿಬಾಲ್‌ ಆಟವಾಡುವ ಮೂಲಕ ಉತ್ಸಾಹ ತುಂಬಿದರು. ರಾಜಕೀಯ ಜಂಜಾಟದ ಒತ್ತಡದಲ್ಲೇ ಇರುವ ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯನವರು ಗ್ರಾಮದ ಯುವಕರು ವಾಲಿಬಾಲ್‌ ಆಡುತ್ತಿರುವುದನ್ನು ಗಮನಿಸಿ ಕುತೂಹಲದಿಂದ ಅವರ ಸಮೀಪಕ್ಕೆ ತೆರಳಿದರು.

ಈ ವೇಳೆ ಜೊತೆಯಲ್ಲಿದ್ದವರ ಒತ್ತಡಕ್ಕೆ ಮಣಿದು ವಾಲಿಬಾಲ್‌ ಅನ್ನು ಎರಡು ಬಾರಿ ಸವ್‌ರ್‍ ಮಾಡುವ ಮೂಲಕ ಆಟಗಾರರಿಗೆ ಉತ್ಸಾಹ ತುಂಬಿದರು. ಈ ವೇಳೆ ಸ್ಥಳೀಯರು ಚಪ್ಪಾಳೆ ಹಾಗೂ ಶಿಳ್ಳೆಯ ಮೂಲಕ ಹುರಿದುಂಬಿಸಿದರು. ಜತೆಯಲ್ಲಿದ್ದ ಕೆಪಿಸಿಸಿ ಕಾರ್ಯಾಧ್ಯಕ್ಷ ಆರ್‌.ಧ್ರುವನಾರಾಯಣ ಅವರೂ ವಾಲಿಬಾಲ್‌ ಸವ್‌ರ್‍ ಮಾಡುವ ಮೂಲಕ ಗಮನ ಸೆಳೆದರು.


ಈ ಸಂದರ್ಭ ಮಾಜಿ ಸಚಿವ ಎಚ್‌.ಸಿ.ಮಹದೇವಪ್ಪ, ವರುಣಾ ಕ್ಷೇತ್ರದ ಶಾಸಕ ಡಾ.ಯತೀಂದ್ರ ಸಿದ್ದರಾಮಯ್ಯ, ಮಾಜಿ ಶಾಸಕ ಕಳಲೆ ಎನ್‌.ಕೇಶವಮೂರ್ತಿ, ಕಾಂಗ್ರೆಸ್‌ ಜಿಲ್ಲಾಧ್ಯಕ್ಷ ಡಾ.ಬಿ.ಜೆ.ವಿಜಯಕುಮಾರ್‌ ಸೇರಿದಂತೆ ಇತರರಿದ್ದರು.