ಮೈಸೂರು: ಕುಕ್ಕರಹಳ್ಳಿ ಕೆರೆಯಲ್ಲಿ ಸಾಲುಸಾಲಾಗಿ ಸಾಯುತ್ತಿರುವ ಮೀನುಗಳ ರಕ್ಷಣೆಗೆ ಟೆಂಡರ್‌ ಕರೆಯಲು ಚುನಾವಣಾ ಆಯೋಗ ಅನುಮತಿ ನೋಡಿದೆ.
ಕೆರೆಯಲ್ಲಿ 20 ದಿನಗಳಿಂದ ಮೀನುಗಳು ನಿರಂತರವಾಗಿ ಸಾಯುತ್ತಿದ್ದವು. ಕೆರೆಯಲ್ಲಿ ನೀರಿನ ಮಟ್ಟ ಕ್ಷೀಣಿಸಿರುವುದು ಮತ್ತು ಹೂಳು ತೆಗೆಯದಿರುವುದು ಇದಕ್ಕೆ ಕಾರಣ ಎಂಬುದು ತಜ್ಞರ ಅಭಿಮತವಾಗಿತ್ತು. 9 ತಿಂಗಳು ಆದರೂ ಕೆರೆಯಲ್ಲಿ ಮೀನು ಹಿಡಿದಿರಲಿಲ್ಲ. ಮೈಸೂರು ವಿಶ್ವವಿದ್ಯಾನಿಲಯವು ಮೀನು ಹರಾಜು ಹಾಕಿ ಇ-ಟೆಂಡರ್‌ ಕರೆಯಲು ಚುನಾವಣೆಯ ನೀತಿ ಸಂಹಿತೆ ಅಡ್ಡಿಯಾಗಿದೆ ಎಂದಿತ್ತು. ಈ ಕುರಿತು ವಿಜಯ ಕರ್ನಾಟಕ ''ಕುಕ್ಕರಹಳ್ಳಿ ಕೆರೆ ಮೀನು ರಕ್ಷಣೆಗೆ ನೀತಿ ಸಂಹಿತೆ ಅಡ್ಡಿ!'' ಶೀರ್ಷಿಕೆಯಡಿ ವರದಿ ಪ್ರಕಟಿಸಿ ವಿಶ್ವವಿದ್ಯಾಲಯ ಮತ್ತು ಚುನಾವಣೆ ಆಯೋಗವನ್ನು ಗಮನ ಸೆಳೆದಿತ್ತು. ಈ ಹಿನ್ನೆಲೆಯಲ್ಲಿ ಕೆರೆಯಲ್ಲಿ ಗುತ್ತಿಗೆ ಮುಂದುವರಿಸುವಂತೆ ಅಥವಾ ಅವಕಾಶವಿಲ್ಲದೆ ಇದ್ದಲ್ಲಿ ಹೊಸ ಟೆಂಡರ್‌ ಮೂಲಕ ನಡೆಸುವಂತೆ ಮುಖ್ಯಚುನಾವಣೆ ಅಧಿಕಾರಿ ಅನುಮತಿ ನೀಡಿದ್ದಾರೆ. ಮಾದರಿ ನೀತಿ ಸಂಹಿತೆ ಜಾರಿಯಲಿದ್ದು, ಸಂಹಿತೆ ಉಲ್ಲಂಘನೆ ಆಗದಂತೆ ಗುತ್ತಿಗೆ ನಡೆಸಬಹುದು ಎಂದು ಹೆಚ್ಚುವರಿ ಮುಖ್ಯ ಚುನಾವಣಾಧಿಕಾರಿ, ಜಿಲ್ಲಾಧಿಕಾರಿಗೆ ಪತ್ರ ಬರೆದಿದ್ದಾರೆ.