ಹೊಸದಿಲ್ಲಿ: ಅರವಿಂದ ಕೇಜ್ರಿವಾಲ್‌ ಪ್ರಮಾಣ ವಚನ ಸ್ವೀಕಾರ ಸಮಾರಂಭಕ್ಕೆ ವಿಶೇಷ ಅತಿಥಿಯನ್ನು ಆಮ್‌ ಆದ್ಮಿ ಪಕ್ಷ (ಎಎಪಿ) ಆಹ್ವಾನಿಸಿದೆ.

ಇದೇ ಭಾನುವಾರ ಮೂರನೇ ಬಾರಿಗೆ ದಿಲ್ಲಿ ಮುಖ್ಯಮಂತ್ರಿಯಾಗಿ ಅರವಿಂದ ಕೇಜ್ರಿವಾಲ್‌ ರಾಮ್‌ಲೀನಾ ಮೈದಾನದಲ್ಲಿ ಪ್ರಮಾಣ ವಚನ ಸ್ವೀಕರಿಸಲಿದ್ದಾರೆ. ಈ ಕಾರ್ಯಕ್ರಮಕ್ಕೆ 'ಬೇಬಿ ಮಫ್ಲರ್‌ಮ್ಯಾನ್‌' ಖ್ಯಾತಿಯ ಪುಣಾಣಿ ಮಗುವನ್ನು ಆಹ್ವಾನಿಸಲಾಗಿದೆ.


ಮಂಗಳವಾರ ಎಎಪಿ ವಿಜಯೋತ್ಸವದ ವೇಳೆ ದಿಲ್ಲಿಯ ಪಕ್ಷದ ಪ್ರಧಾನ ಕಚೇರಿ ಆವರಣದಲ್ಲಿ ಕಾಣಿಸಿದ 'ಮಫ್ಲರ್‌ ಮ್ಯಾನ್‌' ವೇಷದ ಮಗುವೊಂದು ಎಲ್ಲರ ಗಮನ ಸೆಳೆದಿತ್ತು. ಆಪ್‌ ಟೋಪಿ, ಕನ್ನಡಕ, ಸ್ವೆಟರ್‌ ಮತ್ತು ಮಫ್ಲರ್‌ ಧರಿಸಿದ್ದ ಒಂದು ವರ್ಷ ವಯಸ್ಸಿನ ಅವ್ಯಾನ್‌ ಯಥಾವತ್‌ ಅರವಿಂದ್‌ ಕೇಜ್ರಿವಾಲ್‌ ರೀತಿಯಲ್ಲಿಯೇ ಪೋಸು ನೀಡಿ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿತ್ತು.

ಅವ್ಯಾನ್‌ ಆಪ್‌ ಬೆಂಬಲಿಗ ರಾಹುಲ್‌ ತೋಮರ್‌ ಮತ್ತು ಮೀನಾಕ್ಷಿ ಪುತ್ರ. ಈ 'ಬೇಬಿ ಕೇಜ್ರಿವಾಲ್‌' ಚಿತ್ರ ಮಂಗಳವಾರವಿಡೀ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿತ್ತು. ಈ ಚಿತ್ರವನ್ನು ಫಲಿತಾಂಶದ ಬೆನ್ನಿಗೆ ಟ್ಟೀಟ್‌ ಮಾಡಿದ್ದ ಎಎಪಿ ‘ಅವರ್‌ ಸ್ಟಾರ್‌ ಆಫ್‌ ದಿ ಡೇ’ ಎಂದು ಬಣ್ಣಿಸಿತ್ತು.

ಕೇಜ್ರಿವಾಲ್ ಪ್ರಮಾಣವಚನ ಸಮಾರಂಭಕ್ಕೆ ಹೊರ ರಾಜ್ಯದ ಗಣ್ಯರಿಗಿಲ್ಲ ಆಹ್ವಾನ, ದೀದಿಯೂ ಲಿಸ್ಟ್‌ ನಲ್ಲಿಲ್ಲ

ಇದೀಗ ಹೊಸ ಘೋಷಣೆ ಮಾಡಿರುವ ಪಕ್ಷ, “ಫೆಬ್ರವರಿ 16ರ ಅರವಿಂದ ಕೇಜ್ರಿವಾಲ್‌ ಪ್ರಮಾಣ ವಚನ ಸ್ವೀಕಾರ ಸಮಾರಂಭಕ್ಕೆ ಬೇಬಿ ಮಪ್ಲರ್‌ಮ್ಯಾನ್‌ನ್ನು ಆಹ್ವಾನಿಸಲಾಗಿದೆ,” ಎಂದು ತಿಳಿಸಿದೆ.


2015ರ ಚುನಾವಣೆ ವೇಳೆ ಕೇಜ್ರಿವಾಲ್‌ ಮಫ್ಲರ್‌ ಇಮೇಜ್‌ ಭಾರಿ ಸದ್ದು ಮಾಡಿತ್ತು. ಬೆನ್ನಿಗೆ ಮಫ್ಲರ್‌ಮ್ಯಾನ್‌ ಎಂಬ ಅಡ್ಡ ಹೆಸರು ಬಂದಿತ್ತು. ಇದನ್ನೇ ಇಟ್ಟುಕೊಂಡು ಟೀ ಶರ್ಟ್‌ ಮೊದಲಾದ ಪ್ರಚಾರ ಸರಕುಗಳನ್ನು ಆಪ್‌ ಮಾರಾಟ ಮಾಡಿತ್ತು.