ಟ್ರ್ಯಾಕ್ಟರ್‌ ಡಿಕ್ಕಿ : ಬೈಕ್‌ ಸವಾರರಿಬ್ಬರ ಸಾವು

ನಂಜನಗೂಡು: ತಾಲೂಕಿನ ಬೆಳಗುಂದ ಗೇಟ್‌ ಸಮೀಪ ಶನಿವಾರ ರಾತ್ರಿ ಕಬ್ಬು ತುಂಬಿದ್ದ ಟ್ರ್ಯಾಕ್ಟರ್‌ ಹಾಗೂ ಬೈಕ್‌ ನಡುವೆ ಮುಖಾಮುಖಿ ಡಿಕ್ಕಿಯಾಗಿ ಇಬ್ಬರು ಸವಾರರು ಸ್ಥಳದಲ್ಲೇ ಮೃತಪಟ್ಟು, ಇನ್ನೊಬ್ಬರು ಗಂಭೀರವಾಗಿ ಗಾಯಗೊಂಡಿದ್ದಾರೆ.

ತಾಲೂಕಿನ ಸುತ್ತೂರು ಗ್ರಾಮದ ಚಾಮುಂಡಯ್ಯ ಎಂಬುವವರ ಮಗ ಪರಮೇಶ್‌(28), ನಿಂಗಯ್ಯ ಎಂಬುವವರ ಮಗ ಗಿರೀಶ್‌(25) ಮೃತರು. ನಟರಾಜು ಎಂಬುವವರ ಮಗ ಪ್ರತೀಶ್‌(27) ಗಾಯಗೊಂಡಿದ್ದು , ಅವರನ್ನು ಮೈಸೂರಿನ ಕೆ. ಆರ್‌. ಆಸ್ಪತ್ರೆಯ ತುರ್ತು ನಿಗಾ ಘಟಕದಲ್ಲಿ ದಾಖಲು ಮಾಡಲಾಗಿದೆ.

ಸುತ್ತೂರಿನ ಕಡೆ ತೆರಳುತ್ತಿದ್ದ ಬೈಕ್‌ಗೆ ಶುಗರ್ಸ್‌ ಕಾರ್ಖಾನೆಗೆ ಕಬ್ಬು ಸಾಗಿಸುತ್ತಿದ್ದ ಟ್ರ್ಯಾಕ್ಟರ್‌ ಡಿಕ್ಕಿ ಹೊಡೆದಿದೆ. ಈ ವೇಳೆ ಪರಮೇಶ್‌ ಹಾಗೂ ಗಿರೀಶ್‌ ತಲೆಗೆ ಗಂಭೀರ ಪೆಟ್ಟಾಗಿ ತೀವ್ರ ರಕ್ತಸ್ರಾವ ಉಂಟಾಗಿ ಸ್ಥಳದಲ್ಲೇ ಮೃತಪಟ್ಟರು. ಪ್ರತೀಶ್‌ ಸ್ಥಿತಿಯೂ ಚಿಂತಾಜನಕವಾಗಿದೆ.

ಸ್ಥಳಕ್ಕೆ ಭೇಟಿ ನೀಡಿದ ಎಎಸ್‌ಐ ಗೋಪಾಲ್‌ ಮಹಜರು ನಡೆಸಿದರು. ಮೃತ ದೇಹಗಳನ್ನು ಮರಣೋತ್ತರ ಪರೀಕ್ಷೆಗಾಗಿ ತಾಲೂಕು ಸಾರ್ವಜನಿಕ ಆಸ್ಪತ್ರೆಯ ಶವಾಗಾರಕ್ಕೆ ಸಾಗಿಸಲಾಯಿತು. ಘಟನೆ ಕುರಿತು ಬಿಳಿಗೆರೆ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.