ಪ್ರಧಾನಿ ಮೋದಿ ಕೂಡ ನನ್ನ ಮಗ: ಶಾಹೀನ್‌ ಬಾಗ್‌ನ ಬಿಲ್ಕಿಸ್‌ ದಾದಿ

ಹೊಸದಿಲ್ಲಿ: ಪ್ರಧಾನಿ ನರೇಂದ್ರ ಮೋದಿ ಕೂಡ ನನ್ನ ಮಗ ಎಂದು ಶಾಹೀನ್‌ ಬಾಗ್‌ ಪ್ರತಿಭಟನೆಯ ಬಿಲ್ಕಿಸ್‌ ದಾದಿ ಹೇಳಿದ್ದಾರೆ. ಅವರು ಆಹ್ವಾನಿಸಿದರೆ ಸಂತೋಷದಿಂದ ಭೇಟಿ ಮಾಡುತ್ತೇನೆ ಎಂದು ಟೈಮ್ಸ್‌ ಮ್ಯಾಗಜೀನ್‌ನ 2020ರ ನೂರು ಮಂದಿ ಅತಿ ಪ್ರಭಾವಿಗಳ ಪಟ್ಟಿಯಲ್ಲಿ ಸ್ಥಾನ ಪಡೆದ ಬಿಲ್ಕಿಸ್‌ ದಾದಿ ಶುಕ್ರವಾರ ತಿಳಿಸಿದ್ದಾರೆ.

ಸಿಎಎ ಹಾಗೂ ಎನ್‌ಆರ್‌ಸಿ ವಿರೋಧಿ ಹೋರಾಟದ ಪ್ರಮುಖ ಕೇಂದ್ರ ಬಿಂದುವಾಗಿ ದಿಲ್ಲಿಯ ಶಾಹೀನ್ ಬಾಗ್ ಗಮನ ಸೆಳೆದಿತ್ತು. ಮಾರ್ಚ್ ಅಂತ್ಯದವರೆಗೂ ನಡೆದ ಧರಣಿಯಲ್ಲಿ ಭಾಗವಹಿಸಿದ್ದ ಬಿಲ್ಕಿಸ್‌ ದಾದಿ ಭಾರೀ ಸುದ್ದಿಯಾಗಿದ್ದರು. ಶಾಹೀನ್ ಬಾಗ್‌ನ ದಾದಿ ಎಂದೇ ಪ್ರಸಿದ್ಧಿಯಾಗಿದ್ದ ಬಿಲ್ಕಿಸ್, ಮಳೆ ಬಂದರೂ, ಪಾದರಸ ಬಿದ್ದರೂ, ತಾಪಮಾನ ಹೆಚ್ಚಾದರೂ ನಾವು ನಮ್ಮ ಧರಣಿಯನ್ನು ಮುಂದುವರೆಸಿದ್ದೇವು. ಜಾಮಿಯಾದಲ್ಲಿ ನಮ್ಮ ಮಕ್ಕಳನ್ನು ಹೊಡೆಯಲಾಯಿತು, ನಮ್ಮ ಮುಂದೆ ಗುಂಡು ಹಾರಿಸಲಾಯಿತು, ಆದರೆ, ಅವ್ಯಾವುದು ನಮ್ಮನ್ನು ತಡೆಯಲಿಲ್ಲ ಎಂದು ಹೇಳಿದ್ದಾರೆ.

ಪ್ರಧಾನಿಯನ್ನು ಭೇಟಿಯಾಗಲು ಹೋಗುತ್ತೀರಾ ಎಂಬ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಬಿಲ್ಕಿಸ್‌, ಏಕೆ ಹೋಗಬಾರದು, ನಾನು ಹೋಗುತ್ತೇನೆ, ಅದರಲ್ಲಿ ಭಯಪಡುವಂತದ್ದು ಏನಿದೆ..? ಮೋದಿ ಜಿ ನನ್ನ ಮಗನಂತೆ, ನಾನು ಅವರ ತಾಯಿಯಂತೆ. ನಾನು ಅವರಿಗೆ ಜನ್ಮ ನೀಡಿಲ್ಲ. ಆದರೆ, ನನ್ನ ಸಹೋದರಿಗೆ ಅವರು ಜನಿಸಿದ್ದಾರೆ. ಅವರು ನನ್ನ ಮಗುವಿನಂತೆ ಎಂದು ದಾದಿ ತಿಳಿಸಿದ್ದಾರೆ.

‘ಟೈಮ್‌’ 100 ಪ್ರಭಾವಿಗಳ ಪಟ್ಟಿಯಲ್ಲಿ ಮೋದಿ, ದಾದಿ ಆಫ್‌ ಶಹೀನ್‌ ಬಾಗ್‌ & ಆಯುಷ್ಮಾನ್‌ ಖುರಾನಾ

ಟೈಮ್ಸ್‌ ಮ್ಯಾಗ್‌ಜಿನ್‌ ಪಟ್ಟಿಯಲ್ಲಿ ಪ್ರಧಾನಿ ಮೋದಿ ಅವರು ಸ್ಥಾನ ಪಡೆದಿರುವುದಕ್ಕೆ ನಾನು ಅಭಿನಂದಿಸುತ್ತೇನೆ. ನಮ್ಮ ಮೊದಲ ಹೋರಾಟ ಕೊರೊನಾ ವೈರಸ್ ವಿರುದ್ಧವಾಗಿದ್ದು, ಅದನ್ನು ಪ್ರಪಂಚದಿಂದ ಹೊರಹಾಕಬೇಕು ಎಂದು ಬಿಲ್ಕಿಸ್‌ ದಾದಿ ಹೇಳಿದ್ದಾರೆ. ದಿಲ್ಲಿಯಲ್ಲಿ ಕೆಲ ಕೊರೊನಾ ಕೇಸ್‌ಗಳು ಕಂಡುಬಬಂದ ನಂತರ ಮಾರ್ಚ್ 24 ರಂದು ಶಾಹೀನ್ ಬಾಗ್ ಪ್ರತಿಭಟನಾ ಸ್ಥಳವನ್ನು ತೆರವುಗೊಳಿಸಲಾಯಿತು.

ಬಿಲ್ಕಿಸ್‌ ಬಾನೋಗೆ 50 ಲಕ್ಷ ರೂ. ಪರಿಹಾರ ನೀಡಲು ಸೂಚನೆ