ನಾಳೆ ಫ್ಲೈ ಓವರ್‌ ಲೋಕಾರ್ಪಣೆ

ಮೈಸೂರು : ಮೈಸೂರು- ಹುಣಸೂರು ರಸ್ತೆಯ ಹಿನಕಲ್‌ ಜಂಕ್ಷನ್‌ನಲ್ಲಿ ನಿರ್ಮಿಸಿರುವ ಫ್ಲೈಓವರ್‌ ಡಿ.23 ರಂದು ಲೋಕಾರ್ಪಣೆಯಾಗಲಿದೆ.

ಅಂದು ಮಧ್ಯಾಹ್ನ 1.30ಕ್ಕೆ ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ ಉದ್ಘಾಟಿಸಲಿದ್ದಾರೆ. ಜಿಲ್ಲಾ ಉಸ್ತುವಾರಿ ಸಚಿವ ಜಿ.ಟಿ.ದೇವೇಗೌಡ ಅಧ್ಯಕ್ಷತೆ ವಹಿಸಲಿದ್ದಾರೆ. ಸಚಿವರು, ಸಂಸದರು, ಶಾಸಕರು ಭಾಗವಹಿಸಲಿದ್ದಾರೆ.

ಮುಂದಕ್ಕೆ ಹೋಗಿತ್ತು: ಡಿ.7ರಂದು ಮೇಲ್ಸೇತುವೆಯನ್ನು ಲೋಕಾರ್ಪಣೆಗೊಳಿಸಲಾಗುವುದು ಎಂದು ಸಂಸದ ಪ್ರತಾಪ ಸಿಂಹ ತಿಳಿಸಿದ್ದರು. ನಂತರ ಡಿ.16ರಂದು ಮೇಲ್ಸೇತುವೆಯನ್ನು ಸಾರ್ವಜನಿಕ ಸೇವೆಗೆ ಮುಕ್ತಗೊಳಿಸಲಾಗುವುದು ಎಂದು ತಿಳಿಸಲಾಗಿತ್ತು. ಈ ನಡುವೆ ಮೇಲ್ಸೇತುವೆ ನಿಧಾನವಾಗಿ ಕುಡುಕರ ತಾಣವಾಗಿ ಪರಿವರ್ತನೆಯಾಗುತ್ತಿತ್ತು. ಸದ್ಯ ಡಿ.23 ರಂದು ಲೋಕಾರ್ಪಣೆ ದಿನಾಂಕ ನಿಗದಿಯಾಗಿದ್ದು, ಈ ಭಾಗದ ಜನರು ನೆಮ್ಮದಿ ನಿಟ್ಟುಸಿರು ಬಿಟ್ಟಿದ್ದಾರೆ.

3 ವರ್ಷದ ಹಿಂದೆ ಆರಂಭ: ಹೊರ ರಾಜ್ಯ ಸೇರಿದಂತೆ ಮಡಿಕೇರಿ ಮೂಲಕ ಮೈಸೂರು ನಗರ ಪ್ರವೇಶಿಸಲು ಹಿನಕಲ್‌ ರಿಂಗ್‌ ರಸ್ತೆಯ ಜಂಕ್ಷನ್‌ ಪ್ರವೇಶ ಮಾರ್ಗವಾಗಿದ್ದರಿಂದ ವಾಹನ ದಟ್ಟಣೆ ಹೆಚ್ಚಾಗಿತ್ತು. ಈ ಹಿನ್ನೆಲೆಯಲ್ಲಿ ಮುಡಾ ಕೇಂದ್ರ ಸರಕಾರದ ನರ್ಮ್‌ ಯೋಜನೆಯಡಿ 19 ಕೋಟಿ ರೂ. ವೆಚ್ಚದಲ್ಲಿ ಈ ಫ್ಲೈಓವರ್‌(ಗ್ರೇಡ್‌ ಸಪರೇಟರ್‌) ನಿರ್ಮಾಣ 2016ರ ಜುಲೈನಲ್ಲಿ ಬೆಂಗಳೂರು ಮೂಲದ ಕಂಪನಿ ಗುತ್ತಿಗೆದಾರ ಸಂಸ್ಥೆ ಕಾಮಗಾರಿ ಆರಂಭಿಸಿತ್ತು.

ಕಾಮಗಾರಿ ವೆಚ್ಚ 19.83 ಕೋಟಿ ರೂ., ಫ್ಲೈಒವರ್‌ ಎತ್ತರ 5.5 ಮೀ. ಇದ್ದು, ಉದ್ದ 800 ಮೀ. ಇದೆ.