ಕೊರೊನಾ 'ಕರ್ಫ್ಯೂ': ದಿಲ್ಲಿಯಲ್ಲಿ 50ಕ್ಕೂ ಹೆಚ್ಚು ಮಂದಿ ಸೇರುವಂತಿಲ್ಲ!

ಹೊಸದಿಲ್ಲಿ: ಕೊರೊನಾ ಹಬ್ಬುವಿಕೆ ಆತಂಕದ ಹಿನ್ನೆಲೆಯಲ್ಲಿ ಧಾರ್ಮಿಕ, ಕೌಟುಂಬಿಕ ಅಥವಾ ಸಾಮಾಜಿಕವಾದ ಯಾವುದೇ ಕಾರ್ಯಕ್ರಮಗಳಿದ್ದರೂ ಸರಿಯೇ 50ಕ್ಕೂ ಅಧಿಕ ಮಂದಿ ಸೇರುವಂತಿಲ್ಲ ಎಂದು ದಿಲ್ಲಿ ಸರಕಾರ ಘೋಷಣೆ ಮಾಡಿದೆ.

ಸಿಎಎ, ಎನ್‌ಆರ್‌ಸಿ ವಿರೋಧಿಸಿ ಹಲವು ದಿನಗಳಿಂದ ಶಹೀನ್‌ ಬಾಗ್‌ನಲ್ಲಿ ನಡೆಯುತ್ತಿರುವ ಬೃಹತ್‌ ಪ್ರತಿಭಟನೆಗೂ ನಿರ್ಬಂಧ ಅನ್ವಯಿಸಲಿದೆ ಎಂದು ಸಿಎಂ ಅರವಿಂದ್‌ ಕೇಜ್ರಿವಾಲ್‌ ಹೇಳಿದ್ದಾರೆ. ದಿಲ್ಲಿಯ ವಿವಿಧ ಇಲಾಖೆಗಳ ಉನ್ನತ ಅಧಿಕಾರಿಗಳೊಂದಿಗೆ ಸಭೆ ನಡೆಸಿದ ನಂತರ ಸಿಎಂ ಕೇಜ್ರಿವಾಲ್‌ ಈ ಘೋಷಣೆ ಮಾಡಿದ್ದಾರೆ.

ಇನ್ನೂ ಶಾಪಿಂಗ್‌ ಮಾಲ್‌ಗಳನ್ನು ಬಂದ್‌ ಮಾಡುವ ಬಗ್ಗೆ ಇನ್ನೆರಡು ದಿನಗಳಲ್ಲಿ ನಿರ್ಧರಿಸಲಾಗುವುದು ಎಂದು ಕೂಡ ಅವರು ಸುದ್ದಿಗಾರರಿಗೆ ತಿಳಿಸಿದ್ದಾರೆ.

ಪಂಚತಾರಾ ಹೋಟೆಲ್‌ಗಳಲ್ಲಿ ನಿಗಾ ಕೇಂದ್ರ: ದಿಲ್ಲಿಯ ಇಂದಿರಾ ಗಾಂಧಿ ಅಂತಾರಾಷ್ಟ್ರೀಯ ನಿಲ್ದಾಣದ ಬಳಿಯ ಮೂರು ಪಂಚಾತಾರಾ ಹೋಟೆಲ್‌ಗಳಲ್ಲಿ ಸರಕಾರದ ಸೂಚನೆ ಮೇರೆಗೆ ಪಾವತಿ ಸಹಿತ ನಿಗಾ ಕೊಠಡಿಗಳನ್ನು ಶಂಕಿತ ಸೋಂಕಿತರಿಗಾಗಿ ಸ್ಥಾಪಿಸಲಾಗಿದೆ. ಮೂರು ಹೋಟೆಲ್‌ಗಳಿಂದ ಒಟ್ಟು 182 ಕೊಠಡಿಗಳನ್ನು ವಿದೇಶಕ್ಕೆ ಪ್ರಯಾಣಿಸುವವರಿಗಾಗಿ ಮೀಸಲಿರಿಸಲಾಗಿದೆ. ಅವರು ಶುಲ್ಕ ಪಾವತಿಸಿ ನಿಗಾ ಕೊಠಡಿಯಲ್ಲಿ ತಂಗಬಹುದಾಗಿದೆ.

ಕೊರೊನಾ ಅಪ್ಡೇಟ್‌: ವಿಶ್ವಾದ್ಯಂತ 6 ಸಾವಿರ ದಾಟಿದ ಸಾವಿನ ಸಂಖ್ಯೆ, ರಾಷ್ಟ್ರದಲ್ಲಿ 119 ಸೋಂಕಿತರು!