ಅರಣ್ಯ ಇಲಾಖೆ ಸಿಬ್ಬಂದಿ ಮೇಲೆ ಗ್ರಾಮಸ್ಥರ ಹಲ್ಲೆ

ಎಚ್‌.ಡಿ.ಕೋಟೆ: ತಾಲೂಕಿನ ನಾಗರಹೊಳೆ ರಾಷ್ಟ್ರೀಯ ಉದ್ಯಾನ ವ್ಯಾಪ್ತಿಯ ಡಿ.ಬಿ.ಕುಪ್ಪೆ ವನ್ಯಜೀವಿ ವಲಯದಲ್ಲಿ ಗುರುವಾರ ಮಧ್ಯಾಹ್ನ ಅರಣ್ಯ ಇಲಾಖೆ ಸಿಬ್ಬಂದಿ ಮೇಲೆ ಗ್ರಾಮಸ್ಥರು ಹಲ್ಲೆ ನಡೆಸಿದ್ದಾರೆ.

ಡಿಆರ್‌ಎಪ್‌ಒ ಮಂಜುನಾಥ್‌ ಮತ್ತು ರಮೇಶ್‌ ಎಂಬುವವರಿಗೆ ತೀವ್ರ ಗಾಯಗೊಂಡಿದ್ದು, ಕೀರ್ತಿಕುಮಾರ್‌ ಮತ್ತು ನಾರಾಯಣ್‌ ಎಂಬುವವರಿಗೆ ಸಣ್ಣ ಪ್ರಮಾಣದಲ್ಲಿ ಗಾಯಗಳಾಗಿವೆ. ನಾಲ್ವರನ್ನ್ನೂ ಪಟ್ಟಣದ ಸಾರ್ವಜನಿಕ ಆಸ್ಪತ್ರೆಗೆ ದಾಖಲಿಸಲಾಗಿದ್ದು , ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಮಚ್ಚೂರು ಗ್ರಾಮದ ವಿಶ್ವ, ಹುಲ್ಲುಮುಟ್ಲು ಗ್ರಾಮದ ಅಪ್ಪುಕುಟ್ಟು, ಗೋಳೂರು ಗ್ರಾಮದ ಅಪ್ಪು ಮತ್ತು ಗುಂಡ್ರೆ ಗ್ರಾಮದ ನಾಗೇಶ್‌ ಅವರನ್ನು ಹಲ್ಲೆ ನಡೆಸಿದ ಆರೋಪಿಗಳೆಂದು ಗುರುತಿಸಿದ್ದು, ಉಳಿದವರನ್ನು ಗುರುತಿಸುವ ಕಾರ್ಯ ನಡೆದಿದೆ. ಬೀಚನಹಳ್ಳಿ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಾಗಿದೆ.

ಘಟನೆ ಏನು : 15 ತಿಂಗಳ ಹಿಂದೆ ಡಿ.ಬಿ.ಕುಪ್ಪೆ ವನ್ಯಜೀವಿ ಗೋಳೂರು ಸಮೀಪ ಜಿಂಕೆ ಶಿಕಾರಿ ಆಗಿತ್ತು. ತನಿಖೆ ನಡೆಸಿದ ಅಧಿಕಾರಿಗಳು ಮತ್ತು ಸಿಬ್ಬಂದಿ, ಗೋಳೂರು ಗ್ರಾಮದ ಸೋಮಣ್ಣ ಎಂಬ ವ್ಯಕ್ತಿ ಮೇಲೆ ಗುಮಾನಿ ವ್ಯಕ್ತಪಡಿಸಿದ್ದರು. ಹಾಗಾಗಿ ನ್ಯಾಯಾಲಯದ ಅನುಮತಿ ಪಡೆದು ಗುರುವಾರ ಮಧ್ಯಾಹ್ನ ಸೋಮಣ್ಣ ಅವರನ್ನು ಬಂಧಿಸಿ ವಿಚಾರಣೆಗೆ ಕರೆದುಕೊಂಡು ಹೋದರು. ಆನಂತರ ಮಚ್ಚೂರು ಗ್ರಾಮದ ಅರಣ್ಯ ವಸತಿ ಗೃಹದ ಸಮೀಪ ಬಂದ ಗುಂಪೊಂದು ವಸತಿ ಗೃಹದಲ್ಲಿದ್ದ ಅರಣ್ಯ ಇಲಾಖೆ ಸಿಬ್ಬಂದಿ ಮೇಲೆ ಹಲ್ಲೆ ನಡೆಸಿದ್ದಾರೆ.