ಅಮೆರಿಕಾದ ಸ್ಟಾನ್ ಫರ್ಡ್ ​ವಿಶ್ವವಿದ್ಯಾಲಯದ ಕ್ಯಾಂಪಸ್ ನಲ್ಲಿ ಒಂದು ಸುತ್ತು!

ಬರಹ: ಸಹನಾ ಪ್ರಸಾದ್
ಭಾನುವಾರ ಸಂಜೆ ಹಾಗೆಯೇ ಒಂದು ರೌಂಡ್ ಸುತ್ತು ಹಾಕಿಕೊಂಡು ಬರೋಣ ಅನಿಸುತ್ತಾ? ಅಮೆರಿಕಾದ ಬೇ ಏರಿಯಾ ಹತ್ತಿರ ನೀವಿದ್ದರೆ ಇಲ್ಲಿ ಸುತ್ತ ಮುತ್ತ ಬೇಕಾದಷ್ಟು ಜಾಗಗಳಿವೆ. ಸುತ್ತಾಟದಲ್ಲಿ ಮಕ್ಕಳಿಗೆ ನೀವು ಪ್ರೇರೇಪಿಸಲು ಪಾಲೋ ಆಲ್ಟೋ ಬಳಿ ಇರುವ ಸ್ಟಾನ್ ಫರ್ಡ್ ವಿಶ್ವವಿದ್ಯಾಲಯದ ಕ್ಯಾಂಪಸ್ ಟೂರ್ ಮಾಡಬಹುದು. ಎಲಾನ್ ಮಸ್ಕ್, ಸುಂದರ್ ಪಿಚ್ಚೈ,ಜಾನ್ ಎಫ್ ಕೆನಡಿ, ಮುಕೇಶ್ ಅಂಬಾನಿ ಮೊದಲಾದ ಅತಿರಥ ಮಹಾರಥರು ಓದಿದ ಈ ವಿಶ್ವವಿದ್ಯಾಲಯದ ನೋಟಗಳು ನಿಮ್ಮ ಮಕ್ಕಳಿಗೆ ನೀವು ಏನೂ ಹೇಳದೆ ಹೊಸ ಚಿಂತನೆಗೆ ಹಚ್ಚಬಹುದು. ಇಲ್ಲಿನ ವಿನ್ಯಾಸ, ಪ್ರಕೃತಿ ಸೌಂದರ್ಯ ನೋಡಿ, ಇಲ್ಲಿ ಓದಿದವರ ಬಗ್ಗೆ ತಿಳಿದು ತನ್ನಂತಾನೇ ಅವರಲ್ಲಿ ನಾನು ಸಹ ಇಲ್ಲಿ ಓದಬೇಕು, ಅದಕ್ಕಾಗಿ ಶ್ರಮಿಸಬೇಕು ಎನ್ನುವ ಆಸೆ ಬರುತ್ತದೆ.

ಪಾಲೋ ಆಲ್ಟೋ ಸ್ಯಾನ್ ಫ್ರಾನ್ಸಿಸ್ಕೋ ನಗರದಿಂದ ದಕ್ಷಿಣಕ್ಕೆ ಸುಮಾರು 35 ಮೈಲಿ ಹಾಗೂ ಸ್ಯಾನ್ ಹ್ಯೂಸೆ ನಗರದಿಂದ ಸುಮಾರು 14 ಮೈಲಿ ಉತ್ತರಕ್ಕೆ ಸಿಗುತ್ತದೆ. ಸ್ಪಾನಿಶ್ ಭಾಷೆಯಲ್ಲಿ " ಉದ್ದನೆಯ ಕಡ್ಡಿ" ಎಂದು ಅರ್ಥ ಬರುವ ಈ ನಗರದ ಜನಸಂಖ್ಯೆ ಸುಮಾರು 94,೦೦೦ ಅಷ್ಟೇ. ಈ ಜಾಗ ಅಮೆರಿಕಾದ ಅತ್ಯಂತ ದುಬಾರಿ ನಗರಗಳಲ್ಲಿ ಎಣಿಸಲ್ಪಡುತ್ತದೆ ಹಾಗೊ ಇಲ್ಲಿನ ಜನರು ಬೇರೆಡೆಗಿಂತ ವಿದ್ಯಾವಂತರೆಂದು ಗುರುತಿಸಲ್ಪಡುತ್ತಾರೆ. ಅಮಾಸ ಲೇಲ್ಯಾಂಡ್ ಸ್ಟಾನ್ ಫರ್ಡ್ ಎನ್ನುವಾತ ಜಗದ್ವಿಖ್ಯಾತ ವಿಶ್ವವಿದ್ಯಾಲಯವನ್ನು ಈ ಪ್ರದೇಶದಲ್ಲಿ ಶುರು ಮಾಡಿದಾಗ ಈ ನಗರ ಅಸ್ತಿತ್ವಕ್ಕೆ ಬಂತು.
ಕೇವಲ 15 ವರುಷ ವಯಸ್ಸಿಗೆ ಟೈಫಾಯ್ಡ್ ಜ್ವರದಿಂದ ತೀರಿಕೊಂಡ ಮಗ ಲೇಲಾಂಡ್ ಸ್ಟಾನ್ ಫರ್ಡ್ ಜೂನಿಯರ್ ನೆನಪಿನಲ್ಲಿ ಶುರುವಾದ ಈ ವಿಶ್ವವಿದ್ಯಾಲಯ ಜಗತ್ತಿನ ಪ್ರಮುಖ ವಿಶ್ವವಿದ್ಯಾಲಯಗಳಲ್ಲಿ 2ನೇ ಅಥವಾ 3ನೇ ಸ್ಥಾನದಲ್ಲಿ ಇದೆ. ಕ್ಯಾಂಪಸ್ ಸುಮಾರು 8180 ಎಕ್ಕರೆ ಜಾಗದಲ್ಲಿ ಇರುವ ಜಾಗ ಕಣ್ಮನ ಸೆಳೆಯುವಂತಿದೆ. 2 ಸಲ ಭೂಕಂಪನದಲ್ಲಿ ಹಾಳಾದರೂ ಮತ್ತೆ ಮತ್ತೆ ರಿಪೇರಿ ಮಾಡಿಸಿರುವ ಇಲ್ಲಿ ಈಗಲೂ ಆಡಳಿತ ವ್ಯವಹಾರಗಳು, ಬೋಧನೆ ಹಾಗೂ ಸಂಶೋಧನೆಗಳು ನಡೆಯುತ್ತಲೇ ಇದೆ.

ಚರ್ಚ್, ದೃಶ್ಯ ಮಾಧ್ಯಮಗಳ ಕೇಂದ್ರ, ಕಾನ್ಸರ್ಟ್ ನಡೆಯುವ ಸ್ಥಳ, ಶಿಲ್ಪಕಲೆಯ ಪಾರ್ಕ್, ಕಾಕ್ಟಸ್ ಉದ್ಯಾನವನ ಮುಂತಾದ ಜಾಗಗಳು ಮನಸೆಳೆಯುತ್ತವೆ. ಲೂ ಹೆನ್ರಿ ಹೂವರ್ ಹೌಸ್ ಎನ್ನುವ ಯೂನಿವರ್ಸಿಟಿ ಅಧ್ಯಕ್ಷರ ನಿವಾಸ, ಡಿಗ್ರಿ ಪಡೆಯುವುದಕ್ಕೂ ಮುನ್ನ ಮೃತರಾದ ಇಬ್ಬರು ಅಣ್ಣ ತಮ್ಮಂದಿರ ನೆನಪಲ್ಲಿ ಕಟ್ಟಿದ ಕಾರಂಜಿ, ಪುಸ್ತಕ ಮಳಿಗೆ, ಸ್ಟಾನ್ ಫರ್ಡ್ ಪರಿವಾರದ ಸಮಾಧಿಗಳು ಇರುವ ಪ್ರದೇಶ, ಅಲ್ಲೇ ಹತ್ತಿರದಲ್ಲಿ ವಿಲ್ಲಿಯಮ್ ವೆಟ್ಮೋರ್ ಎನ್ನುವಾತ ಗತಿಸಿದ ಮಡದಿಯ ನೆನಪಲ್ಲಿ ರೂಪಿಸಿದ ದುಃಖದಲ್ಲಿರುವ " ಏಂಜಲ್ ಆಫ್ ಗ್ರೀಫ್" ಕಲಾಕೃತಿ ಇರುವ ಜಾಗ , ಗ್ರಂಥಾಲಯ ಇತ್ಯಾದಿ ನೋಡಿದ ಮೇಲೆ ಅಲ್ಲಿರುವ ಬೇರೆ ಬೇರೆ ಅಧ್ಯಾತ್ಮಕ ಡಿಪಾರ್ಟ್ ಮೆಂಟ್ ಗಳ ಟೂರ್ ಮಾಡಬಹುದು. ಈಗ ಕೋವಿಡ್ ಸಮಯವಾದುದ್ದರಿಂದ ಅನೇಕ ಕಡೆ ನಿರ್ಬಂದನೆಗಳು ಇವೆ. ಸುಮಾರು ಕಡೆ ಐಡಿ ಕಾರ್ಡ್ ಇಲ್ಲದೆ ಪ್ರವೇಶವಿಲ್ಲ. ನಿಮಗೆ ಪರಿಚಯದವರು ಯಾರಾದರೂ ಇದ್ದರೆ ಅವರು ನಿಮಗೆ ಮಾರ್ಗದರ್ಶಿಗಳಾಗಬಹುದು.

ಮಕ್ಕಳಿಗೆ ಇಲ್ಲಿನ ಇಡೀ ಕ್ಯಾಂಪಸ್ ಸುತ್ತು ಹಾಕಿಸಿ ಮಧ್ಯೆ ಮಧ್ಯೆ ಇಲ್ಲಿ ನಡೆಯುತ್ತಿರುವ ಸಂಶೋಧನೆಗಳು, ಇಲ್ಲಿಂದ ಪಾಸ್ ಮಾಡಿ ಅಲ್ಲಿ ದೊಡ್ಡ ಸಾಧನೆಗಳನ್ನು ಮಾಡಿರುವವರ ಬಗ್ಗೆ ಹೇಳುತ್ತಾ ಸುಸ್ತಾದಾಗ ಯೂನಿವರ್ಸಿಟಿ ಅವೆನ್ಯೂ ಎಂಬ ಉದ್ದನೆಯ ರಸ್ತೆಯಲ್ಲಿ ನಿಮಗೆ ಬೇಕಾದ್ದನ್ನು ಕೊಂಡು ಮನೆಗೆ ಹಿಂದಿರುಗುವಷ್ಟರಲ್ಲಿ ಮನಸ್ಸು ತುಂಬಿ ಬಂದಿರುತ್ತೆ..!!