ಸಂವಿಧಾನ ಓದು ಇಂದಿನ ಅಗತ್ಯ

ಮೈಸೂರು: ಭಾರತದ ಸಂವಿಧಾನವನ್ನು ಪ್ರತಿಯೊಬ್ಬರೂ ಓದುವುದು ಹಿಂದೆಂದಿಗಿಂತಲೂ ಈಗ ಅತ್ಯಂತ ಅಗತ್ಯವಾಗಿದೆ ಎಂದು ನ್ಯಾಯಮೂರ್ತಿ ಎಚ್‌.ಎನ್‌. ನಾಗಮೋಹನ್‌ ದಾಸ್‌ ತಿಳಿಸಿದರು.

ಆಡಳಿತ ತರಬೇತಿ ಸಂಸ್ಥೆಯಲ್ಲಿ ಗುರುವಾರ ಆಯೋಜಿಸಿದ್ದ 'ಸಂವಿಧಾನ ಓದು ಮತ್ತು ಸಾಮಾಜಿಕ ನ್ಯಾಯ' ಕುರಿತು ನಡೆದ ಸಂವಾದ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

''ಸಂವಿಧಾನವನ್ನು ಅರ್ಥಮಾಡಿಕೊಳ್ಳಬೇಕಾದರೆ ಮೊದಲು ನಾವು ಭಾರತವನ್ನು ಓದಿ ಅರ್ಥ ಮಾಡಿಕೊಳ್ಳಬೇಕು. ಭಾರತವನ್ನು ಸರಿಯಾಗಿ ಓದದಿದ್ದರೆ ಸಂವಿಧಾನದ ಆಶಯ ಮತ್ತು ಪಾವಿತ್ರ್ಯತೆ ಅರ್ಥವಾಗುವುದಿಲ್ಲ,'' ಎಂದು ಹೇಳಿದರು.

''ಹಿಂದೂಗಳಿಗೆ ಪವಿತ್ರ ಗ್ರಂಥವಾಗಿ ಭಗವದ್ಗೀತೆ, ಮುಸ್ಲಿಮರಿಗೆ ಖುರಾನ್‌, ಸಿಖ್ಖರಿಗೆ ಗ್ರಂಥ ಸಾಹೇಬ, ಕೈಸ್ತರಿಗೆ ಬೈಬಲ್‌... ಹೀಗೆ ನಾನಾ ಧರ್ಮಗಳಿಗೆ ವಿವಿಧ ಗ್ರಂಥಗಳಿವೆ. ಈ ಎಲ್ಲ ಧರ್ಮೀಯರು ನೆಲಸಿರುವ ಭಾರತಕ್ಕೆ ಸಂವಿಧಾನವೇ ಪವಿತ್ರ ಗ್ರಂಥ,'' ಎಂದರು.

''ಭಾರತಕ್ಕೆ ಸುಮಾರು 5 ಸಾವಿರ ವರ್ಷಗಳಿಂದ ಹಲವು ಜನಾಂಗದವರು ಹಲವಾರು ಭಾಷಿಕರು ವಲಸೆ ಬಂದು ನೆಲೆಸಿದ್ದಾರೆ. ಹಾಗಾಗಿ ವಿವಿಧ ಜಾತಿ, ಭಾಷೆ, ಬಣ್ಣ ಮುಂತಾದ ವೈವಿಧ್ಯತೆಯುಳ್ಳ ಜನರು ಇದ್ದಾರೆ. ಇವರೆಲ್ಲರ ಗೌರವಯುತ ಬದುಕಿಗೆ ಸಂವಿಧಾನ ಆಧಾರವಾಗಿದೆ,'' ಎಂದರು. ''ಭಾರತ ಸಂವಿಧಾನದಲ್ಲಿ 60ಕ್ಕೂ ಹೆಚ್ಚು ದೇಶಗಳ ಸಂವಿಧಾನದ ಒಳ್ಳೆಯ ಅಂಶಗಳನ್ನು ತೆಗೆದುಕೊಳ್ಳಲಾಗಿದೆ. ಅದರಲ್ಲೂ ಮುಖ್ಯವಾಗಿ ಅಮೆರಿಕದ ನಾಗರಿಕ ಹೋರಾಟ, ಫ್ರಾನ್ಸಿನ ಕ್ರಾಂತಿಯ ಭ್ರಾತೃತ್ವ, ಸಮಾನತೆ, ರಷ್ಯಾದ ಲೆನಿನ್‌ ತತ್ವದ ಕಾರ್ಮಿಕರ ಮಹತ್ವವನ್ನು ಒಳಗೊಂಡ ಸಮಾಜವಾದಿ ತತ್ತ್ವವನ್ನು ಸೇರಿಸಲಾಗಿದೆ,'' ಎಂದರು.

ಜ್ಞಾನ ಕಡಿಮೆ: ಸಂವಿಧಾನ ಜಾರಿಗೆ ಬಂದು 68 ವರ್ಷಗಳಾದರೂ ಸಂವಿಧಾನದ ಓದು ಸರಿಯಾಗಿ ಆಗಿಲ್ಲ. ಇವತ್ತು ಕೂಡಾ ಶಾಲಾ ಕಾಲೇಜು ವಿದ್ಯಾರ್ಥಿಗಳು ಹಾಗೂ ಅಧಿಕಾರಿಗಳಿಗೆ ಸಂವಿಧಾನದ ಜ್ಞಾನ ಕಡಿಮೆ ಇದೆ,'' ಎಂದು ಹೇಳಿದರು.

ಡಿವೈಎಸ್‌ಪಿ ಪ್ರಶಿಕ್ಷ ಣಾರ್ಥಿಗಳು ಹಾಗೂ ಬಂಧಿಖಾನೆ ಅಧೀಕ್ಷ ಕ ಪ್ರಶಿಕ್ಷ ಣಾರ್ಥಿಗಳು, ಮಹಿಳಾ ಸಬಲೀಕರಣ ಮತ್ತು ಮಹಿಳಾ ಸಂವೇದನೆ ವಿಷಯದ ನಾಟಕ ಪ್ರದರ್ಶನ ಮಾಡಿದರು. ಸಾಹಿತಿ ದೇವನೂರು ಮಹಾದೇವ, ಆಡಳಿತ ತರಬೇತಿ ಸಂಸ್ಥೆಯ ಜಂಟಿ ನಿರ್ದೇಶಕರಾದ ವಿ. ಭಾಗ್ಯಲಕ್ಷ್ಮೀ ಭಾಗವಹಿಸಿದ್ದರು.