ಕತ್ತೆ ಹಳ್ಳದ್ದು ಕಥೆಯಲ್ಲ, ಬರೀ ವ್ಯಥೆ

ಮುದಗಲ್‌ : ರಾಯಚೂರು-ಬೆಳಗಾವಿ ರಾಜ್ಯ ಹೆದ್ದಾರಿ ಸಂಪರ್ಕಿಸುವ ಪಟ್ಟಣ ಹೊರವಲಯದ ಕತ್ತೆ ಹಳ್ಳದ ಸೇತುವೆಯನ್ನು ಅವೈಜ್ಞಾನಿಕ ನಿರ್ಮಿಸಿದ್ದರಿಂದ ಅಪಘಾತ ವಲಯವಾಗಿ ಮಾರ್ಪಟ್ಟಿದೆ.

ಈ ಸೇತುವೆಯನ್ನು ತಗ್ಗು ಪ್ರದೇಶದ ತಿರುವಿನಲ್ಲಿ ನಿರ್ಮಿಸಿರುವುದೇ ಸಮಸ್ಯೆಯ ಮೂಲವಾಗಿದೆ. ಸೇತುವೆಯ ಎರಡೂ ಬದಿಯ ರಸ್ತೆ ಎತ್ತರದಲ್ಲಿದ್ದು, ಹೋಗುವವರು ಹಾಗೂ ಬರುವವರಿಗೆ ವಾಹನಗಳ ಸಂಚಾರ ಕಾಣಿಸಿದು. ಮತ್ತೊಂದೆಡೆ ಸೇತುವೆಯೂ ಸಮರ್ಪಕವಾಗಿ ಕಾಣದೇ ಅಪಾಯ ಆಹ್ವಾನಿಸುತ್ತಿದೆ. ಸೇತುವೆ ಇಕ್ಕೆಲಗಳಲ್ಲಿ ಅಳವಡಿಸಿದ ಬಾಂಡ್‌ಗಲ್ಲುಗಳೂ ಗಟ್ಟಿಮುಟ್ಟಾಗಿಲ್ಲ.

ಸ್ಥಳೀಯ ಠಾಣೆ ವ್ಯಾಪ್ತಿಯಲ್ಲಿ ಬರುವ ಈ ಸೇತುವೆ ಮೇಲೆ, ಆಗಾಗ್ಗೆ ಅಪಘಾತಗಳು ನಡೆಯುವುದು ಹಾಗೂ ಅಪಘಾತಗಳ ಕುರಿತು ಪ್ರಕರಣ ದಾಖಲಾಗುವುದೂ ಸಾಮಾನ್ಯವಾಗಿದೆ. ಅಪಘಾತದಲ್ಲಿ ಮೃತಪಟ್ಟವರನ್ನು ವೈದ್ಯಕೀಯ ತಪಾಸಣೆಮಾಡಿ ಕುಟುಂಬಕ್ಕೆ ಹಸ್ತಾಂತರಿಸುವುದಷ್ಟೇ ಪೊಲೀಸ್‌ ಇಲಾಖೆಯ ಕೆಲಸವಾಗಿದೆ. ಇತರ ಇಲಾಖೆಗಳೂ ಸೇತುವೆಯ ಎತ್ತರ ಹೆಚ್ಚಿಸಲು ಯಾವುದೇ ಕ್ರಮಕೈಗೊಂಡಿಲ್ಲ. ಮೇಲ್ಸೇತುವೆ ನಿರ್ಮಿಸುವ ಜತೆಗೆ ಸೇತುವೆಯ ಎರಡೂ ಬದಿ ಸಮತಟ್ಟಾದ ರಸ್ತೆ ನಿರ್ಮಿಸಿ ಸುಗಮ ಸಂಚಾರಕ್ಕೆ ಕ್ರಮಕೈಗೊಳ್ಳಬೇಕೆಂದು ಸ್ಥಳೀಯರು ಆಗ್ರಹಿಸಿದ್ದಾರೆ.