ವೈಟಿಪಿಎಸ್: ಬಿಎಚ್‌ಇಎಲ್ ತಂಡ ಪರಿಶೀಲನೆ

ರಾಯಚೂರು: ಯರಮರಸ್ ಸೂಪರ್ ಕ್ರಿಟಿಕಲ್ ಶಾಖೋತ್ಪನ್ನ ವಿದ್ಯುತ್ ಕೇಂದ್ರ(ವೈಟಿಪಿಎಸ್)ದ ಮೊದಲ ಘಟಕದ ಉತ್ಪಾದನೆ ಪ್ರಮಾಣವನ್ನು 800 ಮೆಗಾ ವ್ಯಾಟ್‌ಗೆ ಕೊಂಡೊಯ್ಯುವ ಭಾಗವಾಗಿ ಬಿಎಚ್‌ಇಎಲ್‌ನ ಬೆಂಗಳೂರು ಹಾಗೂ ತ್ರಿಚ್ಚಿಯ ತಜ್ಞರ ತಂಡ ವೈಟಿಪಿಎಸ್‌ಗೆ ಬುಧವಾರ ಭೇಟಿನೀಡಿದ್ದು, ಪರಿಶೀಲನೆ ಆರಂಭಿಸಿದೆ.

ಈ ಘಟಕದಲ್ಲಿ ವಾಣಿಜ್ಯ ಬಳಕೆ ವಿದ್ಯುತ್ ಉತ್ಪಾದನೆಗೆ ಭರದ ಸಿದ್ಧತೆ ನಡೆದಿದೆ. ಕಳೆದ ತಿಂಗಳಾಂತ್ಯಕ್ಕೆ ಪರೀಕ್ಷಾರ್ಥ ವಿದ್ಯುತ್ ಉತ್ಪಾದನೆ ಆರಂಭಗೊಂಡಿತ್ತು. ನಿರಂತರ ವಿದ್ಯುತ್ ಉತ್ಪಾದಿಸಲಾಗುತ್ತಿದ್ದು, ಬುಧವಾರ 500 ಮೆಗಾ ವ್ಯಾಟ್ ಉತ್ಪಾದನೆ ದಾಖಲಾಯಿತು. ಈ ಘಟಕದ ಸೇಫ್ಟಿ ವಾಲ್ವ್ ತಪಾಸಣೆಗೆ ಬಿಎಚ್‌ಇಎಲ್ ತಜ್ಞರ ಜಂಟಿ ತಂಡ ಭೇಟಿನೀಡಿದೆ. ವೈಟಿಪಿಎಸ್‌ನ ಚೀಫ್ ಎಂಜಿನಿಯರ್ ಲಕ್ಷ್ಮಣ ಕಬಾಡೆ ಸೇರಿ ಇತರ ಅಧಿಕಾರಿಗಳೊಂದಿಗೆ ಸಮಾಲೋಚನೆ ನಡೆಸಿತು.

ಈ ತಂಡದಿಂದ ಸುರಕ್ಷತೆಯ ಭರವಸೆ ದೊರೆತ ನಂತರ ಘಟಕದಲ್ಲಿ 800 ಮೆಗಾ ವ್ಯಾಟ್ ವಿದ್ಯುತ್ ಉತ್ಪಾದಿಸಲಾವುಗುದು ಎಂದು ಕೆಪಿಸಿ ಎಂ.ಡಿ. ಕುಮಾರ್‌ನಾಯಕ್ ಅವರು ಈ ಹಿಂದೆಯೇ ತಿಳಿಸಿದ್ದಾರೆ. ನಿಗದಿಯಂತೆ ನಿರಂತರ ವಿದ್ಯುತ್ ಉತ್ಪಾದಿಸಿದ ನಂತರವೇ ವಾಣಿಜ್ಯ ಬಳಕೆಗೆ ಘಟಕ ಸಿದ್ಧ ಎಂದು ಪ್ರಕಟಿಸಲು ಕೆಪಿಸಿ ಯೋಜಿಸಿದೆ. ತರಾತುರಿ ಪ್ರದರ್ಶಿಸದೇ ತಾಂತ್ರಿಕ ಸಮಸ್ಯೆ ಎದುರಾಗದಂತೆ ಮುನ್ನೆಚ್ಚರಿಕೆಯ ಹೆಜ್ಜೆ ಇರಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ಮುಂದಿನ ಎರಡು ದಿನಗಳ ಕಾಲ ತಂತ್ರಜ್ಞರು ವೈಟಿಪಿಎಸ್‌ನಲ್ಲಿದ್ದು ಕಾರ್ಯನಿರ್ವಹಣೆ ಪರಿಶೀಲಿಸಲಿದ್ದಾರೆ. ನಂತರ ಅವರು ಪ್ರಕಟಿಸಲಿರುವ ನಿರ್ಧಾರ ಆಧರಿಸಿ, ವಾಣಿಜ್ಯ ಬಳಕೆ ವಿದ್ಯುತ್ ಉತ್ಪಾದನೆಗೆ ಹಾದಿ ಸುಗಮವಾಗಲಿದೆ ಎಂದು ಕೆಪಿಸಿ ಮೂಲಗಳು ತಿಳಿಸಿವೆ.