ಗಣಿನಾಡಿನಲ್ಲಿ ‘ಮಫ್ತಿ’ ಚಿತ್ರದ ಚಿತ್ರೀಕರಣ

ಸಂಡೂರು (ಬಳ್ಳಾರಿ):ನಾಯಕ ನಟ ಶಿವರಾಜ್ ಕುಮಾರ್ ಅಭಿನಯದ ‘ಮಫ್ತಿ’ ಚಿತ್ರದ ಚಿತ್ರೀಕರಣ, ಇಲ್ಲಿನ ಘೊರ್ಪಡೆಯವರ ಅರಮನೆ ‘ಶಿವಲೀಲಾ ಪ್ಯಾಲೇಸ್ ಹೋಟೆಲ್’ನಲ್ಲಿ ಭಾನುವಾರ ಜರುಗಿತು.

ನರ್ತನ್ ಚಿತ್ರಕತೆ ಬರೆದು ನಿರ್ದೇಶಿಸುತ್ತಿರುವ ಈ ಚಿತ್ರಕ್ಕೆ ಜಯಣ್ಣ, ಭೊಗೇಂದ್ರ ನಿರ್ಮಾಪಕರಾಗಿದ್ದಾರೆ. ರವಿ ಬಸರೂರು ಸಂಗೀತ ನೀಡಿದ್ದಾರೆ. ರವಿವರ್ಮ ಸಂಯೋಜಿಸಿದ ಸಾಹಸ ದಶ್ಯಗಳನ್ನು ಛಾಯಾಗ್ರಾಹಕ ನವೀನ್ ಸೆರೆ ಹಿಡಿಯುತ್ತಿದ್ದಾರೆ.

ಚಿತ್ರದಲ್ಲಿ ಶ್ರೀಮುರುಳಿ, ಸಾನ್ವಿ, ದೇವರಾಜ್, ವಶಿಷ್ಟ, ಬಾಬು ಹಿರಣ್ಯಯ್ಯ ಇತರರು ನಟಿಸುತ್ತಿದ್ದಾರೆ.

ನಾಯಕ ನಟ ಶಿವರಾಜ್ ಕುಮಾರ್ ಹಾಗೂ ನಾಯಕಿ ಛಾಯಾಸಿಂಗ್ ಅವರು ಮಳೆಯಲ್ಲಿ ಭೇಟಿಯಾಗುವ ದಶ್ಯಗಳನ್ನು ಸೆರೆ ಹಿಡಿಯಲಾಯಿತು. ಅಭಿಮಾನಿಗಳ ಒತ್ತಾಯಕ್ಕೆ ಮಣಿದ ನಟ ಶಿವರಾಜ್ ಕುಮಾರ್ ಅವರು ಚಿತ್ರೀಕರಣದಲ್ಲಿ ಬಿಡುವು ಮಾಡಿಕೊಂಡು ಅಭಿಮಾನಿಗಳಿಗೆ ಹಸ್ತಲಾಘವ ನೀಡಿದರು.

‘‘ಈಗಾಗಲೇ ಜಿಂದಾಲ್ ಕಾರ್ಖಾನೆಯಲ್ಲಿ 5 ದಿನ ಚಿತ್ರೀಕರಣ ನಡೆಸಲಾಗಿದೆ. ಆ.7 ರಂದು ಸುಬ್ಬರಾಯನಹಳ್ಳಿ ಗಣಿ ಪ್ರದೇಶದಲ್ಲಿ ಹೆಲಿಕಾಪ್ಟರ್ ಮೂಲಕ ಹಲವು ದಶ್ಯಗಳ ಚಿತ್ರೀಕರಣ ನಡೆಯಲಿದೆ. ಆ.8 ಮತ್ತು 9ರಂದು ಸಂಡೂರು ಅರಮನೆ, ಆ.10 ರಿಂದ 13 ರ ವರಗೆ ಜಿಂದಾಲ್ ಕಾರ್ಖಾನೆಯಲ್ಲಿ ಚಿತ್ರೀಕರಣ ಮಾಡಲಾಗುವುದು’’ ಎಂದು ಚಿತ್ರತಂಡ ತಿಳಿಸಿದೆ.