ಮದುವೆಯಲ್ಲಿ ಒಂದಾದ ಟಿಕ್‌ಟಾಕ್‌ ಜೋಡಿ

ಹುಣಸೂರು: ಟಿಕ್‌ ಟಾಕ್‌ನಲ್ಲಿ ಪರಿಚಯವಾದ ಯುವ ಜೋಡಿಯೊಂದು ಪ್ರೇಮ ಪಾಶಕ್ಕೆ ಬಿದ್ದು ಅಂತರ್‌ಜಾತಿ ಮದುವೆ ಮಾಡಿಕೊಂಡಿದ್ದಾರೆ.

ಬಾಗಲಕೋಟೆ ಜಿಲ್ಲೆಯ ಜಮಖಂಡಿಯ ಮಹದೇವ್‌ ಅವರ ಪುತ್ರಿ ಪ್ರಿಯಾಂಕ ಹಾಗೂ ಮೈಸೂರು ಜಿಲ್ಲೆಯ ಹುಣಸೂರು ತಾಲೂಕಿನ ಉಯಿಗೊಂಡನಹಳ್ಳಿಯ ಚನ್ನಕೇಶವ ಅವರ ಪುತ್ರ ಕುಮಾರ್‌ ಟಿಕ್‌ ಟಾಕ್‌ ಅಂತರಜಾತಿ ವಿವಾಹವಾದ ಜೋಡಿ.

ಒಂದು ವರ್ಷಗಳ ಹಿಂದೆ ಕುಮಾರ್‌ನ ಹಾಡುಗಳು ಟಿಕ್‌ ಟಾಕ್‌ನಲ್ಲಿ ಹರಿದಾಡುತ್ತಿದ್ದವು. ಇದನ್ನು ಲೈಕ್‌ ಮಾಡಿದ್ದ ಪ್ರಿಯಾಂಕ ನಂತರದಲ್ಲಿ ಅವರ ನಂಬರ್‌ ಪಡೆದು ಸಂಪರ್ಕಿಸಿದ್ದರು. ಈ ವೇಳೆ ಕುಮಾರ್‌ ಹಾಗೂ ಪ್ರಿಯಾಂಕರ ನಡುವೆ ಪ್ರೇಮಾಂಕುರವಾಗಿತ್ತು. ಯುವತಿಯ ತಂದೆ-ತಾಯಿ ವೃದ್ಧರಾಗಿದ್ದಾರೆ. ಕುಮಾರ್‌ ಕುಟುಂಬದವರು ಮದುವೆಗೆ ಸಮ್ಮತಿಸುತ್ತಿದ್ದಂತೆ ಪ್ರಿಯಾಂಕ ಯುವಕನ ಮನೆಗೆ ನೇರವಾಗಿ ಬಂದಿದ್ದರು.

ಕುಮಾರ್‌ ಕುಟುಂಬದವರು ದಸಂಸ ಮುಖಂಡರ ನೆರವು ಪಡೆದು ಉಪನೊಂದಣಾಧಿಕಾರಿಗಳ ಕಚೇರಿಯಲ್ಲಿ ಮದುವೆ ನೋಂದಾಯಿಸಿದರು. ಕುಮಾರ್‌-ಪ್ರಿಯಾಂಕ ಮದುವೆಯಾದರು. ನೆರೆದಿದ್ದವರಿಗೆ ಸಿಹಿ ವಿತರಿಸಿ ಸಂಭ್ರಮಿಸಿದರು.

ಟಿಕ್‌ ಟಾಕ್‌ ಜೋಡಿಗೆ ಜಿಲ್ಲಾ ಪಂಚಾಯಿತಿ ಸದಸ್ಯ ಅಮಿತ್‌ದೇವರಹಟ್ಟಿ, ಮಾಜಿ ಸದಸ್ಯ ಫಜಲುಲ್ಲಾ, ಡೀಡ್‌ನ ಡಾ.ಶ್ರೀಕಾಂತ್‌, ಮುಖಂಡರಾದ ನಿಂಗರಾಜಮಲ್ಲಾಡಿ, ಹರಿಹರಆನಂದಸ್ವಾಮಿ ಬಸವಲಿಂಗಯ್ಯ, ಬಲ್ಲೇನಹಳ್ಳಿಕೆಂಪರಾಜು, ಗಜೇಂದ್ರ, ದೇವೆಂದ್ರ, ಸಂತೋಷ್‌, ಶಿವಶೇಖರ್‌ ಕಿರಣ್‌, ಅರುಣ್‌, ಮುರುಗೇಶ್‌ ಮುಂತಾದವರು ಶುಭ ಹಾರೈಸಿದರು.