ವಿವಿಯಲ್ಲಿ ಬುದ್ಧ ಪೀಠ ಸ್ಥಾಪನೆಯಾಗಲಿ

ಮೈಸೂರು : ಮೈಸೂರು ವಿಶ್ವವಿದ್ಯಾಲಯದಲ್ಲಿ ಬುದ್ಧ ಪೀಠ ಸ್ಥಾಪಿಸಬೇಕೆಂಬ ಬಹುಜನರ ಬೇಡಿಕೆ ಇನ್ನೂ ಈಡೇರಲಿಲ್ಲ. ಸಂಬಂಧಪಟ್ಟವರು ಈ ಕುರಿತು ಗಮನ ಹರಿಸಿದರೆ ಎಲ್ಲಾ ರೀತಿಯ ಸಹಕಾರ ನೀಡುತ್ತೇನೆ ಎಂದು ಕೊಳ್ಳೇಗಾಲ ಶಾಸಕ ಎನ್‌. ಮಹೇಶ್‌ ಹೇಳಿದ್ದಾರೆ.

ವಿಶ್ವವಿದ್ಯಾಲಯದ ಗೌತಮ ಬುದ್ಧ ಉದ್ಯಾನದಲ್ಲಿ ಧಮ್ಮದೀಪ ಪ್ರತಿಷ್ಠಾನ, ವಿದ್ಯಾರ್ಥಿ ಬಳಗದ ನಾಲ್ಕನೇ ವಾರ್ಷಿಕೋತ್ಸವದ ಪ್ರಯುಕ್ತ ನಡೆದ ಧ್ಯಾನ-ಗಾಯನ-ವಿಚಾರ ಕಾರ್ಯಕ್ರಮ 'ಬುದ್ಧ ಬೆಳೆದಿಂಗಳು'ವಿನಲ್ಲಿ ಅವರು ಮಾತನಾಡಿದರು.

''ಮೈಸೂರು ವಿಶ್ವವಿದ್ಯಾಲಯದಲ್ಲಿ ಬುದ್ಧ ಪೀಠ ಸ್ಥಾಪಿಸಬೇಕಾದ ಅಗತ್ಯ ಇದೆ. ಇದರಿಂದ ಬುದ್ಧನ ಕುರಿತು ವಿಚಾರಗಳನ್ನು ತಿಳಿದುಕೊಳ್ಳುವ ಹಾಗೂ ಅಧ್ಯಯನ ನಡೆಸುವ ಅವಕಾಶ ವಿದ್ಯಾರ್ಥಿಗಳಿಗೆ ಲಭಿಸಲಿದೆ. ಈ ಹಿಂದಿನ ಕುಲಪತಿ ಬುದ್ಧ ಪೀಠ ಸ್ಥಾಪನೆ ಕುರಿತು ಪ್ರಯತ್ನ ನಡೆಸಿದರೂ ಅದು ಈಡೇರಿಲಿಲ್ಲ. ಇದೀಗ ಈ ಪ್ರಯತ್ನವನ್ನು ಈಗಿನ ಕುಲಪತಿಗಳು ಹಾಗೂ ಸಂಬಂಧಿಸಿದವರು ಮುಂದುವರಿಸಲಿ. ಶಾಸಕನಾಗಿ ನಾನು ಎಲ್ಲಾ ರೀತಿಯ ಸಹಕಾರ ನೀಡುತ್ತೇನೆ,'' ಎಂದರು.

''ಬೌದ್ಧ ಧರ್ಮದ ಆದರ್ಶ ಹಾಗೂ ಅದರ ಮೌಲ್ಯವನ್ನು ಪ್ರತಿಯೊಬ್ಬರೂ ತಿಳಿದುಕೊಳ್ಳಬೇಕು. ಆದರೆ, ಈ ಧರ್ಮವನ್ನು ಒಂದು ವರ್ಗಕ್ಕೆ ಮಾತ್ರ ಸೀಮಿತಗೊಳಿಸುವ ಪ್ರಯತ್ನ ನಡೆಯುತ್ತಿರುವುದು ಸರಿಯಲ್ಲ. ಇದರಲ್ಲಿರುವ ಉತ್ತಮ ವಿಚಾರಗಳ ಪ್ರಯೋಜನ ಎಲ್ಲರಿಗೂ ದೊರೆಯುವಂತೆ ನೋಡಿಕೊಳ್ಳಬೇಕು. ಜನ ಸಾಮಾನ್ಯರಿಗೆ ಬೌದ್ಧ ಧರ್ಮದ ಕುರಿತು ಮಾಹಿತಿ ನೀಡಬೇಕಿದೆ. ಈ ಧರ್ಮದ ಅನುಯಾಯಿಗಳು ಇತ್ತ ಗಮನ ಹರಿಸಬೇಕು. ಪ್ರಬುದ್ಧ ಭಾರತ ನಿರ್ಮಾಣಕ್ಕೆ ಬುದ್ಧ, ಅಂಬೇಡ್ಕರ್‌ ಮುಂತಾದವರ ಚಿಂತನೆ ಪ್ರಸ್ತುತವಾಗಿದೆ. ಈ ನಿಟ್ಟಿನಲ್ಲಿ ಧಮ್ಮದೀಪ ಪ್ರತಿಷ್ಠಾನ ಉತ್ತಮ ಕಾರ್ಯ ಮಾಡುತ್ತಿದ್ದು, ಅಭಿನಂದನೆ ಸಲ್ಲಿಸುತ್ತಿದ್ದೇನೆ,'' ಎಂದು ಹೇಳಿದರು.

''ಎಲ್ಲರಿಗೂ ಸಮಾನ ಅವಕಾಶ ದೊರೆಯಬೇಕಾದರೆ ಸಾಮಾಜಿಕ ಹಾಗೂ ಆರ್ಥಿಕ ಅಸಮಾನತೆಯನ್ನು ಹೋಗಲಾಡಿಸಬೇಕಿದೆ. ಆಗ ಮಾತ್ರ ರಾಜಕೀಯ ಪ್ರಜಾಪ್ರಭುತ್ವ ಉಳಿಯುತ್ತದೆ. ಈ ನಿಟ್ಟಿನಲ್ಲಿ ಸಂಬಂಧಪಟ್ಟವರು ಗಮನಹರಿಸಬೇಕು,'' ಎಂದು ಅವರು ಹೇಳಿದರು.

ಮೈಸೂರು ವಿಶ್ವವಿದ್ಯಾಲಯ ಕುಲಪತಿ ಪ್ರೊ.ಜಿ.ಹೇಮಂತ್‌ ಕುಮಾರ್‌, ಕುಲಸಚಿವ ಪ್ರೊ.ಲಿಂಗರಾಜ ಗಾಂಧಿ ಇತರರು ಇದ್ದರು.