ಬೇಡಿಕೆ ಈಡೇರಿಕೆ ಭರವಸೆ : ಬಂದ್ ವಾಪಸ್

ಮಾನ್ವಿ ; ತಾಲೂಕಿನಾದ್ಯಂತ ಸಮರ್ಪಕ ಕುಡಿವ ನೀರೊದಗಿಸಲು ಹಾಗೂ ರೈತರ ಸಾಲ ಮನ್ನಾ, ಬೆಳೆ ನಷ್ಟ ಪರಿಹಾರ ಸೇರಿದಂತೆ ಇನ್ನಿತರ ಬೇಡಿಕೆಗಳ ಈಡೇರಿಕೆಗಾಗಿ ಕರ್ನಾಟಕ ರೈತ ಸಂಘ ಮಾ.28ರಂದು ಕರೆ ನೀಡಿದ್ದ ಮಾನ್ವಿ ಬಂದ್‌ನ್ನು, ಬೇಡಿಕೆ ಈಡೇರಿಕೆ ಭರವಸೆ ಹಿನ್ನೆಲೆಯಲ್ಲಿ ಹಿಂಪಡೆಯಲಾಯಿತು.

ಶನಿವಾರ ತಹಸೀಲ್ದಾರ್ ಕಾರ್ಯಾಲಯದಲ್ಲಿ ತಹಸೀಲ್ದಾರ್ ಎಸ್.ಟಿ.ಯಂಪುರೆ, ಕೆಆರ್‌ಎಸ್ ಅಧ್ಯಕ್ಷ ಮತ್ತು ಪದಾಧಿಕಾರಿಗಳ ಸಭೆ ನಡೆಸಿದರು. ತಹಸೀಲ್ದಾರ್ ಹತ್ತು ದಿನಗಳೊಳಗೆ ಸಮಸ್ಯೆ ಪರಿಹರಿಸಲಾಗುವುದು ಎಂದು ಭರವಸೆ ನೀಡಿದ ಹಿನ್ನೆಲೆಯಲ್ಲಿ ಸಂಘಟನೆಯ ಕಾರ್ಯಕರ್ತರು ಬಂದ್ ವಾಪಸ್ ಪಡೆದರು. ಕೆಆರ್‌ಎಸ್‌ನ ತಾಲೂಕು ಅಧ್ಯಕ್ಷ ಮುದುಕಪ್ಪ ಮಾತನಾಡಿ, ಭರವಸೆ ಮೇರೆಗೆ ಬಂದ್ ಹಿಂಪಡೆದಿದ್ದೇವೆ. ಹತ್ತು ದಿನಗಳೊಳಗೆ ಬೇಡಿಕೆ ಈಡೇರದಿದ್ದಲ್ಲಿ ಪುನಃ ಹೋರಾಟ ನಡೆಸಲಾಗುವದು ಎಂದರು. ನೀರಾವರಿ ಅಧಿಕಾರಿ ವಿನೋದಕುಮಾರ್ ಗುಪ್ತಾ, ಗ್ರಾಮೀಣ ನೀರು ಸರಬರಾಜು ಎಇಇ ನರಸಿಂಗ್‌ರಾವ್, ಸಿಪಿಐ ಪಂಪನಗೌಡ, ಪಿಎಸ್‌ಐ ಉಮೇಶ್ ಕಾಂಬ್ಳೆ, ಆಶೋಕ್ ನಿಲೋಗಲ್ ಸೇರಿದಂತೆ ಕೆಆರ್‌ಎಸ್ ಪದಾಧಿಕಾರಿಗಳು ಇದ್ದರು.