ಅನಧಿಕೃತ ಲೇಔಟ್: ಲೋಕಾ ಹೆಚ್ಚುವರಿ ತನಿಖೆ

ರಾಯಚೂರು; ನಗರಸಭೆ ವ್ಯಾಪ್ತಿಯಲ್ಲಿ 40ಕ್ಕೂ ಹೆಚ್ಚು ಅನಧಿಕೃತ ಲೇಔಟ್‌ಗಳಿಗೆ ಅಕ್ರಮವಾಗಿ ಅನುಮತಿ ನೀಡಲಾಗಿದೆ ಎಂಬ ದೂರು ಆಧರಿಸಿ, ಬೆಂಗಳೂರಿನ ಲೋಕಾಯುಕ್ತ ಅಪರ ನಿಬಂಧಕ (ವಿಚಾರಣೆ) ಚಂದ್ರಶೇಖರ ಪಾಟೀಲ್ ಅವರು, ಇಲ್ಲಿನ ನಗರಸಭೆಗೆ ಸೋಮವಾರ ಭೇಟಿನೀಡಿ ಕಡತಗಳನ್ನು ಪರಿಶೀಲಿಸಿದರು.

2002ರಲ್ಲಿ ನಗರಸಭೆಯ ಸದಸ್ಯರಾಗಿದ್ದ ಎಂ.ವಿರೂಪಾಕ್ಷಿ ಅವರು, ಲೋಕಾಯುಕ್ತಕ್ಕೆ ದೂರು ಸಲ್ಲಿಸಿದ್ದರು. ‘‘ನಗರದ ಯಕ್ಲಾಸಪುರ, ಯರಮರಸ್, ಪೋತಗಲ್, ಅಸ್ಕಿಹಾಳ, ಬೋಳಮಾನದೊಡ್ಡಿ ರಸ್ತೆ, ಚಂದ್ರಬಂಡಾ ರಸ್ತೆಯ ಅನಧಿಕೃತ ಲೇಔಟ್‌ಗಳ ವಿನ್ಯಾಸಕ್ಕೆ ನಗರಸಭೆ ಸಂಖ್ಯೆ ನೀಡಲಾಗಿದೆ. ಎನ್‌ಎ, ಅಭಿವೃದ್ಧಿ ಶುಲ್ಕದ ಮೂಲಕ ಸಂದಾಯವಾಗಬೇಕಾಗಿದ್ದ ಲಕ್ಷಾಂತರ ಹಣ ದುರುಪಯೋಗವಾಗಿದೆ. ಇದರಲ್ಲಿ ನಗರಸಭೆ ಅಧಿಕಾರಿಗಳು, ಅಧ್ಯಕ್ಷರು ಭಾಗಿಯಾಗಿದ್ದಾರೆ’’ ಎಂದು ದೂರಿನಲ್ಲಿ ತಿಳಿಸಿದ್ದರು.

ಈ ದೂರಿನ ವಿಚಾರಣೆ ಅಂತಿಮ ಹಂತ ತಲುಪಿದೆ. ಪ್ರಕರಣಕ್ಕೆ ಸಂಬಂಧಿಸಿ ಅಂತಿಮ ಆದೇಶ ಹೊರಡಿಸಬೇಕಿರುವುದರಿಂದ ಲೋಕಾಯುಕ್ತ ಅಧಿಕಾರಿಗಳು ನಗರಸಭೆಗೆ ಭೇಟಿನೀಡಿದ್ದಾರೆ. ಈ ಸಂದರ್ಭದಲ್ಲಿ ದೂರುದಾರರಿಂದಲೂ ಹೇಳಿಕೆ ಪಡೆದಿದ್ದಾರೆ ಎಂದು ಮೂಲಗಳು ತಿಳಿಸಿವೆ.