‘ಒಡೆಯರ್‌’ ಸಿನಿಮಾ ಶೀರ್ಷಿಕೆ ಬದಲಿಸುವಂತೆ ಠಾಣೆಗೆ ದೂರು

ಮೈಸೂರು : ನಟ ದರ್ಶನ್‌ ಅಭಿನಯಿಸುತ್ತಿರುವ, ಸಂದೇಶ್‌ ನಾಗರಾಜ್‌ ನಿರ್ಮಾಣದ 'ಒಡೆಯರ್‌' ಹೆಸರಿನ ಸಿನಿಮಾದ ಶೀರ್ಷಿಕೆಯನ್ನು ಬದಲಾಯಿಸುವಂತೆ ಒತ್ತಾಯಿಸಿ ಕನ್ನಡ ಕ್ರಾಂತಿದಳದ ಸದಸ್ಯರು ಕೆ.ಆರ್‌. ಪೊಲೀಸ್‌ ಠಾಣೆಗೆ ದೂರು ನೀಡಿದರು.

ನಂತರ ಕನ್ನಡ ಕ್ರಾಂತಿದಳದ ಯುವಘಟಕದ ರಾಜ್ಯಾಧ್ಯಕ್ಷ ತೇಜಸ್ವಿ ಕುಮಾರ್‌ ಮಾತನಾಡಿ, 'ಒಡೆಯರ್‌' ಚಿತ್ರದ ಹೆಸರನ್ನು ಬದಲಾಯಿಸುವಂತೆ ಸುದ್ದಿಗೋಷ್ಠಿ ನಡೆಸಿ ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಗೆ ಒತ್ತಾಯಿಸಿದ್ದೆವು. ಆದರೂ ಚಿತ್ರತಂಡವು ಒಡೆಯರ್‌ ಶೀರ್ಷಿಕೆಯನ್ನೇ ಇಟ್ಟುಕೊಂಡು ಆ.16ರಂದು ಮುಹೂರ್ತ ಏರ್ಪಡಿಸಿರುವುದು ಖಂಡನೀಯ,'' ಎಂದರು. 'ಒಡೆಯರ್‌' ಎಂಬ ಶೀರ್ಷಿಕೆಯಿಂದ ನಾಲ್ವಡಿ ಕೃಷ್ಣರಾಜ ಒಡೆಯರ್‌ ಅಭಿಮಾನಿಗಳಿಗೆ ನೋವಾಗಿದೆ. ಚಲನಚಿತ್ರ ವಾಣಿಜ್ಯ ಮಂಡಳಿ ಹಾಗೂ ಚಿತ್ರತಂಡದವರು 'ಒಡೆಯರ್‌' ಎಂಬ ಶೀರ್ಷಿಕೆಯನ್ನು ಶೀಘ್ರವೇ ಬದಲಾಯಿಸಬೇಕು,'' ಎಂದು ಆಗ್ರಹಿಸಿದರು.

''ಒಡೆಯರ್‌ ಮನೆತನದ ಅರಸರು ಮೈಸೂರಿನ ಅಭಿವೃದ್ಧಿಗೆ ಅಪಾರ ಕೊಡುಗೆ ನೀಡಿದ್ದು, ಜನರೂ ಅವರನ್ನು ಬಗ್ಗೆ ಹೆಚ್ಚು ಗೌರವದಿಂದ ಕಾಣುತ್ತಿದ್ದಾರೆ. ಹಾಗಾಗಿ ಒಡೆಯರ್‌ ಹೆಸರನ್ನು ವಾಣಿಜ್ಯ ದೃಷ್ಟಿಯ, ಹಾಸ್ಯ ಭರಿತ ಅಥವಾ ರೌಡಿಸಂ ಚಿತ್ರಗಳಿಗೆ ಬಳಸಿ ಅವರ ಮೇಲಿನ ಜನರ ಗೌರವಕ್ಕೆ ಚ್ಯುತಿ ತರುವ ಯತ್ನಗಳು ನಡೆಯಬಾರದು,'' ಎಂದು ಒತ್ತಾಯಿಸಿದರು.

ಹಿರಿಯ ಹೋರಾಟಗಾರರಾದ ಸತ್ಯಪ್ಪ, ವಸಂತ್‌ರಾಜೇ ಅರಸ್‌, ಪುನೀತ್‌ ಅರಸ್‌, ಅರವಿಂದ್‌ ರಾಜೇ ಅರಸ್‌, ಮಾದರಾಜೇ ಅರಸ್‌, ಯಶ್ವಂತ್‌ ರಾಜೇ ಅರಸ್‌, ಶರತ್‌ ಅರಸ್‌, ಮಂಜುನಾಥ್‌ ಮುಂತಾದವರು ಇದ್ದರು.